أحسن قصيدة

قصيدة جميلة ورائعة لأحد الشعراء اليمنيين يصور فيها الوضع اليمني الحالي وهو من منطقة مسور التابعة لخولان

واسمه مجيب الرحمن غنيم :
يا ملبي دُعا المحتاج لا حتاج واظطر = ذي هو الواحد المعبود وإحنا عبيده
أسألك واطلبك يسر لنا ماتعسر = واغفر الذنب وارزقنا الخصال الحميدة
والصلاه للنبي طه الطهور المطهر = خاتم المرسلين حامي حماة العقيدة
بعد ذكر النبي يالهاجس الليلة اشعر = قوم سوي قصيدة لكن ايش من قصيدة
به لديا أمور اشتي على الشعب تظهر = كم به اشيا وكم به من قضايا عديدة
خلت القلب يقطر دم والعين تسهر = والكبد ضاق واشعل في السويداء وقيده
قبل ما ننتخب كان اقتصاده مدهور = عاش في ضايقه عظمى ونكبة شديدة
الدجاجة يقسمها ليومين واكثر = خيم الفقر في داخل سهوله وبيده
جت لنا الإنتخابات قلت هيا تحرر = من رموز الفساد ياشعب فرصة سعيدة
وإن قد المؤتمر صيح وليح وشخّر = واعلنوا في الإذاعة واعلنوا في الجريدة
والرئيس اختطب حمر وخضر وصفر = انتبه يايمن وانا افعل اللي تريده
لا جرع لا غلا لا سرق لا غش يظهر = والفساد الإداري يايمن بانبيده
خططوا ألف خطة لاجل شملان يخسر = وافعلوا له مية خدعة وسبعين مكيدة
واليمن حين استمع تلك الدعاية تأثر = صدق الهرج حقه وافتجع من وعيده
واقتلب ضدنا شيّر وحشّر وشمّر = واشتغل من حدود المملكة لا عبيده
صاح الإصلاح هذا كذب ياشعبنا احذر = لنت مغرور راجع ماضيك واستعيده
كم من اول وعد وإحنا نصدق ونغتر = واصبحت غير جدية وليست أكيده
لكن الشعب سع ذي قال غني مع أدور = لا يفيدك ولا غناك له بايفيده
كلمّه رطل ما يفهم وقية ولا اصغر = هكذا الشعب من عهد جده وسيده
شعب امي وجاهل وشعب كله مخدر = بالقطل ست ساعات ما يوقف ذويده
يخلط الشمة البيضا مع قات مبودر= وإنه اصرع عقول الناس صارت بليده
قله الوضع مدهور منحطل مكسر = كسروه السرق والشلة المستفيده
غيروا قال امانه ما علي ما تغير = ما لنا إلا علي شهرين وهذا نشيده
ما علي هو علي ماهو قد افعل وسبر = قد صنع قد ترك ضحى ضحايا عديدة
هو مناضل وعمه مات شهيد في قصيعر = وابو امه وجدة عمة امه شهيده
فاز عمك علي والشعب هلل وكبر = عشت حرة أبية يايمنا السعيدة
من سمع قال هذا القدس يمكن تحرر = خلوا الجو يشعل كنهُ يوم عيده
ماضوا شي محمد مقبل إلا بمعبر = دق لا ما نكع سك الكراع والجريدة
ما جلسنا شي إلا شهر من حين سيطر = والغلاءزاد لكن زاد بصورة فريدة
كود نص المعاش يدي لنا كيس سكر = قلت جيده أمانه فيك ياشعب جيده
أين سارت خطابات لحج وأبين ولودر = واين سارت وعوده في المكلا وريده
واين قتلى تعز واين جت قرارات معبر = وين جا هرج صنعاء وين هرج الحديدة
كلها تبخرت مثل المطر لا تبخر = واصبحت مصيدة للمواطن كي يصيده
صاحوا الشعب قلنا يالمواطن تصبر = قال دحباش يستاهل من الفعل بيده
من جهاتي حرام إن انت تستاهل اكثر = لا طلع لا حد عشر الف لا اقول زيده
والرئيس شاف وإن الشعب منه تضجر = كيف يساليه شكل له حكومة جديدة
سرت اشوف ايش فعل فيها الجمالي وسبر= وإنها نفسها كذبه تضاف لا رصيده
العليمي وباصرة والأستاذ مجور = نفسهم بس ينقل ذا وهذا يعيده
وانت ياخي تقدم وانت ياخي تأخر = كل من يعقب الثاني ويمهد مهيده
دومك الليل دايم من وسط حر لا حر = وبادلوهم وسموها حكومة رشيدة
كلما سار مدبرجا لنا بعده ادبر = كملوهن وخلوا شعبنا عالحديدة
سع عصيد ابن قيران حن عصدها وسبر = وآخر الشي رجع قيران ياكل عصيده
هو وبنت الحشود في الحال الأيمن والأيسر= هي تقل ياسعيد كل قال كلي ياسعيدة
للمشايخ وللقادات من بيت الاحمر = كل مسئول ياكلها ويوصي وليده
قد فتح خزنة الدولة ومن جر له جر = عطلوها وخلوها فريدة وحيدة
للشفر والهمر والبنز والجمس الاخضر = والجيوب والصوالين والقصور المشيدة
وظف اولادهم من عند الاكبر والاصغر = هو برتبة عقيد وامه برتبة عقيده
لا تقدم ولا الشعب اليماني تطور= رغم طول الولاية والسنين المديدة
لكن الآن لاقد شعبنا صدق وقرر = ما يحنه ولا يشتيه ولا عد يريده
فالفرص باتجي حول وبدل وغير = رشح اهل العقول الراجحة والسديدة
والختام الصلاة تغشى الطهور المطهر =خاتم المرسلين حامي حماة العقيدة

اخي نمر الحالة هذة قصيدة الشاعر الكبير الاصلاحي
مجيب الرحمن غنيم
وهو من اشد المنتقدين لاسلوب السلطة فى التعاطى للامور عامة

ما علي هو علي ماهو قد افعل وسبر = قد صنع قد ترك ضحى ضحايا عديدة

قصيده جميله جدا وشكرا اخوي
(نمر الحاله)

قصيده رائعه والله ومنشوره بالجوالت
وتسلم اخي على النقل