وصل ركب الرحيل لشاطئ الغربه ودار أجناب
بعد طول الطريق اللي تمادى واتعب أركابي

ضحك وجه المدينه للمسافر والوجيه أغراب
وأنا عابر سبيل وضحكتي ما صافحت نابي

وقفت أنظر على شط المدينه والجروح أسراب
ولعنت ( أم الحنين ) وسالت الدمعه على أهدابي

هنا كنت الغريب بلا حبيب ولا وطن واقراب
حزين وما قدرت أجمع شتاتي واحسب أحسابي


حداني للسهر جرح (ن) سجني بين ناب وناب
وتركني بين صمت الذكريات بصفحة كتابي

حبيبي والغلا جرح (ن) ذكرته وأنفتح له باب
وانا لو ما ذكرتك وأنت ناسي .. وش بيبقابي

صحى هم الفراق .. اللي فتح للذكريات أبواب
وغفيت وما صحيت الا وطيفك يطرق أبوابي

حبيبي ترسم الغيمه ملامح وجهك الجذاب
واشوفك وين ما ألد النظر مع كل هندابي

ذكرت أول لقاء فيه أجتمعنا بالغرام أحباب
الين آخر لقا منه أفترقنا .. وآخر أتعابي

فداك الجرح ياوجه (ن) تركني للملام وغاب
بقاله في حياتي طعنتين وجرح ما طابي

أنا اللي كنت أضيع بنظرتك شوق ووله وأعجاب
واضيق بغيبتك .. وتضيق بي دنياي وثيابي

عطيتك قلب واشواق وحنين وفيك ظني خاب
احسب أنك تمنى رجعتي وأثرك تسلا بي

تبعتك مثل مااتبع سراب .. وجيت لك مرتاب
واشوفك مثل الأمس المستحيل وباكر الغابي

حبيبي وانت ما تسوى ملام ولا أنت قد أعتاب
تعداك الملامه والعتاب .. وشرهة شمالي مايهابي

خطاي أني تماديت بغلاتك وما حسبت حساب
احسب أن الوفا طبع البشر !! وأحبابي احبابي

وعزاي أني ردعت القلب عن باقي غلاتك وتاب
وصحى في داخلي طفل (ن) غرير وشايب أعرابي

حبيبي للصبر بال (ن) طويل وللجروح أسباب
وانا مارحت أدور للجروح أعذار واسبابي

حبيبي يوم شفت الزمان برجعتك كذاب
تركتك للتجافي والغرور بزحمة أصحابي

رحلت وقلت أسافر عنك وأجزيك الغياب أغياب
واببعد واستريح من السهر .. واريح أعصابي

هجرت أرض الجروح ابغى عن تراب الجروح تراب
عساي أنساك وانسى رجعتك والجرح وترابي

يطيب الجرح والا يا عسى جرح الهوى ما طاب
تفضل هاك جرحك .. واستريح وجرحي أولابي

طلع صبح الفراق بشاطئ الغربه ودار أجناب
ولعنت أم الحنين وسالت الدمعه على أهدابي


مما راق لي في جولة على صفحات قوقل ,,,,,,,,,,,

تحياتي