[poem=font=",6,,normal,normal" bkcolor="transparent" bkimage="" border="none,4," type=0 line=0 align=center use=ex num="0,black""]
تلعب طرب.. وانا بنومي.. هواجيس =ما سهرك.. بالليل.. كثر الهمومي
أسهر.. إلى نامت عيون الهداريس =بالليل.. اراعي ساهرت النجومي
أونس بقلبي.. مثل صلو المحاميس =الله يلوم اللي.. لحالي يلومي
أشوف عدلات الليالي.. معابيس =ولا أحد من الدنيا.. عظامه سلومي
تضحك وتخفي لك.. خفي الهناديس =تفطر لها يوم.. ويوم تصومي
إعمل وتلقى.. وافهم العلم بالقيس =دنياك.. لو زانت.. تراها نقومي
قالوا: جهلت.. وقلت: جهل.. بلا قيس =الجاهل اللي.. ما يعرف اليمومي
من لا يدوس الراي.. من قبل ما ديس =عليه.. داسوه.. العيال القرومي
ومن لا يقلط.. شذرة السيف، والكيس =تبدي عليه.. من الليالي ثلومي
والقصر.. ما يصلح على غير تاسيس =ومن لا تعلم.. ما تسر العلومي
ومن لا خذا الدنيا.. بميز وتقييس =مثل الذي يسبح ببحر.. يعومي
ولي توافق.. مشور السو.. وابليس =تبر.. منه وعز.. ربي.. يدومي
كل القلم.. من كتبنا بالقراطيس =وركابنا.. من كثر الاقران.. تومي
ولا خير.. في كثر الحكا والتماليس =وقول بلا فعل.. يجي به وهومي
والعز.. فوق معسكرات السواديس =اليا قصدت اللي.. بالاشيا رحومي
قب.. تنازا بالنشاما.. كراديس =والطير في روجاتهنه.. يحومي
بالليل.. اصالي حاميات المحاميس =والصبح.. الأودي كل قبا قحومي
اربع سنين.. ودمع عيني.. أماريس =العين تسهر.. كن فيها هزومي
والي ركبت معالجات المضاريس =يبرد على قلبي.. لهيب السمومي
صوابنا بالميل.. غمق.. إلى قيس =وطريحنا من مثبره.. ما يقومي
وان جن بنا.. مثل النعام الأماريس =لي خف عجل.. مع رقاق الحزومي
نستلحق اللي يطلبون النواميس =اللي مع الأقصين.. وادني اللحومي
وإن جن بالميدان.. مثل الدواويس =وطار الغطا.. عن قانيات الرقومي
عرج بأهلهن.. كنهن القرانيس =على الطريح.. مصوبرات كظومي
فلومي على اللي.. ينقلون الدبابيس =وصنع الفرنج.. وكل رامي لحومي
وشلف.. تركب.. بالرماح المناسيس =وقحص المهار.. وكل قبا قحومي
والي سمك.. عج الرمك والملابيس =المسعد اللي . حظ ربعه.. يقومي
والشيخ.. من يعطي الفقارا المفاليس =ويبدل العسرة.. بعز يدومي
والحر.. لي دبت عليه النواميس =يشهر.. وعن دار المذلة يشومي
واليا اكترب من بعض الاشيا نسانيس =اعزم.. ولابد الفرج بالعزومي
باب الفرج.. لبسك نظيف الملابيس =ينجيك بأيام الكرب والزحومي
يجلي صدى قلبي.. ضبيح المهاريس =لي قام.. شراب القهاوي يعومي
ودلال فوق النار.. دايم مجاليس =إكرامهن حق علينا.. لزومي
من صنعة (الصبة) وخمس التخاميس =برية.. يعل بها كل يومي
وبهارها.. هيل.. بليا حواسيس =كيف.. يعدي للنشاما القرومي
عده.. لحماي العياد المراويس =والا الحصان.. اللي بقينه وهومي
حتى يزين لنا المثل والتوانيس =والكيف طاب.. لمن يفك القحومي
وصلوا.. على سيد البرية.. بتدريس =صفوة قريش.. اللي مشى باليمومي
عد النبات.. وعد رمل الطعاميس =واعداد.. ما يمطر سحاب الغيومي
[/poem]