¤؛° الجزء الواحد و العشرون °؛¤
في الصباح __شما جالسة مع ناصر في الحديقة و يشربون الشاهي
شما: مرايم ردت علي البارح بقرارها بس انت كنت نايم و ما خبرتك ..
ناصر: وشنو ردت؟
شما: ماهي موافقة .. تقول تبي تكمل دراستها او على الأقل بعد كم سنة لكنها ما تبي تعرس هالحين لأنها توها اول سنة بالجامعة وما تبي تأثر على دراستها ..
ناصر: شو هالدلع هذا بعد ... هي مب صغيرة و ياما ناس تزوجوا و اهم يدرسون ... و تقدر تشرط عليه انها تواصل دراستها وما اعتقد انه بيمانع لأنه يدري انها تدرس و اهو رجال متعلم و فاهم ...
شما: هذا قرار بنتك وهي تشوف انه الأفضل لمستقبلها...
ناصر: شو مستقبلها بعد .. شو هالرمسة احنا وين قاعدين .. ناقص تقول لي تبي تكون نفسها اول بعد ... البنت مهما راحت او درست مردها لبيت زوجها ... والمفروض انتي كنتي تفهميها هالشي ...
شما: ما يحتاج تعصب يا بومبارك .. بعد هذا قرار البنت واهي اللي بتعيش وبترتبط بهالريال طول عمرها.. انا اشوف انك تكلمها و تقول لها اللي عندك و تسمع منها .. ولا تقسي على البنت ...
ناصر: انا من متى و انا اقسي على عيالي يا شما .. لكن مو تبيني اشوفهم يسوون الغلط و اسكت عنهم ..
شما: لا تكبر السالفة يا ناصر ... والزواج قسمة و نصيب و إذا ما اخذته بتاخذ غيره ..
ناصر: من رمستها هذي اما ما تبي تعرس ابد او ان حد في بالها ..
شما: اذكر الله يا ناصر .. شو حد في بالها .. هذي مرايم بنتك الحينه تشك فيها ؟؟
ناصر: استغفرالله ... طيب انا ساير اشوف اذا صحت من نومها و اكلمها ...
ودخل بومبارك البيت و شاف في طريقه مبارك ... و كان واضح الضيق على وجه ابوه ...
مبارك توايه مع ابوه و صبح عليه..
مبارك: صباح الخير ابويه ...
ناصر: صباح النور .. الله يرضى عليك يا ولدي
مبارك:خير بويه شكلك متضايق ..
ناصر: اختك مرايم ردت برفضها على عبدالرحمن اخو ربيعك ...
مبارك: لا لا .. افااا ..!!
ناصر: هيه هذا اللي صار
مبارك: والله هالبنات هذيلا بيحرجونا...
ناصر:انا ساير لها اكلمها و افهم منها ليش رفضت
مبارك: على خير
وسار بو مبارك فوق لدار بنته ...
قعد مبارك في الصالة و نادى البشكارة عشان تييب له الشاي ..
أحمد اخوه كان طالع من المطبع و حامل معه الشاي و يمشي و يطالع في الدخان اللي يطلع من الكوب و سرحااان ومو شايف حد قدامه ... ولما جلس انتبه ان مبارك يمه ...
أحمد: أأه .. مبارك انت هني .. صباح الخير
مبارك: صباح النور و الورد و الياسمين ... يسعدلي هالصباح .. اشوف الأخ مب في حالة اليوم
أحمد: ههه ما اروم كل هالرمسة لي ..
مبارك: هيـه لك .. شفيك تمشي سرحان حتى انك ما شفتني ولا انتبهت لي إلا لما جلست جنبي ..
أحمد: ابد بس كنت افكر شوي ..
مبارك: تفكر في شنو ...- وغمز له بعينه- أو في منو ؟؟
أحمد ارتبك و لكنه بسرعة ضبط نفسه وكانت علامات الجد تملأ وجهه: مبارك ابي اسألك و استشيرك في شغلة.. بس ما ابيك تقول لي بعدك صغير او شي من هالقبيل ...
مبارك: افا وانا خوك اعين و اعاون .. اسأل اللي تبيه ..
أحمد: فيها شي إذا بغيتكم تخطبون لي او تحيرون لي حد وانا بهالسن ؟؟
مبارك استغرب و فتح فمه مثل الي مو فاهم شي ... او مو مصدق .. عمره ما خطر بباله ان احمد بيقول له هالشي .. احمد؟!! يخطب و يفكر بهالشي؟.. توه مدرسة ما كمل! ...
مبارك:هذي مزحة من مزحاتك يعني ؟؟
أحمد: توقعتك ما بتفهمني .. اتكلم جد الجد بعد..
مبارك: احمد انت للحين باقي لك هالسنة واللي بعدها بعد عشان تكمل مدرسة .. شلون تبي تخطب او تحير حد .. ومني بترضا او ابوها بيرضى ...؟
أحمد: انا متأكد ان اهلها ما بيمانعون .. وبعدين انا بس بحيرها يعني ما بنملج و نعرس إلا بعد جم سنة .. على الأقل على ما اتخرج و بعدها ادرس و اشتغل بنفس الوقت ...
مبارك:وش دراك اهلها ما بيمانعون؟؟؟ ومنهي هذي .. اخاف انها وحدة من هالبنات و خلتك تحبها ... انت للحين في مرحلة المراهقة يا احمد و المشاعر تتغير وتتبدل مع الزمن ...
أحمد: البنت ولا كل البنات وما ارضى عليها بنسمة الهوا يا مبارك .. حبي لها حب برئ طفولي ... وانت تعرفها .. وكلكم تعرفونها ...
البشكارة مينا جابت الشاي لمبارك وراحت ... و كمل كلامه بسرعة مع اخوه ..
مبارك: من هي هذي؟
أحمد: بدور ... بدرية بنت عمي فهد ...
مبارك: من من من؟؟؟؟ معقوووولة؟؟
أحمد: ما زاد احساسي فيها إلا لما قربت طلعتهم من البيت يا مبارك .. لأني بنحرم من قولة صباح الخير و شوفه هالوجه الملائكي ... لأني بنحرم من بسمتها و كلامها الحلو و الهادئ بطبعه ... لأني بفتقدها و ابي شي يربطني فيها .. حتى لو كان هالارتباط بعد زمن .. لكن احساسي انها بالاول و الاخير بتكون لي اهو اللي راح يصبرني ..
مبارك كان مذهول .. هذا احمد يتكلم.. لالا يمكن يمزح و إلا يتغشمر .. شكله يتكلم من جد .. شو هالرمسة اللي يقولها .. كلام شاعر هذا ... والله طلعت احسن مني يا حمود ...
أحمد: شفيك ساكت يا مبارك؟ ادري الحين تقول اني ياهل و هالكلام بعدني صغير عليه ... لكن يقولون الحب يجي مرة وحدة و غصب عن الانسان ومن دون لا يدري ... وانا حبيت بنت عمي .. و ابيها .. وماريدها تكون لغيري .. اصلا لو تكون لغيري انا انتهي من هالوجود .. مقدر اني للحين طالب و ماقدر اتحمل مسؤؤلية .. لكن حبي لها يخليني اشيلها في عيوني .. وقبل كل شي اهي بنت عمي و كرامتها من كرامتي ...
مبارك: والله و طلعت كفو يا حمود .. كل هذا شايله بقلبك ...
انحرج احمد من اخوه ونزل راسه
مبارك: ههههههه فديته اللي يستحي .. لكن انت صج ما تستحي على ويهك ؟؟
تفاجأ احمد من رمسه اخوه و رفع راسه له
مبارك: عيل تبي تخطب قبل مني .. وانا اكبر منك يالخام .. شوف انا اشرط شرط .. زواج احمد من بدرية بااااااطل ... بشرط ان يصير زواج مبارك من شمس قبلهم ..
أحمد: شو؟؟ شمس؟؟ بنت عمي؟؟
مبارك: أي اجل انت احسن عني .. انت بتحير بنت عمك الصغيرة و انا بحير بنت عمك الكبيرة ... و نربط العايلة كلها مع بعض .. ههههههه شرايك ؟
أحمد: صج و الله ؟؟ انت بعد تبي شمس .. لو بس جي ترمس ؟
مبارك: انا ابيها من زمااان .. من اول ما دخلت هالبنت بيتنا ادخلت قلبي و اسكنت عقلي و هب راضية تطلع منه و ربي ...
أحمد: هههههه ونااااااسة ... يالله خبر ابوي ... خيير البر عاجله ...نملج بعد ما اتخرج انت من الجامعة واتخرج انا من المدرسة ...
مبارك: جان زين .. الله يسمع منك ...بس مب الحين نقول لأبوي .. لأنه اليوم متضايق على مرايم ..
أحمد: مرايم.. شفيها اختيه؟؟؟؟؟
مبارك: ما فيها شي .. بس أنها رافضة تعرس الحين ومادري شسالفتها و راح يكلمها ...
أحمد: والله دنيا .. ناس تبي تعرس من اليوم و مو لاقية .. و ناس يتشرطون و يتدلعون ...
مبارك: هيـــه و الله يا خوي .. دنيا
أحمد: يا رب اشوف نفسي معرس في الكوشة ومعاي بدور يا رب العالمين
مبارك: ههههههه صج ياهل ... يا رب أنا قبله ...
أحمد: طاع من توه يرمس ههههههههههه
ناصر نازل من الدري و لقى احمد و مبارك جالسين في الصالة .. سلم عليهم و جلس معاهم يسولف ..
شما مع البشكارة يشلون الكؤؤس من الفطور و يودونه المطبخ .. شما قعدت معاهم في الصالة و اتركت بقيه الشغل للبشكارة ..
شما: يالله احمد ما بقى شي على قوم سير المدرسة ...
أحمد: امـيه اليوم انا معطي نفسي اجازة مب رايح المدرسة ..
ناصر: و ليش انشاء الله شالمناسبة عسب ما تروح اليوم ...
احمد: لا يبه ما شي .. بس ما عندنا شي مهم .. وانا مو راقد من البارح للحين .. اخاف اروح وانام عليهم في الصف .. عشان جي اتم في البيت احسن لي ..
ناصر: اسمع يا حمود انا لو ما اعرفك دافور و تهمك دراستك جان ما برضى .. لكن تحمل اتعود على هالشي وكل يوم تقول هب ساير المدرسة ...
احمد: لا يبه بس اليوم وين كل يوم .. انا استأذن الحينه .. ساير انانم . تامرون شي
الجميع سلامتك ..
ناصر: وانت ابويه مبارك مب ساير الجامعة انت بعد؟
مبارك: هههههه بلى ساير .. بس هب الحينه اساعة 10 .. بس خبرك انا متعود على القعدة مبجر .. الحينه اروح ارقد لي ساعتين و اصحى اسير الجامعة ..
ناصر: مبارك .. اذا شفت ربيعك و بغيت تخبره عن رد اختك قوله لا يخبر اخوه او اهله ... يسمعون الجواب من صوب الحريم و يتفاهمون بيكون احسن ...
مبارك: ان شاء الله ابويه .. في امان الله توصي شي
ناصر: سلامتك
مبارك: تامرني على شي خالتي ..
شما: سلامتك ..
و سار مبارك غرفته ...
شما: ها يا بومبارك كلمت مريم ..
ناصر: هيه .. البنت تبي تكمل دراستها .. انا ارتحت من كلامي معاها و عجبني حتى لو ما اقتنعت فيه .. لكن هذا قرارها .. إذا ما اتصلوا فيج اليوم اتصلي لهم و خبريهم بقرار البنت اونها ما تبي تعرس و اهي في الجامعة و من يوم وساير أي حد يتقدم لها بيكون هذا ردنا عليه .. و قولي لهم السموحة ..
*********************
في بيت بوعبدالرحمن يوم الأحد المغرب ...
محمد في غرفته يتلبس .. لابس ذاك الثوب و التسفيرة العجيبة اللي يشوفه يقول معرس .. و يرشرش في العطور و يطالع نفسه في المنظرة مستانس على روحه ... إلا دق على الباب .. من تتوقعون ؟؟؟
< عبدالرحمن> ...
عبدالرحمن: مرحباا الساااع بو جسوم ...
محمد: مرحباا مليون ... شرااايك فيني
عبدالرحمن: معرس معرس .. لا يكون رايح تخطب من ورانا .. هههههههه
محمد: ههههه انا فعلاً ساير عرس .. الليلة زواج اخو اسامة وانت معزوم انا قايل لك اونك نسيت ... يالله روح تزهب بسرعة ...
عبدالرحمن: هههه ما نسيت الحين شوية اروح اتزهب .. متى يا ربي اصير انا بعد معرس و ترتبشون عشاني هالربشة .. شي عجييب ...
تكدر محمد على اخوه : هيه ان شاء الله نفرح فيك قريب و نرقص في عرسك بعد هههههههههه
عبدالرحمن: و نفرح فيك بعد ... لكن ما اعتقد ان بيصير قريب ..
محمد: شو؟ ليش؟
عبدالرحمن: البنت اللي اخطبتها امي لي .. ارفضت .. تقول انها تبي تكمل دراستها اول و تبي تخلص الجامعة وما تبي ترتبط الحينه ..
محمد فرح من داخله و حزن على اخوه بنفس الوقت .. يحس نفسه دنيء و اهو اللي خرب فرحة اخوه ..
محمد: و على شنو نويت .. راح تنطرها لحد ما تخلص؟
عبدالرحمن: لأ وين .. اظاهر انها مو من نصيبي و الزواج قسمة و نصيب .. الوالدة ضايق خلقها و معصبة من قلب و زعلانة .. ههههههه لكن انا هديتها شوي و قلت لها تدور لي وحدةً غيرها ...
محمد: الله يرزقك احسن منها ان شاء الله يا خوي ..
عبدالرحمن: الله يسمع منك قول آمين ...
محمد: آآمين ..
عبدالرحمن: امي امدحتها وايد و اهي متحسفة انها مو من نصيبي .. او انها ما انضمت لعايلتنا ... و ان شاء الله انت تقدر تضمها لعايلتنا و تفرح قلب الوالدة ...
محمد تفاجأ .. عبدالرحمن اخوه يقول له هالرمسة ..؟
محمد: شو ؟؟ عـبـ ـ ـ درحمـ ـ ـن .. ؟؟؟
عبدالرحمن: ههههههههه شفيك جي .. كأن احد صاب عليك ماي بارد ..
محمد: انت شدراك؟ قصدي .. انا آسف
عبدالرحمن: على شنو تتأسف .. بلا رمسه خايبة ...
محمد:انا .. مادري شقول لك .. انت فاجأتني ... انت من صجك و من قلب تقول لي هالكلام؟؟
عبدالرحمن: انت اخوي و اتمنى لك الخير يا بوجسمان .. انا سمعت رمستك مع سارة اختيه بالصدفة ذاك اليوم و من يومها و انا اتمنى هالبنت انها ما توافق .. وحرمتها على نفسي بعد ما سمعتك تحرمها عليك لو اني تزوجتها ... النصيب جي .. ومن اليوم لحد ما تاخذها و هالبنت شراة اختي سارة ... وما ابي تكون بيننا أي حساسيات بهالموضوع .. و الله يسعدك مع هالبنت و ان شاء الله تكون من نصيبك .. بس عاد ها لازم تصبر عليها عسب اتخرج ... هههههه
من كثر فرحة محمد برمسة اخوه عبدالرحمن لمه بقوة ... ومن الفرحة مو عارف شو يسوي ..
عبدالرحمن: ذبحتني بسك عاد ... انزين كشختك لا تخترب بس .. ههههههههه
محمد:ههههههه زين يالله انت بعد روح اكشخ و تسفر نفسي الشباب كلهم متفقين على جي ..
عبدالرحمن: تم .. انا ساير اراويك ان ما طلعت احسن عنك .. وضويت راس كل الغرشوبات للي بالعرس ..
محمد: هيه بنشوف من الغاوي اكثر ... ههههههههههههههههههههههه
عبدالرحمن: ههههههههههههه
**************************
العرس صار في خيمة كبيرة ورا بيت الحايكي << بيت اسامة .. وكان الجو كله ربشة ...
محمد و معاه عبدالرحمن جايين من بعيد و لمحوهم علي مع مبارك واسامة...
مبارك قال لعلي عن رد اخته وعلاقتهم طبعا ما تغيرت..و لكنها زادت قوة و ترابط ..
توايهو الشباب ..
عبدالرحمن: بالمبارك بو مشعل الفال لك
اسامة: و لك ان شاء الله ..
محمد: و ين معرسكم ..
اسامة: كاهو هب عارف جالس مكانه مفشلنا ... يبينا نزفه بسرعة عشنا يرووح لعروسته بسرعة عند الحريم ... ههههههههه
الجميع: هههههههههههههههههه
علي: بنشوفك إن ما صرت ازيد عنه الحينه بس اتطنز عليه ...
اسامة:ههاااااي ومن بيعزمكم اصلاً .. انا باخذ عروستي و طيرررران شهر العسل مب مسوي لكم شي ولا ابيكم تزفوني .. العروسة للعريس و الجري للمتعايس ...
مبارك:ههههه مب هين والله هالاسامة ههههههههههههه
اسامة: ههههههههه عشون عيل ...
محمد: هها هذا إلا يرمس ... من يشوف حرمة دفن راسه في الأرض كأنه نعامة ههههههه
عبدالرحمن: هههه شعليك منه .. اهو صج منزل راسه لكن عيونه اتلاقط و تشوووف و تبصبص ...
اسامة: افااااا كشفتني .. وانا احسب ماحد يدري عني
محمد: عنلاتك زادٍ يالخام ... جي تسوي وانا مادري بك احسبك مؤدب ويا هالويه ...
اسامة: جي انا شمسوي ... يعني ربي يخلق هالجمال وو يخلق لنا العيون و نغمضهم؟؟؟
علي: هذا من صجه رفيجك .. ما هكذا الظن بك ... جي يعني جليل الحيا
مبارك: هيه والله ياما تحت السواهي دواهي ..
محمد: وانا اقول ما في حد نفس مروان .. طلعت انت من طينته بس من تحت لتحت ..
اسامة: Oh my God!! .. هذيلا من صجهم صدقوا .. عبووود .. عبدالرحمن الحينه تفكني منهم صاروا يشكون فيني بعدين من ترضى فيني إذا ربعي قالوا عني هالشكل .. و هالخام يشبهني بمروان بعد ...
عبدالرحمن: انا اشهد له بومشعل .. ريال ولا في مثله و لو عندي اخت ما غليتها عليه و خطبتها له ...
وباس اسامة عبدالرحمن على خشمه ...
اسامة: فديته بوضاحي ... جي ارمس مو مساع تخليهم يشكون فيني بعد ...
محمد: ههههه ... اطري القط يجيلك ينط .. كاهو مروان وصل
وكملوا الشباب العرس واهم في وناسة و ربشة .. و بعدها تعشوا و زفوا المعرس ...
¤؛ ° الجزء الثاني و العشرون °؛ ¤
في بيت بو عبدالرحمن....
وسمية: كلووووووولويش ... بالمبارك يا ولدي منك المال و منها العيال ...
و طبعا الحريم << دموع الفرح ...
عبدالرحمن: الله يبارك فيج و يخليج لي يا يمــه .. مادري ليش الحريم كلهم جذي يفرحون يبجون يزعلون بعد يبجون .. ههههههههههه
سارة: ههه فديتها الغالية متونسة لك .. اخيرا بتزوج ولدها الكبير
عبدالرحمن: زين متى نملج .. ياللا انا مستعيل ..
سارة: هههههه الحين توها الموافقة صارت .. اصبر شوف طلباتهم و متى يمديها البنت تجهز نفسها ...
وسمية: هيه و احنا بعد عشان يمدينا .. لازم نسوي عرس لا صار و لا استوى ترمس عنه كل العربان ...
عبدالرحمن: ههههههه صج شسمها حرميته؟؟ .. << وكان واضح عليه الحيا لما قال حرمتيه
سارة: فدييييته خويه .. حرمتك اسمها سماح .. و اهي اسم على مسمى سبحان الخلاق ..
وسمية: هيه والله هالبنت ادخلت قليبي من شفتها... و الله يا سارة انتي هب سهلة عرفتي تختارين منو لخوج
سارة: طبعا خويه ريال و لا كل الرجاجيل ولازم ياخذ له حرمة سنعة ولا كل الحريم ... و هالبنت ربيعه ميثا اخت بوالهنوف ..طيبة و حلوة و خفيفة دم وعقل و من عايلة محترمة .. و ما شفت عليها شي.. والأهم انها تستاهلك وانه اختك ...
عبدالرحمن: الله كل هذا في حرميته ... يا فرح قلبك يا عبدالرحمن هههههههههههه
وسمية: الله يفرحني فيك و في عيالك ان شاء الله يالغالي ..
و وبدأت تجهيزات الملكة و اللي بعدها بسبوع بتصير حفلة الخطوبة ... الكل كان مرتبش ووصل خبر خطوبة عبدالرحمن إلى عايلة السالم ...
********************************
في بيت السالم ....
شما تكلم وسمية ام عبدالرحمن في التلفون ..
وسمية: عاد يا وخيتي لا تخلين انتي و البنات لازم تجون ..
شما: ان شاء الله يا وخيتي و الله يبلغج بعيالج كلهم ان شاء الله ..
وسمية: حتى مرايم لازم تجي ... مهما كان احنا اهل و حبايب حتى لو ما كان طلبنا عندكم .. و الزواج قسمه و نصيب ياوخيتي ...
شما:احنا ما رفضناكم يا عبدالرحمن و انتي تدرين بنات هالايام كله يفكرون بدراستهم كأنهم اهم اللي بيصرفون على بيوتهم بعد ما يتزوجون ...
وسمية: الله يرزقها بولد الحلال اللي يستاهلها ... و بنيتنا سماح فديتها ما اتخير عن مرايم ...
شما: تستاهلون و انه اعرفها هالبنت مؤدبة و من عيلة حشيم .... عالبركة ان شاء الله ...
و اكملت شما و وسمية سوالفهم اللي لا تخلوا من الحش و و القيل و القال عن فلان و فلانة << عوايد حريم ما اتغير مهما يصير !!...
و اغلقت شما السماعة و كانت مرايم نازلة من الدري و معاها رباب ...
مريم: مرحبا الساع خالتي
رباب: مراحب امي
شما: مرحبا مليوون عيالي ...
جلسوا في الصالة و شغلت رباب التلفزيون .. و مريم تسولف مع شما ...
شما: ام عبدالرحمن متصلة لي من شوي .
مريم بتفاجأ و استغراب: شنو؟ منو؟ ليش ؟؟
شما: تبي تعزمنا على ملكة ولدها ..
مريم: أي ولد؟
شما: عبدالرحمن بعد منو ...
مريم بفرح و تفاجؤ: صج والله ؟! مبروك مبروك يستاهل والله ... منو بياخذ؟
شما: بياخذ سماح بنت العالي ...
مريم: هيه عرفتهااااا ... بنية زينة .. هذي رفيجة ميثا اخت زوج سارة اخته الروح بالروح ...
شما:هيه قالت لي انها اختيار سارة بنتها ...و أكدت علي ان لازم نروح ...
مريم: هيه خالتي ما فيها شي روحي يستاهلون ...
شما: و قالت لي بعد انتي لزام تروحين و الحرمة مو زعلانة منج ... هههههههه و من كلامها زعلانة عليج انج خسرتي واحد مثل ولدها عشان الدراسة ....
مريم: ههههههه .. يستاهل احسن مني الله يوفقه ان شاء الله .. بس انه فشلة اروح ...
شما: ماحد يدري انه خطبج ... الشي صار بيناتنا .. واهم ما بيطلعون الحجي على ولدهم و احنا ما بنرمس على بنتنا ...
مريم: بس انا استحي اروح .. احسها مب عدلة ... او نروح الحفلة بس ..
شما: ما فيها شي يا بنتي ... نروح حالنا حال المعازيم ... نبارك لهم و نرجع ... و الملكة بتصير ف يبيت العروس ..
مريم: اوكي خالتي اللي تشوفينه ...
شما تكلم رباب ...
شما: يمه رباب وين بدور عنج؟؟
رباب مبوزة : راحت بيتهم تسوي التعديلات الاخيرة على غرفتها ...
شما تكلم مريم: شمس بعد معها ؟؟
مريم: هيه .. راحوا مع اعمامي يكملون اغراض البيت .. احتمال ينتقلون هالاسبوع ...
شما: على خير ان شاء الله بيت مبروك ...
رباب: يمه انا كل يوم بعدين ابي اروح بيت عمي تعودت عليهم شلون حالي يصير بعدهم ...
شما: ان شاء الله يا بنتي .. الحين اهم في العين و بيتهم جريب شارعين بس بينا و بينهم هب نفس اول اهم في بو ظبي ونحن هني ...لكن صج لهم بيكون وحشة .. مالوا علينا البيت...
وهالوقت دخل عليهم اشخاص.. من هم؟... غريبة ...
بنات عمهم راشد زينة و سارة .. توايهو البنات مع بعضهم و كانت زيارة سعيدة غير متوقعة ...
مريم: هاا بناااات شو هالزيارة الحلووووة ...
زينة: ههههههه لا تخفون راح تشوفون من هالزيارات وايد ...
مريم: صج؟؟ شلووون؟
سارة: ابويه الحينه مع عمي ناصر و يدي في الميلس ...
شما: شو يا بنتي شو مستوي خبرينا..؟؟؟
سارة: ما راح نرجع بوظبي خلااااااص ...
زينة: بنكون في العين .. قريبين منكم ...
مريم: صج صج... أي شلون عاااد فهمينها ...
**************************
10-27-2008, 02:21 AM
Similar Threads
Linear Mode
