¤؛° الجزء العشرون °؛¤
في صالة بيت ناصر السالم
ناصر: ومتى عزمتوا تنتقلون؟؟
سعد: على الاثاث و الديكورات بس يعني كلها اسبوعين و تفتك منا يا بو مبارك..
ناصر: رمستك البايخة هذي انا ما راح ارد عليها ..
فهد: هههههههههه يعني انت ما تعرفه هذا ... لسانه يطول اذانه
سعد: هههههه افااا الحينه انا اخوكم الصغير بدل ما تديرون بالكم عليّ و تهتمون فيني
ناصر: شو هالرمسة بعد .. حاسب نفسك ياهل تبي يدلعونك حظرتك.. انت لو اعرست جان ولدك طولك ... اعرس وخل مرتك تدللك ...
الجدة حصة: علامكم على ولدي ... شوي شوي عليه كليتوه فديته هو ما قال شي ...
سعد: يا ربي الللي عنده هالغرشوبة و هالجوهرة المكنونة بالله عليكم يفكر يعرس وإلا يطالع غيرها ؟؟ ... و يقوم و يبوس امه على راسها ...
الجدة: فديتني صج انك اتميلق ... لكن حريمتك بهالزمن تلاقي شراتي ...
وحظر شما ومعاها البشكارة حاملين العصير و الكيك و الحلاو للجماعة ..
سعد: لحقي يا مرت اخوي ... قعدت خليني اسولف لج من شوي العيوز شو كان ترمس عنك....
شما و تجلس يم الجدة: فديتها عموه شقالت عني ...
سعد: قولي شو ماقالت ..
الجدة حصة: سعودو شقلت انا؟؟
سعد: امي تقول ان شما هب نفس حرمات اول و لو شو ما تسوي ما تصيريين شراتها ...
شما: يحق لها تقول اللي تقوله .. وهذا صحيح انا وين اوصل لها لو اتعلم طول الدهر تحت يدينها ...
الجدة حصة: فديييييتج غناتي ... ايا الجذاب الحينه انا قلت جي ...
ناصر: يالفتيني لكن تستاهل ما جاك ..
سعد: هههههه لا انا بس كنت ابي اختبر ام احمد بس شنو بيكون ردها ... عشان اثبت لكم انها حرمة اوخويه ماكو شراتها ... لا اهي ولا الله يرحمها حمدة ...
الجميع: الله يرحمها برحمته
فهد: انت من يقدر عليك وعلى لسانك ... على طول يرمي درر و لو يطيح في شنو يطلع نفسه مثل الشعرة من العجين...
سعد: ههههههههه .. إلا اقول لكم الاميرة ديانا وينها؟؟
الجدة حصة: منهي ؟؟؟
سعد: فطيييييم بعد منو .. والله هالبنت تعجبني صراحة هههههههه
شما: وعليا عليها بنتي .. والله زين انك قلت انها تعجبك ...
سعد: بنتج يا مرت اخوي شايفة نفسها صحيح و لكنها ما تنزل نفسها لحد لو منو يكون و مع هذا تحترم الكبير و تقدره بس لو تخفف شوي من غرورها ...لكن انا تعجبني قوة شخصيتها ...
شما: فديتها بنتي
الجدة حصة: بس لا تسمعك عاد.. وش يفكنا منها بعدين لو تسمع هالرمسة .. احنا الحين ومانروم نرمسها...
فهد: هههههههه ,, صايرة شخصيتها مختلفة عن ربابة و مرايم
ناصر: مادري ليش هالبنت طالعة جذي ... مع اني معلمنهم على التواضع و لقول الآية الكريمة( ولا تمش في الأرض مرحا إنك لن تخرق الأرض ولن تبلغ الجبال طولا) ...
شما: هذي شوية غرور و فترة مراهقة تمر فيها البنت .. وهي مب متعاليةعلى الناس و تنظر لهم بنظرة استصغار .. لكن فيها كبرياء زايد و ان شاء الله تكبر و تتبدل اطباعها ...
الجدة حصة:الله يسمع منج يا بنتي ...
فهد: يــمـه بويه وينه اليوم للحين ما رد من المزرعة؟؟
الجدة حصة: لا يمه للحينه ما رجع ... هو من يروح المزعة ينسى نفسه ..
سعد: انتي يا العيوز بعد من تروحين هناك ودج ما تيين ... حشى بدو تحبون ريحة الخرفان والبعارين ههههههههه ....
الجدة حصة: مو عاجبينك البدو يا ولد سالم .. عنلاتك زادً .. الشرف و الفخر لنا و اللي ما يعجبه يشرب من المالح وانا امك ... إن كان دمك صار الماني هذا بكيفك تروح دور لك على حظر منهم ...
سعد: ههههه امييييييي ما قلت شي إلا ارمس بس .. انا وين احصل لي ام بهالحنان غاوية يام فهد ... وين القى لي عائلة مثلكم تعزني وترزني بين العربان ... وين الاقي اخوان مثلكم سند لي .. و عيال خوان اكثر من اخوان و الاصدقاء بالنسبة لي ... وين القى لي دار تسوى دار زايد الخير يا يمه ...
الجدة حصة: خسك الله بجيتني ويا هالرمسة .. عسى الله يعزك و ويخليك لخوانك و يخلي اخوانك لك و يفرحني فيك و يبلغني و اشوف اعيالك يراكضون من جدامي ...
الجميع: آمــــــين يا رب العالمين
ناصر: اقول شما .. مرايم ما ردت لج او قالت لج شنو جوابها و ردها على ولد الناس؟..
شما: للحينه تفكر و هاليومين عندها امتحانات و عشان كذا آنا ما فاتحتها بالموضوع ...
ودخل الجد سالم بهالوقت
سالم ( بوفهد): مرحبااااا الساع عيالي
الجميع: مرحيا مليون ..
وتوايهو اعياله مع ابوهم
بوفهد: الله يخليكم لي يا عيالي ولا يحرمني منكم .. عسى الله دوم يجمعكم و لا يفرقكم .. عساني اشوفكم طول حياتي و من بعد عيني متعاونين و على قلب واحد .. عسى الله لا يخليني منكم.. ابيكم دوم مجتمعين و تمنيت اخوكم راشد معاكم الحينه بعد .... و دمعت عيونه..!
فهد: الله لا يحرمنا منك يا بويه .. دموعك غالية علينا يالغالي ...
الجدة حصة: شبلاك بوفهد تبجي .. مو من عادتك دموعك تنزل بسرعة جي ..
بوفهد: هيـــــه يا ام فهد .. غدر الزمن ... لما العيال تجحد و قلبها يقسى على بعض .. و على اللي يرمون من تعب معاهم و كبرهم و علمهم و رباهم و صرف عليهم دم قلبه و عطاهم من حنانه بلا حدود ...
ناصر: شصاير يبه .. تكلم عن منو؟
بوفهد: اتكلم عن بو خليفة ... عياله عقب كل اللي سواه لهم .. رموه في دار للعجزة ... و اقصد بكلمة رموه انه رموه ... (وكان بوفهد متضايق و يتكلم من حرقة قلب وواصل كلامة بعد ما مسح دمعة كانت على وشك انها تطيح من عينه) ... شفته وهو قاعد منعزل بروحه في زاوية في دار ماهي داره .. بدل بيته الواسع اللي كان لام عياله فيه ... اللي بناه عشان يضمهم كلهم تحت سقف واحد .. لكنهم باعوه .. بااعوا بيت عمره اللي بناه عشانهم و عشانه يعيش بقية حياته وسطهم ... تعذروا بزوجاتهم و اولادهم و اعمالهم و قالوا انهم محتاجين لفلوس البيت اكثر من البيت .. هدموا حلم و حطموا قلبه ببيعته .. وفوق هذا ما كفاهم ... ودوه على قولتهم احسن دار رعاية في الامارات .. لكنهم قطووه ... 7 شباب كل واحد يقول الزود عندي .. اتركوا ابوهم في غرفه في دار في مكان ما حد يعرفه ولا احد منهم زاره و بدون ما يقولون لحد ... كان قاعد ساكت .. ما يتكلم و كاتم حسرته في قلبه وساكت .. هزتني دمعته لما شافني .. هي دمعة فرح و إلا دمعة حزن و إلا دمعة حسرة على عياله .. حتى واهو باللي فيه مو هاين عليه يمسكم ولا بكلمة.....!
شما: خسهم الله من عيال اللي يجازون ابوهم هالجزاة ... الله وصى بالبوالدين و رضا الله من رضاهم .. وينهم من عقاب رب العالمين و حوبته ...
بوفهد: انا ساير ارقد شوي .. تعباان و اريد ارتاح .. حسبنا الله و نعم الوكيل
وسار بوفهد عنهم
سعد: انا اول مرة اجوف حالة بويه النفسية جذي ...
ناصر: بوخليفة بالذات رفيج عمره و صاحب الوالد من قبل لا ننولد احنا في هالدنيا ... و عشان جي هو متأثر وايد على حالة بوخليفة اكثر من فعل اولاده الله يجازيهم ...
فهد: الدنيا دوارة و ربك يمهل ولا يهمل ... قول الله يهديهم وانا خوك ...
ناصر: الله يهديهم و الله لا يغير علينا ان شاء الله ...
------------------
بعد ساعات الجدة و الجد، حصة و سالم في غرفتهم ... الجدة حصة تعدل في الكبت و بوفهد منسدح عالسرير و يطالع السقف ووسرحان و على وجهه علامات الضيق و الكدر ...
الجد سالم: تهقين بيي علينا يوم يا حصة و يصير حالنا مثل حال بو خليفة؟؟
انتبهت الجدة حصة لرمسة بو فهدو قامت قعدت حذاله: فال الله ولا فالك يا بو فهد ... شو هالرمسة ؟!!
سالم: خايف يا حصة ... خايف يجور الزمن و تنقلب الموازين ....
الجدة حصة: انا واثقة من عيالي ومن تربيتنا لهم .. و الناس معادن .. وعيالنا يا سالم ذهب اصلي ما يتغير و لا يحلي .. و الماس ما يتأثر و لا يتغير و يظل على اطباعه بكل الظروف .. هذي تربيتنا يا سالم .. هذول عيالنا سهر ليالي .. احنا ما طلعنا بهالدنيا إلا من هالاربعة العيال عسى الله يحفظهم و يبعد عنهم عيال السوء و يجعل لهم الخير وين ما يروحون ... انت من زمان وانت تقول لي عن بوخليفة و عياله .. تقول انه رباهم على الدلال و االاعتماد عليه و أي شي يبونه يحصلونه لو شو كان ... و الرباية على كبر ما تنفع .. مو بعد ما ابتعدوا عنه و كل واحد استقل بروحه بغى يلمهم و يجمعهم تحت سقف واحد .. شي ما تعودوا عليه انهم يكونون مع بعض .. تعودوا يكونون اخوان بس بالمناسبات ... لكنهم مو على قلب واحد .. لكن احنا يا بو فهد ربيناهم و غرسنا فيهم حب بعض و فهمناهم و رضعناهم ان بدون الأخوان مالهم عزوة و شان ... و لا تخلي تأثرك باللي سووه عيال بوخليفة ينسيك تربيتك و يهز ثقتك فيهم ... و اصباعك مو سوا ...
الجد سالم: آآآه يا حصة .. كلامج مثل البلسم ... الله لا يخليني منج و عسى يومي بل يومج ..
الجدة حصة: اجوف قمت تخورها بعد .. شو يومي و يومك ... بلا هالرمسة بعدنها بعز شبابنا لو ما عيالك عنلاتهم سووني يدة من وقت بس ..
الجد سالم: ههههههههههههههه .. هيه صحيح .. هههههههههههههههههههههههه
الجدة حصة: هههه أي جي اضحك مو تعومس لي ويهك ... يا حلاة هالسنون المتكسرين والله ...
الجد سالم: ههههههه يا حلاة طقم اسنانج الجدد كأنهم لولو هههههههههههههه
الجدة حصة: من يوم يومهم لولو ... و الحينه ركبت لي ضرسين سويتني حاطة لي طقم .. هيه طلع اشاعات و قول لسعود بعد خله يستلمني و يتطنز علي هو بروحه يبي الاشارة ...
الجد سالم: افااا يا ام فهد اللي يتطنز عليش اطز له عيونه الثنتين ... انا ما اروح على زعل الغوالي ...
الجدة حصة:هيه هيه قول بعد .. يا ويل حالي من الكلام الحلو اللي ما يطلع إلا في السنة مرة ....
الجد سالم: ههههههههه خلص مب قايل اخاف يغمى عليج ما اروم اشيلج لحالي و اخاف عيالج يبشلوني و يتهموني مسوي فيج جريمة ...
الجدة حصة: ههههههههه ... الله لا يحرمني منك يا بو عيالي
الجد سالم:الله لا يحرمني منج يالغلا ... يا ذهب اصلي
****************************
الخميس العصر في غرفة رباب ومعاها بدرية و فطيم و عندهم البومات صور يطالعونها ... فيها عمامهم و الأهل كلهم و في بعضها صور حديثة و صور قديمة من ايام طفولتهم ...
رباب: واي طالعي صورة عمي راشد هههههههه شعره شلون جكس ..
بدرية: اييييي هذي اول موضة عندهم لا...
فطيم: انتوا جوفوا صورة خالي فهد .. هههههه كان متين و كرشه شلون ههههههههه
بدرية: يالله عاد لا اتطعبزون على ابوي ...
رباب: هههه لا هذي صج صورة انتيكة ابوي و عمي سعد على الخيل .. هههههه طالعوا شلون عمي سعد خايف و شكله يضحك ... ههههههههه
بدرية: ههههههههه .. هذي صورة مالت اللعام يوم عيد الضحى .. وايد حلوة ...
فطيم: هذي بعد كاهي نفسها ...
رباب: انا عندي لكم فكرة ...
فطيم و بدرية: ووشو هي ؟؟
رباب: نقول لشمس تسكنر الصور و تشتغل عليهم بالبرامج و الفوتوشوب و هالسوالف و تلصق صور عمامي و ابوي ويدي كلهم مع بعض في صورة وحدة حتى عمي سعد لأنه م اكان موجود معنانا السنة اللي طافت و تسوي عليهم ديزاين حلو و بعدين نطبعها على ورقة كبيرة مثل ورق التصوير و نفاجأهم فيها و اكيييد بيستغربون منها لأنهم ما صوروها و بعدها نعلقها في وسط الصالة والكل يشوفها ....
فطيم: والله تعرفين تفكرين بعد
بدرية: فكرة حلوة مرّة ربابة ...عاد انا ابي نسخة منها بعد عشان نحطها في بيتنا إذا انتقلنا
رباب:اوكي يالله عيل نسير نقول لشمس تسويها و نخلي هذا سر بيينا لحد ما تكتمل السالفة ...
وراحوا لشمس و خبروها باللي يبون و وافقت و اوعدتهم ان الصورة قريب تجهز
يوم السبت بعد صلاة الظهر
مرايم راجعة فرحانة من الجامعة كملت امتحانات المنتصف وامتحانها كان سهل << بالنسبة لها طبعا دافورة هههههههههههه
لما دخلت البيت كانت فطيم في الحديقة لابسة شيلتهاوحاطتها على كتفها بس و تتمشى ....
مرايم: فطييييييم شحالج اختيه ؟
فطيم: مانشكي باس .. شحالج انتي
مرايم: بخير يسرج الحال .. كملت امتحاناتي و الفرحة مش سيعاني على قولة اخوانا المصريين ..هههههه
فطيم: ههههههه زين عقبالي ما اكمل مدرسة بعد و ادخل الجامعة ياربي مابي إلا طب ...
مرايم: الله ينولج اللي في بالج ... تعالي شعندج بالحديقة يالرومانسية و حاملة وردة بإيدج بعد ...
فطيم: عن الملل شوي قلت اتمشى و شفت هالوردة توها مفتحة عجبتني و شلتها معاي ...
وهالوقت يدخل البيت شاب و معاه ريال عيوز ... لما شافهم وقف شوي و نزل راسه .. بعدها انتبهت فطيم انها مو حاطة الشيلة على راسها و راحت داخل البيت ... اما مرايم فكانت لابسة ماعدا انها ما كانت متغشية ...<< لو يدري فيج مبارك يا مرايم ... و حطت شيلتها شوية على فمها ....
الشاب: السلام عليكم الشيخة
مريم: و عليكم السلام الشيخ
الشاب: لو سمحتي بو فهد موجود
مريم: هيه حياكم الميلس الحينه يجيكم ...
وراحت مرايم تنادي الشيبة يدها .. و بعد ساعة من الزمن خرج الضيفان و راح بوفهد الصالة وكانت شما و مريم و شمس وفطيم و الجدة حصة جالسين ....
الجد سالم: البشارة يا ام فهد .. صج الدنيا بخير و صج كلامج ان الناس مو سوا ..
الجدة حصة: بشرك الله بالخير .. شصاير؟؟؟؟......
الجد سالم: تدرين منو الحينه لفاني .... بو خليفة يا حصة هو ما غيره
الجدة حصة: لا لا قرة عينك ... شلون جي لكن؟
الجد سالم: هذا اصغر عياله مصطفى ماهان عليه ظلم اخوانه لأبوهم و طلع ابوه من دار العجزة و سكنه معاه و بنى له ديوانيه بعد و انا ساير بعد شوي رايح لهم ...
الجدة حصة: تصحبك السلامة يا بو فهد ... لكن مو هذا ولد مرته صفية الله يرحمها ؟
الجد سالم: هي هذا هو .. الله يرحمها عياله من زوجته الأولى ولا حبوها مع انها قامت فيهم .. هذا لو اخذها و امهم للحين عايشة شسووا فيها ...
الجدة حصة: الله يرحمها كانت حرمة سنعة و اصل طيب ... وكاهو الدليل ولدها الوحيد اللي وقف مع ابوه ضد ظلم اخوانه ...
الجد سالم: طيب ياللا انا ساير .. تامرون شي
الكل : سلامتك
شما: اللي يشوف عمي الحين ما يشوفه وهو يقول لنا عن اللي سووه في بوخليفة ..
الجدة حصة: هيه والله كنت احاتيه .. الحمد لله .. والله يحرس مصطفى لشبابه و يوفقه على ما سواه ...
وهالوقت نزلت بدرية و رباب من على الدري و حاملين الصورة مبروزة و مغطاة عشان ما تنعرف شو هذي ...
و هالوقت دخلوا العمام كلهم في وقت واحد مع بعض .. حتى ان الكل تفاجأ من هالشي ...
ناصر: يبه رباب شصاير متصلة فينا تبينا الحين الحين ؟؟؟؟......
رباب :انتوا تفضلوا قعدوا و الحين افهمكم؟
سعد: شو هذا اللي بيدج فجيه راااااويني اشوف..
رباب: لا تستعيل الحين اراويكم كلكم ... وين يدي ؟؟.
ووصل الجد و كان جاهز و متعطر و ريحته الحلوة منتشرة بكل المكان
فهد: يـــه يــه يبه شالكشخة والله جنك معرس هههههه
سعد: لحقي يا العيوز الشيبة رايح يخطب ..
الجدة حصة: خله يروح الشرع محلل له اربع
الجد سالم: صج والله حصيص ؟؟؟ يعني يصير اروح اتزوج 3 الحين
الجدة حصة: الله واكبر عليك تبي الشارة يعني ؟؟
ناصر: راحت عليج يا أم فهد .. ترى صراحة ابوي ما يتفوت اكيد بتوافق عليه أي حرمة يتقدم لها
الجدة حصة: اصلاً انا واثقة منه مستحيل يسويها ...
مبارك: الله يالوااااااااثقة
سعد بشويش: امحق ثقة ؟؟
الجد سالم: انت ما تيوز عن امك يعني ...
سعد: خلاص انا استسلم .. يالله قولوا لنا ليش طالبينا نيي الحينه
بدرية: احنا طلبناكم عشان نراويكم هالمفاجأة
وازاحوا الستار عن اللوحة و كانت كبيرة نسيباً و التصميم رائع و المنظر جميل .. صورة تضم الأب و الأم و واقفين من خلفهم عيالهم الاربعة كل واحد بأبتسامة جميلة و مزينة بأطار مذهب ... اندهش الكل من الصورة لجمالها المعنوي و جمالها التصويري و مبارك و احمد كانوا يصفرون و الكل يمدح هذا الابداع و قالوا لهم سر هالصورة و شلون انعملت ...
رباب: طبعا احنا اصحاب الفكرة
شما: لكن من طبقعا ابدع فيها
فطيم: وانا خترت الاطار و اشتركنا في ثمنه
مريم: لكن صراحة ابداع و فكرة جهنمية
مبارك: بس طبعا ما يسوي هالشي الحلو إلا انسان حلو مثله
احمرت شمس خجلاً و احراجاً: تسلم ولد العم من ذوقك
الجد سالم: ما قال شي من قدرج يا بنتي .. صراحة صـ .. راحــ ـة ..
ووتكلمت عنه دموعه .. دموع فرح خرجت من قلب مسرور ... قلب عاد إليه الأمل و عادت البسمة لترتسم على شفاهه ... و كانت هذه اللحظة من أجمل اللحظات التي عاشتها هذه العائلة ........
******************
نفس هذا اليوم السعيد ... المغرب ...
مبارك يطرق باب مريم ..<< لماذا>>> ليسلمها اوراقها .. اليوم شافه محمد و سلمه اياهم ...
مبارك: هذي اوراقج و آخر مرة تطلبين شي من الريال .. اذا اخذتي اخوه تنجازين وياه لأنكم بتصيرون اهل .. لكن قبل لا توافقين او بعد ما ترفضين تحملي تطلبين مني هالطلب لأني ما راح البيه لج ..
مرايم كانت تسمع اخوها و تهز راسها بالموافقة .. وبنفس الوقت اضطرابات معوية و آلام تجتاحها.. و تريده يخلص من كلامه بسرعة و يطلع ...
طلع مبارك من الغرفة و على طول سكرت الباب وراه و اخذتهم و قعدت عالسرير و سمت بإسم الله و وقلبها مو ثابت مكانه يصعد و ينزل و مو قادرة تتلم نفسها ....
انفتح الكتاب .. كانت تقرأ ... أغضمت عينيها و القت بنفسها على السرير .. دمعة نزلت من عينيها .. لم تمسحها بل جعلتها تنزل وترطب خدها لتعس ببرودتها .. وعلى وجهها إبتسامه غريبة .. حضنت الكتاب بكل قوتها و نامت ... نامت لتحلم .. او ربما نامت لتعرف انها لا تحلم ... استيقظت من نومها .. و لم ترضى ان يمضي اليوم من غير ان تخبر اهلها بجوابها على طلب عبدالرحمن ....
راحت مرايم تبحث عن شما .. و لقتها في المطبخ مع البشكارة مينا >> للحين سعد من يشوفها يطفر بها بسبة اسمها
مرايم: مرحباا الساع أم احلى احمد
شما: مرحبا مليون و لايسدن في ذمتيه .. شحالج الغلا
مرايم: ما نشكي باس .. وانتي
شما: الحمد لله يسرج الحال
مرايم: اقول شما .. بغيتج في سالفة اذا ممكن بس تتركين اللي في يدج ثواني ..
شما:خير اميـه .. شبلاج؟
مرايم: بس بغيت اقول لج على ردي بطلب ام عبدالرحمن
شما: بشري يا بنتي شو جوابج؟
مرايم: خبريهم اني ما افكر الحين بالعرس .. ابي اكمل دراستي اول و بعدها يصير خير .. وانا ما ابي اربط ولد الناس معاي و يشوف نصيبه بعيد عنا ...
شما: هذا قرارج يا بنتي و ماحد يقدر يغصبج عليه ...لكن اتمنى انج تكونين فكرتي زين و ترى اذا جا النصيب ما تنمنعه لا دراسة و جامعة ...
مرايم: هذا قراري يا خالتي و اتمنى تبلغون الجماعة و ما نطول عليها اكثر من كذا ..
شما: و إذا قالوا ان الولد شاريج و يبي ينطرج لحد ما تخلصين دراسة .. او ان قال يبي بس تملجون ...
مرايم: انا ما ابي ...
شما: لا حول ولا قوة إلا بالله .. على راحتج بنتي .. راح اخبر ابوج بقرارج و لما يأذن لي راح اخبرهم ...
مرايم: على خير ... تصبحين على خير
شما: وانتي من اهله
رجعت مريم لغرفتها و هي مرتاحة و تحس ان هم و انزاح عنها ... راحت لتقرأ مرة اخرى ما كتبت و ما كتب .. وهذه المرأة سنقرأ معها ....
**الكتاب صفحة 52 **
يخالجني شعوراً بداخلي من شهوراً .. اريد منك حلاً او تفسيرا مريحا ..
أأخوك اقبل بالزواج به .. ام ان اخوه بالقلب اولى إن طلبا ...
بردٍ بسيطا و بحرفين او ثلاثة .. إما نعم او لا سيكون جوابكَ ...
هل تتركني من غير جواب ... اتتركني وردة ظمأ لقطرة ماء ...
تتركني نسمة حيرى بدون سماء ...اتتركني كوجه الليل دون ضياء...
لا أريد منك ان تستصغرني .. و اعلم انها خطوة جريئة ...
في جوابك تحديد مستقبلي .. و لردك انا منتظرة ...
ورده ..
لقد كبرتي في نظرني .. فأنت ما رضيتي ان ترتبطي بأخي و انتي تفكرين بأخيه ... بينما انا كنت افكر كيف سأتعايش مع هذا الوضع بعد ان تتزوجوا ... احببتك و اقولها صراحة احـبـك .. كيف ومتى لا اعرف ولكني اريدك لي وحدي .. هل ستنتظريني يا مريم .. لن استطيع ان اتقدم لك إلا بعد ان ابني شخصي .. ابني محمد الذي يستحق مرايم و بجدارة ..
من احب الله و احبه
محمد
ونامت و هي بغاية السرور .. كانت خائفة من رد محمد و من انه يردها .. كان خايفة مناللي سوته .. كانت تحس انه غلط و ما كانت تدري شتكتب ... كانت حاسة انها خانت اخوها وثقة اهلها .. ولكنها كانت تبي ترتاح .. مو معقولة تحدد مصيرها مع انسان و اهي تفكر بأخوه ... و ماتدري اذا كان اللي تفكر فيه يفكر فيها .. إذا كان يبيها و إلا لا .. و الحين ارتاحت .. ما تدري شنو الخطوة الجاية .. لكنها على الاقل خطت هالخطوة و عرفت و حدد اللي تبيه و انه يبيها .. وما اجمل العشور حين يحس الانسان بأن من يحبه يبادله نفس الشعور ...
……
ترى ماذا سيكون رد فعل عبدالرحمن و محمد و عايلته؟؟
شنو سالفة مصطفى ولد بو خليفةو هل ستنتهي علاقته بالقصة؟
مريم و محمد ماذا سيحدث لهم وماهو مصيرهم؟؟؟