من أغراض الشعر الشعبي المواعظ والحكم وهذا النوع من الشعر كان يتكلم به الشاعر الشعبي عن تجاربه الشخصية بعد أن عاشها وعرف حلوها ومرها فيلخص تجاربه هذه بأبيات شعرية يصوغها بقصيدة (نصيحة) يبدأها وكأنه ينصح بها ولده أو قريبه ولكنه يعمم بقية القصيدة على المجتمع ككل، وهذا النوع عادة لا ينظمه إلا كبار السن من الشعراء الذين عصرتهم التجارب، ودائماً تكون التجارب التي يصوغها الشاعر بقصيدته من واقع بيئة هذا الشاعر حيث يتكلم عن أشياء محسوسة يحسها الفرد من خلال حياته اليومية، وهذا لا يعني بأن كبار السن من الشعراء فقط هم الذين ينظمون النصائح بل هناك شباب لهم من التجارب ما يستطيعون به مجاراة الكبار ولكن حين تأتي النصيحة من رجل مسن عرف الحياة حلوها ومرها ومر بتجاربها فإنها ستكون أوقع على النفس، ولو أردنا حصر القصائد التي قيلت بالمواعظ والحكم والنصائح لما استطعنا نظراً لكثرتها، ولكن سأختار لك بعض الأبيات..
من قصائد عدة لمجموعة من الشعراء وهي نماذج لهذا النوع من الشعر:
يقول الشاعر صالح بن سند الحربي:

ياما على الجاهل يفوتن الأفوات=وياما على العاقل تصير البلاوي
لا صرت ما تاخذ أمورك سياسات=العقل عندك والهبال متساوي
ويقول الشاعر محمد بن عون هذه الأبيات من قصيدة تعتبر إحدى درر الشعر الشعبي:

لا تعترض أمر القدر في جدالك=ولا تحسب ان اللي مصيبك بيخطيك
قسمة احظوظ الخلق قسم السوالك=ومكتوب حظك يالفتى في نواصيك
جف القلم باللوح فيما اقتضى لك=اما سعيد الحظ وإلا مشقيك
وانا اشهد ان اللي كتب لك ينالك=يالعبد ربك باسم حظك يناديك
كل بتقدير الولي طاب فالك=اصبر على ما قدر الله ياتيك
ويقول الشاعر بدر بن عواد الحويفي:

الناس لو حاولت تكسب رضاهم=لا ارضيت لك واحد زعل منك عشرين
اما تجاملهم وتكسب رضاهم=ولا تجنبهم يقولون مسكين
قلته وانا مالي مقاصد وراهم=مهما سمعت وشفت بمجرد العين
مالي ورا عقالهم وسفهاهم=لعلهم مني يكونون راضين
ويقول الأمير الشاعر محمد بن أحمد السديري رحمه الله في العدو والصديق:

ارفع مقامك عن عدوك وتوذيه=ويلحقك في تركت رفيقك ملامي
حق الرفيق وواجبه لا تخليه=يلزمك مثل الوالدين الحشامي
إلى قوله:

من خالط الاجرب على الحول يعديه=عدواه تلحق باللحم والعظامي
درب السلامة بينات مماشيه=ودرب العطب يرث عليك الأكامي
ومن أبيات الحكمة هذه الأبيات الجميلة للشاعر ناصر بن عبدالله المسيميري:

الناس عندي تختلف في غلاها=لو كنت بعض ايام اجامل واساير
ربعي واميز طيبهم من رداها=وافرق غثيثه من نقي السراير
ناس إلى زعلت ندور رضاها=وناس الى زعلت نسوق البشاير

ومن الأبيات الجميلة والرائعة في الحكمة هذين البيتين للشاعر عبدالله العلي الحرير رحمه الله:

إلى بغيت اتحط كلش على البال=غديت صقار ابساقة هدادة
تغثك الدنيا ولا ادركت به حال=مثل البعير إلى تقلد اشداده
ومن قصيدة بركات الشريف التي ينصح فيها ابنه مالك اخترت لك هذه الأبيات وإن كانت كلها حكمة:
يقول موصيا ابنه باكرام الضيف:

الضيف قدم له هلا حين يلفيك=ومما تحوشه يافتى الجود يمناك
واحذر تلقي الضيف مقرن علابيك=خله محب لك صديق إذا جاك
ويقول أيضاً موصياله باختيار الرفيق الصالح والابتعاد عن رفيق السوء:

الحر مثلك يستحي يصحب الديك=وان صاحبه عاع معاعات الأدياك
بالك تماشي واحد لك يرديك=طالع بني جنسك وفكر بممشاك
وهذا الشاعر سليمان بن ناصر الشريم رحمه الله يوصي ابنه في قصيدة طويلة اخترت منها هذه الأبيات:

افهم وصاتي ياعزيز وانا ابوك=دامك صغير وغاية العلم يقراك
تراه ما ينفعك خالك ولا اخوك=لا صرت ما تقضي لزومك بيمناك
ربعك اليا بان الخلل فيك عافوك=اقرب قريب لك من الناس يشناك
ان كثر مالك صدقوا لك وطاعوك=وان قل ما بيديك شانت سجاياك
ويقول الشيخ تركي بن حميد رحمه الله:

اشوف عدلات الليالي مقاييس=ولحد من الدنيا عظامه سلومي
تضحك وتخفي لك خفي الهناديس=تفطر لها يوم ويوم تصومي
اعمل وتلقى وافهم العلم بالقيس=دنياك لو زانت تراها نقومي
ومن لاخذ الدنيا يميز وتقييس=مثل الذي يصبح بليل يعومي
ويقول الشاعر الكبير مرشد البذال رحمه الله:

لو كل من قال المعاني عسفها=ما صار نقص بالمعاني ولا زود
والبندق العوجا اتجنب هدفها=لا صار منظرها عن القطر مصدود
وغاية جميع الخلق ماحد عرفها=ارضا جميع الخلق ما هو بموجود
لاشك تدري كل نفس نصفها=ترى كلام العدل يظهر له اشهود
من رابع العقال نفسه صرفها=عن تيهة يشقى بها ما بها فود
اعداد / صالح بن عبدالله الزرير التميمي - الرس /
جريدة الرياض السبت 06 شعبان 1423العدد 12531 السنة 38

مما امتعني فاحببت نقله للفائده

مودتي