عرض مشاركة واحدة
قديم 10-26-2008, 12:51 AM   #7
مشرفة
 
الصورة الرمزية عاشقه من بعيد
 
تاريخ التسجيل: Feb 2008
الدولة: المملكة العربيه السعودية
المشاركات: 4,705
معدل تقييم المستوى: 110
عاشقه من بعيد has much to be proud ofعاشقه من بعيد has much to be proud ofعاشقه من بعيد has much to be proud ofعاشقه من بعيد has much to be proud ofعاشقه من بعيد has much to be proud ofعاشقه من بعيد has much to be proud ofعاشقه من بعيد has much to be proud ofعاشقه من بعيد has much to be proud ofعاشقه من بعيد has much to be proud of
افتراضي

¤؛° الجزء السادس عشر °؛¤
في بيت ناصر السالم ...
مرايم كانت بغرفتها تذاكر .. فرغت من المذاكرة و قامت تشخبط وتكتب شوية نثر على خواطر .. وقامت تسولف مع نفسها ...
مرايم: انا مبدعة والله .. امممم .. ليش ما اجمع كل الشعر اللي كتبته مع بعض في دفتر خواطر
مرايم: عداااال يا بنت السالم لا تفتحين لج ديوان
مرايم: ليش واللي يكتبون احسن عني ؟؟ انا بعد عندي اسلووب و كلمات حلوة ما تنعاب
مرايم: انتي هب فاضية للشعر و ابحاره خلج في دراستج ابرك لج
مرايم: وانا شو بسوي يعني .. وقت اللي اكون فيه فاضية مثل الحين اكتب و اجمع كل للي كتبته من قبل في دفتر واحد ..
مرايم: ههههههههههههه والله انج خبلة و تكلمين نفسج
واخذت لها دفتر رائع لونه وردي و غلافه فيه ازهار وورود مجففة بشكل ناعم وحلو وخصصته لجمع شخبطاتها >> كما تسميه هي ....
مبارك كان راكب الدري وشمس كانت نازلة رايحة غرفه ابوها تحت... شافها مبارك و سلم عليها
مبارك: مرحبا الساع بنت العم
شمس: مرحبا مليون و لايسدن في ذمتيه
مبارك: شحالج ان شاء الله بخير؟
شمس: الحمد لله نشقح .. وانت شحالك
مبارك: بخير يسرج الحال ... و الدراسة شلونها معك؟؟
شمس: الدراسة حلوة و خصوصا اني راغبة بهالمجال بس بعد تدري يبي لها مذاكرة و تطبيق اول بأول..
مبارك: الله يوفقج ان شاء الله ... اقول بنت العم
شمس: سم؟
مبارك: راح ترجعون بوظبي ؟؟
شمس: لا .. ابوي يقول راح نشتري بيت في العين و نسكن يمكم هنا
مبارك مستانس ووده يتنطاط بس تمالك نفسه و شق الحلج
مبارك: صج والله؟ زين تسوون خلكم قريبين ... قصدي يعني هناك بعاد .. هنا كل الأهل بالعين
شمس: هيه بويه بعد يقول جي ... وعشان احنا بعد دراستنا هنا وعمي سعد راح يستقر معنا ..
مبارك: الله يلم شملنا كلنا ويقربنا من بعض.. يا ليت بعد عمي راشد هو كمان يجي هنا ..
شمس: يا ريت ان شاء الله .. انا استأذن بروح لأبوي
مبارك: اذنج معك...
ونزلت شمس من على الدري و قبل ان تدخل غرفه ابوها ناداها مبارك
مبارك: شمس...
شمس: نعم مبارك في شي ؟؟
مبارك يقول في خاطره ما احلى اسمي يوم نطقتي به مادري به بهالحلاة
مبارك: اذا احجتي شي .. أي شي في الدراسة او غيره انا جاهز
ابتسمت له شمس : مشكور و لد العم ما تقصر ..
يا ويل حالك يا مبارك.. – مبارك يرمس مع حاله - ... شو هالابتسامة اللي تذوب الجليد.. وتخلي الارض تهتز.. والقلب يطيح.. مبارك .. برووووووك... علامك انت ... هذه بنت عمك؟!!.. وانت ما فيك هالحركات.. اصح يا انا ... ما ادري شصايدني .. من اشوفها افرح .. من اشوفها اتفاءل .. اشوف الدنيا حلوة .. اشوف الدنيا كلها صباح و الشمس تنورها ... يعني اعترف و اقولها صراحة ... انا احبها !.. هل انا على خطأ.. ما يصير احب؟ ليش ؟... انا ما سويت شي غلط .. ومن شفتها اعجبت فيها وبأخلاقها وكبرياءها.. و انا ما بلعب بمشاعرها .. ابيها على سنة الله.. وين يا وولد بومبارك .. انت للحين تدرس وابوك اللي يصرف عليك .. وشو فيها احيرها و انا ولد عمها و ليمن اشتغل يصير خير ...
وكان للحين واقف على الدري و يطالع باب غرفة عمه وين ما اختفت الشمس ...
رباب و بدرية كانو نازلين و شافوه ...
رباب: خير خويه اشفيك واقف هنا
مبارك: بسم الله .. من وين طلعتي لي انتي
رباب: ليييييش جايف جني قدامك ... الحين انا نازلة من الدري ما حسيت عليّ .. اللي واخذ عقليك يا خوي يتهنا به ... هههههههههههه
مبارك: اقول فارقي وعطينا عرض مقفاج .. انا لو ما هالبدر واقف معاج كان لي تصرف ثاني
ضحكت بدرية عليهم: هههه تسلم ولد العم
رباب تطالعهم بنص عين: انا بنسحب بكرامتي احسن لي يالله بدور نمشي عن هالحالم الولهان .
مبارك متفاجأ: ربابوو شو هالرمسة بعد ..شو ولهان ما ولهان
رباب: انا ما قلت شي.. سلامتك بس شوف حالك وانت فاتح ثمك وواقف جنك مسّبه وهب في حاله ..
مبارك: شووو قلتي .. انا شو .. عيديها دخيلج ما سمعتج زين
رباب تلاحقت على عمرها لا يسوي فيها شي و توها بتنزل على الدري يودها مبارك من شعرها ..
رباب: أآآآآي بروووووووك يعور هدني
مبارك: قولي اسمي عدل و اعتذري لي و بعدين افكر
رباب: خلص توووبة ما اعيدها .. شعري آآآه يا يمه
واجت شما و ترك مبارك شعر اخته ...
شما: خير خير .. شصاير ليش الصراخ
رباب: يمه زين لحقتي عليه جان انا الحين صرت في خبر كان
شما: ليش يام السانين شصاير؟
رباب: الله يسامحج الغالية .. هذا مبارك طقني طق و شال شعري و صارخ علي وو
قاطعتها شما: يام شليخ ... صج يا مبارك؟
مبارك استحى شوي من شما: لا خالتي بس ربيّب نرفزتي وشديت شعرها وهي فبركت بقية السالفة
بدرية: انا لازم اكون شاهدة حق .. رباب اهي اللي بدت
رباب افلصت بدرية في يدها: انا كاشفة روحي بروحي لأن مبارك مستحيل يسوي لي جي.. وانتي ليييييش تنصبين نفسج شاهدة حق ومااحد طلب شهادتج يالطويلة ..
شما: رباب .. يكفي .. يمه مبارك.. بغيت شوية اغراض من السوبرماركت و الدريول مادري وينه .. بس لو توديني انا والبشكارة ...
مبارك: حاظر خالتي تامرين من عيووووني ... (ويطالع رباب عشان تحتر)
شما: تسلم ياولدي .. اليوم بتيينا ام عبدالرحمن اخت صاحبك متصلة لي من شوي
مبارك: خير ان شاء الله !؟..
شما: خير زيارة عادية تقول وحشناها و جاية تزورنا .. و احنا على اتصال من يوم الحادث الله لا يعيده .. و الحرمة اصيلة
مبارك: الله لا يعيده .. هذا من طيب اصلج
المغرب اجت ام عبدالرحمن لبيت بومبارك و استقبلتها شما بالترحيب .. وتبادلو مختلف الاحاديث >> التي لا يخلوها العقرة و القيل و القال ...
ام عبدالرحمن(وسمية): إلا وين البنيات نسلم عليهم
شما: الحين بينزلون .. خبرج المدارس و الجامعات زحمة المذاكرة
وسمية: هيه والله اشوف العيال وعليا هالكين روحهم م نالمذاكر و خصوصا محمد آخر سنة له بالجامعة..
شما: الله يخليهم لج .. و سارة شلونها .. عندها بنت اهي لا؟
وسمية: ايوه الهنوف والحينه عمرها سنتين
شما: ما شاء الله .. الزمن يجري و العيال يكبرونا
وسمية:ههه وخصوصا البنيات يعرسن من وقت و يسوونه جدات
شما: صدقتي ياوخيتي .. لحظة بس ازقر البنات يسلمن
قالت شما للبشكارة مينا تناديهم واجو كلهم ( مرايم، شمس، فطيم،رباب و بدرية) يسلمون على ام عبدالرحمن..
وجلست مرايم يم ام عبدالرحمن ...
وسمية : شلونج حبيبتي مريم و شخبار الدراسة معاج
مرايم: الحمد لله خالتي بخير يسرج الحال
وسمية: يحليلج كبرتي و صرتي عروس << شوفو مكر النسوان
مرايم استحت: مشكورة خالتي .. ماحد يظل صغير طول عمره
وسمية : الله يخليك و يكبر عقلج يا بنتي و يرزقش بولد الحلال اللي يستاهلج
احمر وجه مرايم عالآخر وصارت مو قادرة تستحمل تقعد اكثر ولا قادرة تتنفس
وسمية: شخبار ابوج بنيتي شمس ان شاء الله تحسن حاله؟
شمس: الحمد لله بخير و حالته تحسنت وايد
مرايم تقول بخاطرها.. حبيبتي انتي شمس و الله شرايش نبدل الأماكن
وسمية: تدرسين انكليزي مريم مو؟
مرايم: هيه خالتي ادب انكليزي
وسمية: نفس تخصص ولدي محمد
مرايم .. يا ويل حالها البنية عزة الله راحت فيها
مرايم: هيه خالتي .. وانا اشكره لأنه مرة ساعدني في درس كان صعب و اخوي مبارك ياب لي الشرح من عنده ...
وسمية مستغربة لأنها ما كانت تدري : ما شاء الله .. ولدي ما يقصر ريال و طول عمره ينشد فيه الظهر .. كل عيالي من اكبرهم عبدالرحمن عسى عيني ما تبجيه لأصغرهم
مرايم: الله يخليهم لج خالتي
وتناظروا البنات و استأذنو عشان يطلعون و يخلون شما مع الضيفة
وسمية: عيني عليهم باردة ادب وجمال واخلاق
شما: تسلمين الغلا
وسمية: اقول ام احمد ..مريم محيرة لحد او احد متكلم عليها ؟؟
شما: لا يام عبدالرحمن ..ليش سامعة شي؟
وسمية: ابد رايتكم بيضة .. بس اسأل عشان اجوف اذا لنا نصيب معاكم او لا ...
شما: هذي الساعة المباركة ام عبدالرحمن
وسمية: ولدي نوى يعرس واحنا ما بنحصل احسن عنكم .. فقلت اني اسأل اول اذا كانت البنت خالية او لا قبل لا افاتح الولد و إلا انتو ما عليكم كلام و الشهادة لله طيب واصل ...
شما: على بركة الله ان شاء الله ... انتي كلمي ولدج و اذا لنا نصيب معاكم الله يتمم على خير و انا عني ما بفاتح البنت ...
وسمية: مشكورة حبيبتي .. يالله اترخص
شما: بعدها وقت ما شبعنا منج
وسمية: الايام جاية ان شا ءالله .. والدور عليج الحين تردين الزيارة
شما: ما يصير خاطرج إلا طيب

في بيت بو عبدالرحمن كان قاعد ويا عياله في الصالة ... (بوعبدالرحمن وعبدالرحمن ومحمد وعلي واخوهم الأصغر ماجد كان جالس معاهم بس تركهم وراح لربعه وهو طالع شاف امه سلم عليه وطلع)
وصلت ام عبدالرحمن و دخلت عليهم الصالة سلمت و جلست معاهم و عطت البشكارة عباتها توديها ..
وسمية كانت فرحانة و شاقه الحلج و كلهم ينطرونها اتكلم و تفتح الموضوع لكنها ساكتة .. العيال يدرون ان امهم رايحة تشوف عروس عبدالرحمن اللي بتخطبها له بس اهم ما يدرون من تكون ...
عبدالرحمن: ها يمه بشري؟
وسمية: ابشر بشنو؟
عبدالرحمن احس بخيبة امل: يمـــه... شنو صار مع البنت اللي رحتي تشوفينها ..
وسمية: ما صار شي
بو عبدالرحمن: وسمية العاد الولد تلفت اعصابه قولي لينا شصار؟
وسمية: البنت قمر ماشي على الارض... ادب و اخلاق و ذوق و ذرابة ... عايلة محترمة و بنت اصول ... اسمها ما في احلى منه على اسم الوالدة الله يرحمها ..
عبدالرحمن شق الحلج: صج يمه .. من بنته؟
محمد: اسمها مريم مرت اخوي عيل ... ايوااااااا ايواااااا ... (ومحمد يقول بخاطره ياويل حالي على هالاسم وراي وراي )
وسمية: هيه مرايم ... بنت ناصر السالم ...
علي: اخت مبارك رفيجي !!
محمد وكأنه لم يسمع جيداً .. وكان احد صب عليه ماي بارد.. تسمر في مكانة وتجمدت ملامح وجهه ..
وسمية: هيه يا ولدي بنت ولا كل البنات .. تدرس بالجامعة ادب انكليزي نفس اخوك محمد.. صج محمد تقول ان اهي مرة قالت تبي شرح مادري وشو واخوها اخذ من عندك اوراق وعطاها..
محمد: ها .. هيه .. مرة من جم اسبوع .. قال لي ان وحدة من خواته عندها اسئلة وتبي شرح وانا عطيته
وسمية: البنت ذكية وعاجل.. حتى ان مجموعها كان يدخلها طب لكنها قالت تبي تدرس انكليزي..
عبدالرحمن: ما شاء الله عليها ... متى نروح نخطبها ؟ومتى نبلج؟ ومتي نعرس؟
وسمية: صبر شوي لا تستعيل .. شفيك مو كل شي مرة وحدة .. وانا بس مهدت لها .. وهذا الكلام يتفاهمون فيه الرياييل بعد ما توافق يصير خير.. واكيد بتوافق وين تلقى مثلك نظر عيني..
علي: الله .. مباررررك بيصير النسيب عيل
محمد: مبروك منك المال ومنها العيال ... انا ساير انام تعبان شوي .. بخاطركم شي
عبدالرحمن وعلي حسوا ان اخوهم فيه شي خصوصا ان كان قاعد معاهم مستانس وما يشكي باس
عبدالرحمن: ما تشوف شر يا خوي .. وعقبالك الغالي
محمد: تسلم ..
وابتسم لهم ابتسامة سرعان ما اختفت ...وراح غرفته
دخل محمد غرفته كان النور مطفي .. ما شغله و قفل الغرفة و انسدح على سريره و تنهد تنهيدة كبيرررة ... آآه يا محمد ... مرايم بتصير حرمة اخوك .. بتكون جنبك لكن ملك لغيرك ... محمد: زين وش فيها الله يكتب لهم السعادة مع بعض
محمد: بس انت كنت تبيها و كنت تفكر فيها
محمد: تفكر فيها .. يعني يمكن تاخذها و يمكن لأ ..
محمد: بس انا من اول يوم شفتها حبيتها .. والله ان ملامحها ما فارقت خيالي
محمد: زمن الحب من اول نظرة ولى و راح يا دنجوان .. الحين لازم تشيل هالتفكير من راسك باجر بتصير حرمة اخوك و عيب عليك تنظر لها بغير نظرة الأخوة..
آآآه يا قلبي ... الحين يوم فقدتها قمت تفكر فيها و نطقت انك تبيها ... آه يالقدر وماياخذها احد غير اخوي عبدالرحمن .. وانا اللي كنت خايف ان علي ياخذها مني ... ليش يا يمــه ليش ...

¤؛° الجزء السابع عشر °؛¤
في بيت بو مبارك ..
شما كانت في الصالة و توها مسكرة التلفون و الفرحة و الابتسامة شاقة الحلج ... إلا بومبارك ومعاه اخوه فهد و سعد هاليين عليها ..
فهد: مرحبا الساع ام احمد شحالج ؟
شما: مرحبا مليون و لا يسدن في ذممتيه
سعد: مرحبا ام احلى احمد شلونج؟
شما: بخير يسرك الحال
بومبارك : ها شفيش مستانسة اونج
شما: هيه و الله .. فرحانة مرّة ... بنتك مريم جايينها خطاب
بومبارك تفاجأ : والله ؟ .. ومنهو هذيلا
شما: الحينه اتصلت فيني ام عبدالرحمن تقول لي انهم طالبينها لولدها عبدالرحمن العود.. بيت السرحان اونك نسيتهم ..
بومبارك: لا شلون انساهم .. ناس اياويد و ما عليهم كلام بس انا الولد ما اعرفه ولازم اسأل عنه
فهد: الحب يطلع على بذره .. ودام انه من اصل طيب ان شاء الله هو بعد يطلع على اهله
سعد: مبرررررروك مبروك يا بومبارك ههههههههه بتصير جد
بومبارك: ههههههه ... تبي تحرني يعني وتقول اني شيبت شاب راسك ..
سعد: هههه تفهمها و اهي طايرة طالع على اخوك وانا اخوك .ههههههه..
شما: اقول للبنت واشاورها لو انت بتقول لها او ننطر شوية على ما تسأل على الولد ؟؟
بومبارك: لا صبري شوية .. ابي اسأل عن الولد اول و اقول لأخوها مبارك لأنه اخو ربيعه و اكيد يعرفه وبعدها نشاور البنت و ناخذ رايها ...
شما: خير عيل .. انا استأذن
سعد: اذنج معااج مرت اخوي ... بس لو تخلين البشكارة تسوي لي عصير مانجو بااارد و تكثر السكر بليز ...
شما: ههههههه .. على امرك الحينه مينا تجيبه لك
بومبارك: بليس ياخذك قول آمين ... ليش انت ما تطلب من البشكارة بنفسك ..
سعد: افا يا بو مبارك .. شفيها اذا طلبت من مرت اخوي و انا ادري بها تحبني و تستحمل غلاستي ..
فهد: انت ما تكبر ... كل ما كبرت خف عقلك و حتى الغربة ما ادبتك شوي ..
بومبارك: أي غربة اللي تأدبه ... إلا تزززززيده و انا خوك
سعد: يـــــه!! .. زين الحين انا شقايل عشان كل هذا .. موقايل شي ... خلص ما نبي عصير ولا ابي شي .. اروح اتحوط بسيارتي اليديدة احسن لي من مجابلكم يالشواب ..ههههههههههااااي
بومبارك: طالع هذا ... الحينه تعب زوجتي و تخليها تعبل على عمرها وتسويه لك و آخرتها تروح اتحوط
فهد: ههههههههه
سعد: والله احترت معاكم.. (وجلس على الكرسي وحط ريل على ريل.. وقال) هذي قعدة ومانبقايم لحد ما اشرب العصير و اطفر بكم و تطردوني من بيتكم ...
فهد: اسمع ولا تعطلنا ... تشرب العصير و تقوم معانا ندور لنا على بيتٍ زين
سعد: وانا شكو يا خوي .. انا واثق من ذوقكم و انتو تعرفون لهالسواف اكثر مني ... انتو شوفو و اتفقوا و اشتروا و انا معاكم بأي شي تختارونه ...
اجت البشكارة و حاملة صينية فيها 3 كاسات عصير و حطتها على الطاولة جدام سعد و كانوا اخوانه واقفين و جلسوا معاه يشربون العصير ..
مينا: تبون شي بأد كير ...
سعد: انتي شسمج يالحلوة
مينا: اسمي مينا ياكاموتو
سعد تفدع من الضحك: هههههههههههههههههههههههه شنو ... عيدي هههههههه حلفت عليج تعيدين اسمج .ههههههههههههههه
فهد: سعد و بعدها معاك انت شفيك اليوم جنك إلا شارب
سعد: هههههههههههه شارب لو لحية هههههههههههه
مينا: انا يروح يبي شي ازكر ويجي ،،،،،، (ومشت عنهم)
بومبارك: مسكينة احرجتها و هي ما تدري شالسالفة
سعد: ههههههههه .. ياخوي الله يهداك تقول اسمها مينا.. جان سموها ميناء و اكملت ... ولا ابوها.. يـــاكـــامــوتــو ... هههههههههههه موتتني من الضحك ام العيون المسموته هذي ...
فهد: هههههههههه ... أي انت خب ما تجوف شي ما تعلق عليه ..
بومبارك: هيه بعد تعود على غراشيب المانيا و الوجه الحسن ...
سعد:ههههه ...مهما كانو غراشييب لكن انا ما يترس عيني إلا المها العربي البدوي الأصيل ..
فهد: والله ما ينعرف لك انت
سعد: هههههه ذكرتي بنكتة سمعتها وانا بألمانيا من واحد سعودي ... يقول لك بدويه تريد تقلد ماريا مرسديس سمت نفسها وضحه بيكاب .. ههههههههههههههه
بومبارك و فهد: هههههههههههههههه .. الله يقطع بليسك
سعد:ههههههههههههه ... الحينة بس انا اللي قلت ابي عصير ليش يسوون لكم انتو بعد ..
بومبارك: قم بس قم عن الهذرة خلنا نروح نشوف شغلنا ...
**********************
بالجامعة
علي و مبارك كانو توهم طالعين من المحاظرة
مبارك: والله هالدكتور تحفة
علي: ههههه .. على حافة قبره الله يستر ما يطب علينا مرة وحدة
مبارك: ههههههههه أي والله
علي: اقول ما خبروك البيت شي ما شيات ؟
مبارك: البيت؟؟؟ لأ .. ليش شصاير
علي: الله يسلمك اخوي عبدالرحمن عزم يعرس ... و امي اخطبت له اختك
مبارك بتفاجأ: لا لا ... زززين عيل بنصير نسايب ...غريبة ماحد ياب لي طاري
علي: يمكن توهم امس كلموا الأهل
مبارك: الله يتمم بخير .. هههههههه .. حيا الله النسيب
علي: يحيك ... هههههههههههههههه
مبارك: بس عاد ياخوي بقول لك شي ... ترى خبرك الحريم ناقصات عقل.. يعني لو باجر ما يصير نصيب اتمنى ان هالشي ما يأثر على صداقتنا ..
علي: ابشر وانا خوك .. الزواج قسمة و نصيب .. وهذي حياتهم و احنا مالنا شغل واللي فيه الخير الله يقدمه ان شاء الله ...
مبارك: يسلم لي رفيجي العاجل طالع عليّ والله ..
علي: ههههههااااااي .. إلا انت طالع عليّ ... تراك ماخذ في نفسك مقلب ترى
مبارك: ههههههههه ... اقول وين محمد اليوم ما بين .. عادته اذا خلص هاليوم يمرنا ...
علي: مادري شفيه اليوم يقول تعبان و اظاهر مرضان وما راح الجامعة ..
مبارك: ما يشوف شر سلم لي عليه
علي: يوصل يالنسيب
مبارك: هههههههههههه ..امحق نسيب ...
*******************
المغرب كان مبارك توه بيدخل البيت و ابوه و يدّه راجعين من المسيد...وايه مبارك ابوه و يده وحبهم على راسهم ...
الجد سالم: ربي يحفظك يا ولدي و يوفقك و يبعد عنك عيال السوء ان شاء الله
مبارك: الله لا يخليني منك و من هالدعوة يا يدي ..
بومبارك: مبارك ابيك انا و يدك في موضوع مهم تعال داخل البيت ..
مبارك: ان شاء الله يبه ..
ودخلوا البيت وكانت شمس و مريم و شما جالسين بالصالة و يتابعون التلفزيون سلموا عليهم و راحو للميلس ..
شمس تدري بالسالفة من ابوها ومن شما .. والوحيدة اللي ما تدري اهي مريم
مريم: خالتي شما شصاير؟؟
شما: مو صاير شي ... ليش ؟
مريم: ابد اشوف ابوي و جدي واخوي مبارك مع بعض و سايرين للميلس !!...
شما: ماشي يا بنتي .. يمكن عندهم موضوع مع بعض
شمس: ليه هالفضول ؟؟ هههههههههههه
مريم: لا فضول ولا شي .. وانتي ليش تضحكين جيف وش قايلة انا ..
شمس: ولا شي حبيبتي سلامتج ... بس في لقطة من المسلسل ضحكتني
مريم: لا والله .. انا بعد اتابعه معاج ما اجوف فيه شي يضحك
شما: غريبة مع ان حتى انا ضحكتني هاللقطة .. هههههههههه
مريم: عنبو انا معاكم اتابع .. أي لقطة هذي اللي تضحك؟؟!!
شما وشمس: ههههههههههههههههههههههه
مريم: انتو تبون تيننوني ... لايكون صاير شي بس انا آخر من يعلم ؟؟
شما: شصاير يعني ؟
مريم: شدراني عنكم
في داخل الميلس
مبارك: خير يبه ؟؟
ناصر بابتسامة: سلامتك يا ولدي .. بس اختك مرايم جايها خطاب
مبارك كان اسلوبه عادي وما تفاجأ :و النعم فيهم يا يبه
ناصر: جنك إلا تدري بالسالفة
مبارك: هيه و الله .. اليوم علي قال لي و خبرني ...
الجد سالم: وانت شتقول فيهم و شنو رايك؟
مبارك: ناس طيبة ومحترمة و حشيم وما عندهم سوالف بطالية...
ناصر: والولد انت تعرفه ؟
مبارك: اعرفه معرفة سطحية لكن من خلال المرات القليلة اللي شفته اقول عنه انه ريال ينشد فيه الظهر
ناصر: شتعرف عنه ؟
مبارك: هو عنده شهادة جامعية اعتقد انه عنده بكالريوس الدراسات التجارية ماخذها من الهند ويشتغل رئيس قسم المحاسبة في شركة خاصة ...
ناصر: والنعم فيه ... انا بعد سألت عنه و الكل مدح فيه وفي اخلاقه و عيلته ناس اياويد ..
الجد سالم:على بركة الله عيل .. الحينه عليكم تشاورون البنت
ناصر: مااعتقد البنت بترفضه .. ريال ومابه شي ينعاب
الجد سالم: رايها اهو الأهم .. ولا تحاول تجبر بنتك على شي اذا ما رضت
ناصر: من متى وانا اجبر اعيالي على شي يا بوفهد ... ولكن ما يصير خاطرك إلا طيب .. اللي بتقوله اهو اللي بنعتمده ... انا بقول لشما تفاتحها بالموضوع
الجد سالم: على بركة الرحمن...

وطلعوا من الميلس وكانوا يسولفون و متونسين ... ولما شاف مبارك مريم و شمس قاعدين لحالهم راح وقعد معاهم ...
مبارك وهو يغمز بعينه: شلونج مرايم
مريم متفاجأة من هالغمزة: بخير يعلك الخير
مبارك: شحالج شمس؟
شمس: بخير الحمد لله
مريم: اقول مبارك شنو سر هالاجتماع ؟؟
يات شما و هي فرحانة لكنها تحاول تخبي هالشي ...
شما: تعالي معاي مريم ابيج ؟
مريم: لحظة شوي بس اسأل مبارك
شما: انتي تعالي وانا اقول لج
وقامت مريم مطاعة و راحت لها و صعدو فوق لغرفة مرايم عشان يتكلمون براحتهم
مبارك: عقبالج شمس
احمر وجه شمس : مشكور .. عقبالك انت بعد
مبارك: ان شاء لله يا رب .. بس اتخرج اول وبعدها على طووول
شمس: ههههههه .. مستعيل على العرس
مبارك: لا مستعيل على العروس
شمس: العروس؟؟
مبارك: هيه ...ما ابيها تضيع مني و احد ياخذها قبلي ...
شمس: يعني انت تدري من اهي العروس ؟؟ قصدي في حد في بالك؟
مبارك : هيه فيه .. وانتي تعرفينها .. وابيج تسألينها اذا قلبها يبيني مثل ما ابيها
شمس احست بارتباك: ممكن اعرف من اهي ؟؟ عشان اسألها
مبارك: انتي يا شمس
وكأنها صاعقة على شمس .. تفاجأت ما كانت تتوقع ابداً ان يطلب منها مبارك هذا الشي بيوم من الأيام ..بعكس مبارك اللي اعجب فيها من دخلت هالبيت .. و حبها من الخاطر و تمناها ...
مبارك: شفيج ساكته؟
شمس: متفاجأة من كلامك .. وو صراحتك
مبارك: ابي اسمع رد منج .. حتى لو رد مبدأي
شمس: مبارك ... انا طول عمري اعتبرك مثل اخوي ... اخو عزيز و غالي .. وعمري ما فكرت فيك كزوج او أي صورة ثانية ... وانا ما افكر إلا بدراستي حاليا
احبط مبارك .. ولكنه اعطى لنفسه امل
مبارك: شمس ... انا اعزج .. لكن مو معزة الأخ لأخته اكثر يا بنت عمي ... وانا ما بعتبر هذا رد نهائي ..خصوصا اني للحين مو مستعد لهذي الخطوة .. و ان شاء الله مع الأيام يتغير رايج ..واكون اكثر من اخ بالنسبة لج ...
شمس وهي قايمة من الكرسي: كله قسمه و نصيب ... انت تريد و انا اريد و الله يفعل ما يريد .. اللي مقسوم لنا لازم نتقبله يا ولد عمي .. واللي مكتوب اهو اللي بيصير ..
وابتسمت له ابتسامه خفيفة لكنها ما ريحته
ليش يا شمس.. كنت احسب انج تحبيبني .. او على الأقل معجبة فيني .. لكن مو كأخو .. شفيك انت يا مبارك.. خسارة عليك والله عقلك طار .. طيرته و بخرته هالشمس ...البنت يمكن استحت واهي هي مب مالت هالسوالف ... اهي يمكن تبي تكمل دراستها اول وبعدين تفكر في هالارتباط ... الله يجعلج من نصيبي يــــارب آمين ..
شما: سمعيني يا بنتي .. وانتي تعرفين ان طول عمري وانا اعتبرج مثل بنتي واختي االصغيرة ومصلحتج تهمني قبل كل شي
مريم: اكيد يا خالتي انا عارفة هالشي
شما: اليوم .. اتصلت فيني ام عبدالرحمن .. تخطبج لولدها
توردت خدود مريم متفاجأة و فكرت على طول بمحمد .. و ابتسمت ابتسامحة خجولة و نزلت راسها
شما: انتي تعرفينهم .. وتعرفين ام عبدالرحمن ناس ما عليهم كلام
مريم: والنعم فيهم
شما: وش قلتي
مريم: ومنو اللي متقدم لي من عيالها ؟
شما: ولدها الكبير عبدالرحمن
تفاجأت مريم و تغيرت ملامحها : اسمه عبدالرحمن؟
شما: هههههههه أي هذا اسمه .. ولد الكل يمدح فيه ... يشتغل محاسب في شركة و وو
كانت شما تتكلم و مريم تسمع واهي ساكتة و كانت ملامحها لا تبين أي تعابير ... وكأنها كانت سرحانة و لا تدري اذا احد يتكلم او لا
شما: ها شقلتي ؟
مريم: مادري
شما: نقول لهم ما تدرين؟ ههههههه
مريم: قصدي ابي افكر اول
شما: على راحتج .. فكري و صلي استخارة و اللي تقولينه اهو اللي بيصير
وتركتها شما و خلتها في الغرفة بروحها ...
مريم كانت على السرير تفكر ... عبدالرحمن ... اهو شعرفه فيني .. اكيد امه اللي اخطبتني له.. بس ليش مو محمد ..لكن عبدالرحمن اهو الكبير و لاانسى ان محمد للحين يدرس ... وانتي تقولين شعرفه فيج .. انزين محمد بعد شعرفه فيج .. وش يفرق محمد او اخوه ... اثنينهم ما تعرفينهم .. وعبدالرحمن اهو اللي يبيج واللي بتصيرين حرمته ... انا صج ما اعرف محمد .. لكن عندي احساس اني اهو اللي ابيه.. يا بنت الناس شنو اللي تبينه ... من وين ياتج هالافكار.. عشان مرة ساعدج في درس؟ ... مادري ... بس انا اذا اطري اسمه احس بآآلام الدنيا كلها في معدتي ... واذا احد يذكره يشدني اني اسمع اخباره ... اذكري الله يا مريوم وفكري في عبدالرحمن و انسي محمد هذا .. واللي مكتوب لج اهو اللي بيصير ...
بعد يومين ...
على الريوق الصبح .. العايلة لكها تفطر مع بعض ماعدا مبارك اللي يصحى من الصبح يروح يتمشى و يسوي تمارين رياضية و بعدها يفطر ....
كانت مريم سرحانة و الكل لاحظ هالشي ... صاير اكلها قليل وكله تفكر و في عالم ثاني ..
الجد سالم:حبيبتي مرايم علامج ما تاكلين
مريم: ها .. لا يدي بس شبعت
الجد سالم: وين شبعتي ما اكلتي شي .. حتى الشاهي ما شربيته ..
مريم: هههههه اسوي ريجيم يدي
الجدة حصة : هذا كلام بنات هالايام .. ما عندهم غير هالرجيم .. طالعي روحج صايرة جلد على عظم
شمس: مو هذا المطلوب يديدة .. هذي ستايل هالايام
الجدة حصة: وي شستايله بعد ... كل يوم عندكم كلمة جديدة
فطيم: يدتي يعني هذي موضة هالايام
الجدة حصة: أي المودا ...اي مو الشيخة فطيم اخبر بالمودا
رباب: هههههههههههه
بدرية: وانا اشهد .. صراحة فطيم دومه كاشخة
فطيم: ثانكس على الاطراء و بدون شهادتج انا ادري
الجدة حصة : اقول يمه فطيم رحم الله والديج يبي لي عصير عالمودا صوايا يدينج اشوف اذا من عندج يتغير طعمه و يصير اكشخ ؟
الكل : هههههههههههههههههههههههههههههههه
فطيم عصبت : الحمد لله ... اروح اذاكر لي شويه ابرك لي
الجدة حصة: الله يوفقج يمه ..
وقامت فطيم وحبت يدتها على راسها ..فطيم تحب يدتها وايد على الرغم من كل اللي تسويه فيها .. هههههه لكنها ما تقدر على زعل يدتها منها و اهي تدري انها تحبها ...
وهاللحظة دخل عليهم مبارك وسلم عليهم و راح يغسل و اهو رايح قال لمريم انه يبيها بعد ما تخلص ..
مريم: خير مبارك
مبارك: الخير بوجهك .. شنو قررتي الحين
مريم: عن شنو
مبارك: عن شنو يا مرايم بعد .. احنا نبيج تفكرين زين لأن هذا مستقبلج انتي و حياتج .. بس ابي اعرف لحد الآن وين وصلتي ؟..
مريم: ماادري ... ابي اكمل دراستي
مبارك: واهو يدري انج تدرسين و ماراح يمنعج من انج تواصلني الدراسة بعد الزواج
مريم: مادري
مبارك: شنو مادري مادري ...
مريم: مبارك والله مادري ...
مبارك: انتي عندج شي على الريال؟
مريم: ابد .. انا ما اعرفه اصلا .. وانتو كلكم تمدحون فيه ...
مبارك:مريم انتي اختي وانا اعرفج زين .. في حد في بالج؟
مريم ارتبكت من الداخل لكن مابان عليها : يعني شنو؟؟ عندي بوي فريند مثلا؟
مبارك: مو قصدي ... بس يمكن احد من صديقاتج او شي ماشيات
مريم: ما في احد في بالي ياخوي .. وإذا في احد في بالي و انا ابيه ماراح افكر في موضوع هالخطبة بالمولية و قلت لكم من زمان اني مب موافقة ..
ابتسم لها مبارك و مسك يدها: بس انا في وحدة في بالي و ابيها ..
مريم تفاجأت: صج؟ من هي سعيدة الحظ هذي؟
مبارك: بنت عمي شمس
تفاجأت مريم كانت تتمنى يقول لها ان اللي يبيها اهي الجازي بنت خالتها
مريم: شمس؟؟ يعني انت تحبها؟ واهي شنو؟
مبارك:اهي... انا قلت لها اني ابيها .. بس اهي تقول تفكر فيني كأخ وبس
مريم:والحين؟
مبارك: ولا شي ... انطر لحد ما اتخرج و بعدها يصير خير
مريم: واهي بتنتظرك ؟؟ شاللي يضمن انها ما تنخطب ؟
مبارك: لا تسدينها في ويهي يا مريم .. هذا اللي خايف منه و خصوصا انها ما عطتني جواب يريحني ...
مريم: مادري شقول لك ياخوي
مبارك: انا ابيج تسألينها .. انتو بنات مثل بعض و قراب من بعض ... واللي ماقالته لي يمكن تقوله لج ...
مريم: ان شاء الله ...
مبارك:وانتي بعد فكري ولا تعلقين الريال و تطولين عليه ... استخيري ربج و توكلي على الله ..
وقام مبارك بيطلع من غرفته ...
مريم: مبارك..
مبارك: لبيه ..
مريم: فيها شي اذا عطيتك ورقة وخليت اخو رفيجك يشرحها لي؟
مبارك:مادري صراحة ... يمكن فيها احراج اني اطلب منه هالشي قبل لا تردين عليهم جواب ..
مريم نزلت راسها : اوكي خلص عيل
مبارك ابتسم لها و راح ولمها و حبها على جبينها : هاتي اللي عندج وانا بقول لمحمد اذا يقدر ومنعا للاحراج بقول له بيني و بينه ... وهذي آخر مرة لج فاهمة يا بنت السالم
مريم بابتسامه امل وامتنان : مشكور يا خوي ... الله يخليك لي
......
ترى ماذا سيكون رد مريم؟؟ بتوافق و إلا لأ؟ وشنو راح يكون مبررها؟؟
شمس هل بيتغير شعورها اتجاه مبارك يوم من الأيام؟؟
شنو بيكون حال محمد اذا عطاه مبارك اوراق مرايم؟؟
__________________
[flash1=http://dc09.arabsh.com/i/01710/6kqc4vrlelow.swf]WIDTH=400 HEIGHT=350[/flash1]
عاشقه من بعيد غير متواجد حالياً   رد مع اقتباس