عرض مشاركة واحدة
قديم 10-21-2008, 11:01 PM   #6
مشرفة
 
الصورة الرمزية عاشقه من بعيد
 
تاريخ التسجيل: Feb 2008
الدولة: المملكة العربيه السعودية
المشاركات: 4,705
معدل تقييم المستوى: 110
عاشقه من بعيد has much to be proud ofعاشقه من بعيد has much to be proud ofعاشقه من بعيد has much to be proud ofعاشقه من بعيد has much to be proud ofعاشقه من بعيد has much to be proud ofعاشقه من بعيد has much to be proud ofعاشقه من بعيد has much to be proud ofعاشقه من بعيد has much to be proud ofعاشقه من بعيد has much to be proud of
افتراضي

¤؛° الجزء الثاني عشر °؛¤
ترخص أحمد من المستشفى .. ووجهه شويه متشوه من الزجاج المتكسر من الحادث و لكنهم سووا له 3 عمليات تجميل لحد ما رجع وجهه تقريبا مثل ماكان... الحمد لله صحته تحسنت وايد .

البنات وكلهم كانوا متجمعين بالصالة و معاهم احمد مجابل التلفزيون و بيده الريموت كونترول ويبدل في القنوات..
شما: يمه بعد شوي عن التلفزيون هب زين حق الحين ..
أحمد: عادي يمه انا متعود جذي و بعدين ابي استمتع شويه بالتلفزيون قبل المدارس بعدين ما شي وقت له...
رباب: انزين غير هالقناة و ودها لنا ارتينز الحينه بيحطون فلم اجنبي عجيييييييب..
أحمد: حبيبتي ربوبة فارجي بويهج و خليني اتابع على راحتي
رباب: يمــه شوفيه انا وبدرية انتريا هالفلم من اسبوع ..
شما: حمود خلهم يمه يشوفونه انت ما قاعد تطالع شي معين إلا تفرر بالقنوات بس ...
بدريه: صج والله حمود تكفى خلينا نطالع ..
شمس طالعت اختها بنظرة حاده عشان تسكت :بدور ..
مريم: اشفيج انتي عالبنت خليها تاخذ راحتها ..
شمس: آنا ما ابيها تتدخل بينهم.. وبعدين احمد توه طالع من المستشفى خلوه شويه على راحته
أحمد: يسلمووو بنت العم .. لكن صدقهم انا ما قاعد اطالع شي محدد.. ان جان على ربابة ما اطاوعها بس عشان بدور من عيووووني ..
الكل تفاجأ من رمسة احمد وما علقوا وقالو عادي هم شراة الخوان.. وحتى احمد ندم انه قال هالرمسة ..
بدري: تسلم ولد عمي .. مشكووور ادري بس تبي تغيض ربابي
احمد: هههههه .. هيه اجل من زينج تصدقين عمرج انتي بعد هههههههههه
وتضاحكوا كلهم و تابعوا التلفزيون

قربت الأجازة تخلص ماشي اسبوع وبيسيرون الجامعة وبيبدأ الدوام و التعب من يديد.. وبدأ دوام المدراس قبل الجامعات ..

اول يوم للبنات في الجامعة شلهم مبارك ووداهم وكان يوم شاق بالنسبة لهم ...
شمس صارت مع الجازي في اغلب الاقات والمحاظرات و صارو ربع بسرعة واخذوا على بعض..
مرايم حاطة بالها من البداية عالمذاكرة اول بأول لأن التخصص ما طلع سهل ويبي له تركيز ومتابعة ..

المغرب مرايم جالسة بالصالة و معاها كتبها ... شافها مبارك و راح لها سلم عليها و قعد يمها ..
مبارك: هلا و الله بالدافورة شهالعفسة و الكتب و القاموس و الترجمان و هالاوراق ؟؟!!
مريم و مبرطمة: شسوي طلع هب سهل و إذا ما اذاكر اول بأول و اتابع كل شي مع الاساتذة ما الحق ..
مبارك: خبري بج حالج حال الانكليز بلبل على قولة يدوه
مريم: هذاك اول في المدرسة او اذا اتكلم مع الهنود هب جي ..
مبارك: زين تبين مساعدة او شي ..
مريم: فديت الاخوان اللي مثلك انا .. هي عندي هذي قصة و ابي ترجمتها كلها وماذا يقصد الكاتب و شنو ..
سكتها مبارك: بس بس يبا ..
اخذ الكتاب وقام يقرا منه وقال: سمعيني يا اختي انا انصحج انج تغيرين هالتخصص و تدرسين فرنسي لأن ثقافتي فرنسية او اقول لج تدرسين هندي ونخلي كومار يترجم لج اللي تبين.. ههههههههههه
مريم: اتطنز علي حضرتك .. قم بس قم .
مبارك: هههاها.. ما اتطنز بس انتي تدرين ان لغتي الفرنسية اقوى من الانكليزي في المدرسة.. لكن عندي لج حل بس شتعطيني اول ..
مريم: ما بعطيك شي تبي تساعدني ببلاش او مشكور.. يعني ما اهون عليك تشوفني بهالحالة وبيدك شي و ما تساعدني
مبارك: افا يالريم .. زين انتي عطيني القصة و الاسئلة اللي تبينها و اراويج شغل اخوج ..
مريم بانفعال و فرح: صج صج .. زين شلون ؟ بتعطيها احد يترجمها يعني ..
مبارك: هي نعم .. بعطيها محمد اخو علي رفيجي يترجمها لج .. تخصصه انكليزي وسنة وبيتخرج و دافور ازود عنج بعد ..
مريم احست بشعور غريب و كأنها تريد ولا تريد
مريم: طيب يمكن يكون تعب عليه او ما يقدر او شي .. خبرك الجامعة
مبارك: انا بسأله اول و بقول له.. و إذا ما يقدر بيقول لي وانا ما بلزم عليه و لكني اعرفه ما بيقصر .
مريم: على راحتك .. انت اللي قلت .. بس عاد ابيهم ضروري هاليومين
مبارك: اتشرط بعد .. صج ما ينعطون ويه .. والله .....
ضحكت مريم و قام مبارك و طلع من البيت .. و جلست مريم لوحدها في الصالة مع الكتب سرحانه في اللا شي.. و انتبهت للكتاب اللي بيدينها و ان عليه شخابيط و رسوم و كتابات كثيرة واخذت تحاول مسحها ليكون الكتاب نظيف حين يأخذه *محمد* .. قالت اسمه بصعوبة وآلمتها معدتها ... واخذت تخاطب نفسها .. شفيج يا مرايم ليش كل هذا.. وسرعان ما انغمست مع الكتب مرة اخرى .



¤؛° الجزء الثالث عشر °؛¤
في القهوة اللي تعودو الشباب يتجمعون فيها .. كانو قاعدين كلهم لمة شباب و يسولفون عن فلان و علان .. " ترى حتى الشباب بعد يعقرون و يهذرون اكثر من البنات" ..
مروان: اقول شباب إلا وين مبارك ما نشوفه وايد ..
مروان شاب طايش 'ومغازلجي' و مبارك ما يحب صحبته وايد ..
رد عليه علي :بعد تدري الجامعة و مشاغلها بس اليوم الخميس و هو قال لي بيينا...
مبارك: السلااام عليكم
الجميع : وعليكم السلاااام
اسامة: صج انك ولد حلال
مبارك: ايالخام يعني كان عندك شك ..
اسامة: افا ينقطع الساني ... بس كنا في طاريك تونا
مبارك: وانا اقول اذوني تطن اثاريكم تتكلمون علي
علي: بالخير .. مروان كان يسأل عنك بس يقول ما يجوفك وايد تجينا هنا ...
مبارك: تسلم على سؤالك .. بس خبرك ما شي وقت للقهاوي نجي من الجامعة تعباننين نرتاح شوي المغرب و الليل قصير و ما شي وقت للهياتة..
مروان: المهم شعلومك الحبيب ...
مبارك: بخير و نعمة ... انت شخبارك
مروان: فووق النخل فووق
محمد: اكيد من سواد وجهك ..
مروان: عن الغلط الحينه انا شقلت .
علي: صلوا عالنبي شباب ما صار شي
محمد: انا آسف
مروان: ما يحتاج يالحبيب . انا اترخص مواعد صاحبي و تأخرت عليه
الكل : في امان الله
اسامة: شفيك محمد امسك لسانك شوي عاد ..
محمد: ما قدرت .. استغفر الله
مبارك: ليش بوجسوم شصاير بعد ؟..
محمد: شقول..الله يستر علينا بس .. من شوية بس متصلة عليه وحدة اظاهر بعد يديدة وقام ابتعد شوية يكلمها بالتلفون وخذ عاد من تبّوس و الكلام المايع ..
مبارك: استغفرك يا ربي .. هذا ما بيتوب إلا ليما يتزوج.. هو شلون يرضى على بنات الناس .. لو كانت وحدة من خواته بيرضى عليها !..
علي: لو كانت وحدة من خواته كان ذبحها ... تدري انه حاكم على خواته كلهم يتغشون حتى عن قرايبهم ..
اسامه: وانت شدراك
علي: ولد عمه رفيجي ..و معانا بالجامعة.. لو تشوفه تقول انهم اخوان و لكن سبحان الله الاخلاق غير بالمرة ..
مبارك: هيه والله..ولد عمه انسان ما في مثله يكفي بس اسمه ..
محمد: ليش شنو اسمه ؟؟
مبارك: اسمه مبارك على اسمي بعد شنو .... هههههههه
وضحك الجميع .... و على جنب كلم مبارك محمد
مبارك: اقول بوجسوم .. طالبنك طلب
محمد: تم يالغالي آمر ..
مبارك: تسلم وما يامر عليك عدو .. بس اختي .. تدرس ادب انكليزي مثلك يعني .. وعندها اشياء واسألة هب فاهمتها و تقول صعبه عليها ...
محمد: ما طلبت شي .. انت قول لي شنو تبي وانا حاضر لك ولها ...
مبارك: ما تقصر .. و ان شاء الله باجر اعطيك الاوراق وكل شي ..
واكمل الشباب سهرتهم

بعد منتصف الليل كان الفيلم توه منتهي و قامو البنات ينامون ...دخل مبارك و كانت مريم تصعد الدري ووقفت لما سمعت صوت الباب وكان مبارك ...
مبارك: هلا و الله الريم ليش للحين ما رقدتي
مريم: كاني كنت رايحة ... تامر على شي
مبارك: هي ابيج تجهزين لي الاوراق ومادري شو اللي قلتي هب فاهتهم و الاسئلة .. بكرة راح اعطيهم صاحبي .. قلت له وعرض خدماته ..
مريم: ان شاااء الله الشيخ مبارك .. تسلم ومشكور .. بكرة الصبح بيكونون جاهزين
مبارك: تصبحين على عقل انكليزي
مريم: تصبح على لاب توب هندي خخخخخخخخخ

في صباح اليوم الثاني استيقظ مبارك مبكرا كعادته و لقى اخته مرايم مزهبة كتبها و الاوراق وحاطتهم في كيس انيق بناتي ..

الظهر تلاقى مبارك مع محمد وعطاه وقال له اهي شنو تبي واي صفحة و شنو الاسئلة و كل شي ..

آخرالليل دخل محمد غرفته تعبان وميت نوم .. تمدد على السرير و هو فارد أياديه و ريوله عالسرير وطالع بالسقف وغمض عينه .. فجأة طار النوم من عينه و كأن تذكر شي مهم و قام من السرير.. راح و فتح الخزانة و طلع منه الكيس اللي اعطاه اياه مبارك ...

شاف فيه كتاب سنة اولى انكليزي ومعاه ورقة وفيها اسئلة عن الدرس وفيها رقم القصة.. وبخط حلو مكتوب على الورقة من فوق ((رقم صفحة القصة 84 ..مع الشكر )) ...

مباشرة راح لصفحة الكتاب و كانت عبارة عن قصة تذكرها اول ما قرا عنوانها ولكنه قراها عشان يسترجع ذاكرته و يشرحها على اصولها ... جاوب على الاسئلة وكل المطلوب وعقب ما انتهى سكر الكتاب ولكن لفت نطره المكتوب على صفحته الاولى اسمها.. مريم ناصر السالم ... يعني اسمها مريم .. يا حلوه هالاسم.. وحمل الكتاب في يده وراح على السرير و غمض عيونه وغطى وجهه بالكتاب.. وقال اااه يا محلا هالريحة .. طلع ريحة الكتاب عطر حلو مرّة و اخذ يشمه مرة اثنين و ثلاث لحد ما نام و ما صحى إلا الصبح على صوت المنبه ...
(اصبحنى و اصبح الملك لله) .. هذا اول ما نطق به محمد اول ما صحى من النوم .. وقام غسل وجهه وتيدد و صلى صلاة الصبح و استعد لروحة الجامعة ... و اليوم سبت و الدوام ثقيل و الواحد ما شبع نوم ..

مر محمد على علي في الجامعة وهو كان قصده مبارك بهالروحة ....
علي : هلا و الله بأخوي .. حيا الله هالطلة
محمد: هلا بيك .. شالترحيب ادري استاهل اكثر من جي بس شوي شوي علي
مبارك: هههههههه صجه مو كل يوم انت زايرنا
محمد: جزاتي يعني .. اليوم اسامة رد مبجر و خلاني لروحي قلت امركم و اذا مخلصين نرجع سوا او انتحوط في مكان او شي ما شيات ..
علي : ااييي و انا اقول االاخو زايرنا .. اثاريك جاي تتلزق فينا ليش ما معاك احد
محمد: الشره هب عليك .. الشره علي اللي رازك و مفتكر فيك عسب اسلم عليك
مبارك: افاااا كل شي و لا زعل بوجسوم عاد .. اذا ما تشيلك الجامعة بكبرها نشيلك بعيونا
محمد: تسسسسسلم لي والله .. تعلم من رفيجك شوي عاد
علي : هههههههه اصلا رفيجي متعلم مني ..
مبارك: أيواا ولكن عاد الطالب اللي تفوق على معلمه ههه
محمد: ههههههههههااااااي
علي: انزين يعني الحين قلبتوا علي ما عليه اردها لكم ..
محمد: خوك مبارك ترى جهزت اللي طلبته مني و معاي الحين بالسيارة ..
مبارك: ما شاء الله بهالسرعة ليش عبلت على عمرك هي هب مستعجلة عليهم ..
علي : شو هذا .. وشو السالفة ؟؟
محمد: ما شي سالفة .. (ووجه الكلام لمبارك) ..هو مو صعب و لأني اخذت هالمقرر من قبل و الدرس حلو فما اخذ مني وقت وايد خلصته البارح..
مبارك: تسلم ومشكور وما قصرت يالغالي
...
ترى ماذا سيحدث بعد ذلك ؟؟؟؟؟

¤؛° الجزء الرابع عشر °؛¤
في البيت مبارك شاف مريم و اعطاها الاوراق
مريم تشوف الكتاب و تتمعن في الكلام المكتوب.. والشرح الفنان .. و الخط الروعة..
ظلّت ذاك اليوم كله تذاكر الدرس و تحفظ كلماته وتتمعن باسلوبه .. اسلوب عجيب سحري سهل فهمه وسهل ثباته وحفظه بالمخ ... حست بمتعه وهي تقرا مرة و اثنين و ثلاث ...
ثاني يوم في الجامعة ... مريم كانت اول من وصل للمحاظرة بكل حماس.. وسألتهم الدكتورة إذا كانوا حظروا للدرس او قروه على الأقل.. بعضهم قال انه ما فهم منها شي وعرفوا المغزى .. واللي قال صعب .. و اللي قالت و اللي قالت ........
مريم طبعااا قالت ان الدرس حلو و سهل >>> كأن مب اهي اللي كانت محتاسة قبل ومب عارفة شي لهالدرس ... و اثناء الدرس والدكتورة تسأل مريم كانت اهي اكثر تفاعلا معاها وتجاوبها على اغلب الاسئلة اللي تسألها و الدكتورة كانت معجبة جدا بأجابات مرايم وحبتها من الخاطر .. وحتى انها شكّت فيها و سألتها ...
دكتورة نوال: والله اجاباتك حلوة و تدل على ذكاء يا مريم .!! قولي لي مريم انتي متأكدة انك ما حظرتي معاي هذا الدرس في سكشن ثاني ؟؟ قولي الصراحة صدقيني حتى لو حظرتي معاي وركز الدرس في مخج لهالدرجة انا بكون سعيدة Realy..
مريم: لا و الله دكتورة بس انا كنت هب فاهمة الدرس من البداية لما قلتي لنا نقراه بالبيت فطلبت المساعدة من شخص كان دارس هالمقرر من قبل وساعدني على فهمه و استيعاب الاشياء اللي كانت مبهمة بالنسبة لي ..
دكتورة نوال: Now I understand … و اظاهر انه كان طالب شاطر ومتميز بعد (وغمزت لها بعينها .!!!!(
مريم ابتسمت وما علقت و الدكتورة واصلت شرحها و كانت مريم بغاية البهجة و السرور
الظهر رجعت مريم من الجامعة مستانسة و فرحانة و شاقه الحلج لأن يومها كان كله حلو.. بدلت ملابسها و راحت لشمس غرفتها.. لأن شمس الحينه صار عندها غرفه منفصلة لحالها اهي وبدرية مع بعض.. شمس كانت جالسة عالكمبيوتر وفاجة المسنجر .. دخلت عليها مريم و سلمت و جلست على السرير فقامت شمس من المسنجر و قعدت يم مرايم ....
مريم: شلوووووونج شموس وحشتيني
شمس : هههههه.. لحقت اوحشج .. شكلج مستانسة مرّة
مريم: هييه يومي كله حلو من بدايته
شمس: عسااااه دوم ياااااا رب
مريم: تسلمين الغالية .. اقول شموس ان شاء الله مو معطلتج انا
شمس: لا ابد انا فاضية حتى المسنجر ما فيه احد اون لاين ..
مريم: اقول شموس سولفي لي عنج في المدرسة و عن رفيجاتج
شمس: انا خبرج يعني كنت من المتوفقين بالمدرسة و مدرساتي حبابات .. طبعا بعضهم هب كلهم.. عندي رفيجات وايد لكن اكثر وحدة رفيجتي شيخة الحين صار لنا 6 سنوات و احان ربع.. حتى اخوها يلعب قدم في المنتخب ... نادر الجواد .. اكيد تعرفينه
مريم: هيييييه اعرفه هداااااافنا هذا .. و الله شي خليها اجل تييب لي توقيعه هههههه
شمس: افا عليج تااااامريج ما يغلى عليج وانا امووون عليهم ..
مريم: تسلمين الغلا ... و الحين بالجامعة شنو اخبارج ويا الدراسة
شمس: تمام عاال العال .. الحينه الجازي هي اقرب وحدة لي من زميلاتنا
مريم: حبيبتي الجازي والله شلونها وحشتني القاطعة لا تسوي لي حتى ميس كول
شمس: ههههههه اعذريها التخصص هب سهل و هي ما شاء الله تحب المذاكرة اول بأول
قطع حديثهم جوال شمس .. واصلتها رسالة ... بعد ما قرتها ابتسمت و توردت خدودها
مريم: هااا شموس من عند منو المسج؟
شمس: الطيب عند طاريه .. هذي رفيجتي شووخ
مريم: يا حلوها والله ... زين عيل انا استأذن بروح ارتاح لي شوية و اذا اتصلتي لها سلمي لي عليها .. واذا شفتي الجازي قولي ليها تحت علينا ولو بمسج يالله باااااي ....
شمس : ههههه يوصل باي
عالشعا كانوا مجتمعين كلهم حول المائدة ..
مريم: مباااااارك حبيبي اشكر لي صاحبك واااايد على الشرح الفنان
مبارك: انا شكرته من زمان و خلص
مريم: لا اشكره شكرر خاص و قول له ان دكتورتنا تقول له انه طالب متميز
مبارك: ليش هي وش عرفها فيه؟
مريم: هي سألتني لما تفاجأت من شطارتي طبعا بفضل الشرح اللي عطاني اياه رفيجك فقلت لها اني حصلت مساعدة في الشرح و مدحت فيه
مبارك: زين يوصل .. سكتي شوية خليني اتعشى لا
بومبارك: انتي شفيج ؟؟ من رحتي الجامعة و اشوفج كله تهذرين و بس عمال على بطال ؟؟
مريم: ! ..Oh dadالحينة انا شقايلة .. خلص سكتنا
وحطت يدها على فمها لطريقة تضحك
كلهم تناقعوا عليها من الضحك
مبارك: اقول شمس شخبارج ويا الدراسة ؟
شمس: الحمد لله تمام
مبارك: ترى اذا محتاجة شي لا يردج إلا السانج تراني حاظر لأي شي هب فاهمته
شمس: ما تقصر يا ولد العم رايتك بيضة
في الجامعة ثاني يوم كانت الجازي و شمس و مجموعة بنات جالسين في ا لكفتيريا و ياكلون ويسولفون .. و كانت الجازي تسأل شمس عن كم شغلة في الدرس هب فاهمتهم.. قالت شمس ان ما تعرفه ..
شمس: مب مشكلة اذا ما عرفنا نسويه بنقول لمبارك يراوينا شلون وهو ما بيقصر
فجاة تغير وجه الجازي و لمعت عيونها و شمس لاحظت عليها هالشي و سألتها إذا فيها شي لكنها ردت ان معدتها توجعها شوية ...!
بدرية تصاااااارخ و تنااادي و هي نازلة من الدري حتى انها من سرعتها بغت تطيح .. وكانت تنااادي عمي.. ابوووووي ... وييييييييينكم .....
الكل سمع صوتها و طلعوا كلهم يستفسرون ...
شما: خير يمه اسم الله عليج شصاير؟؟
بدرية: ابويه.. بسرعة يالله نروح ... (وكانت تننفس بسررررعة)
شمس: اشفيج شتقولين.. اخذي نفس سكتي شوية و بعدين قولي شصاير
بدرية: عمي سعد اتصل معاه ابووووي!! يقولون وصلوا المطار و يوبن احد يروح ياخذهم ...
شمس: بدووور من صج تتكلمين ؟؟؟
الجد سالم: يالله ناصر نروح لهم بسررعة بووي
وطيرااان راح مبارك بسيارته معاه احمد و بومبارك في سيارته مع يدهم و راحوا المطار و كان استقبال حار تخللته دموع الفرح والمحبة و الاشتياق لطول الغياب ... وبعد ان ذهبوا الى البيت كان لقاء مؤثر بين فهد و بناته ...
فهد (بوبدر) كان على عكازات بس حالته تحسنت وايد و باقي له علاج طبيعي يقدر يكمله بالبلاد وبعضه يسويه بالبيت و يتحسن ويرجع مثل قبل... سعد عمهم الاصغير و آخر العنقود كان انسان مرح جدا وحباب لآخر درجة .. بالرغم من انه عاش سنوات وايد متغرب في المانيا للدراسة و لكنه لازال متمسك بتقالي بلده ... وسيم تقاسيمه خليجية و هيئته غربية ... عالمغرب البيت كان مليان وراشد اخوهم و عياله و الأهل القراب و البعاد و الجيران كلهم بالبيت وكانت ليلة حلوة .....
...
يا ترى هل رجوع سعد الى البلاد راح يغير من سير الاحداث؟؟
فهد هل بياخذ بناته و بيرجعون لبيتهم؟؟
يا ترى شنو قصة المسج اللي وصل لشمس من رفيجتها ؟؟ هل هي مسج عادية او ؟؟
مريم و محمد بتصير بينهم تطورات؟؟
¤؛° الجزء الخامس عشر °؛¤
بالليل.. في غرفة فهد اللي تجهزت له بالبيت تحت لأن ما يقدر يصعد الدري .. ابوهم قاعد معاهم و يسألهم عن اخبارهم واحوالهم ...
فهد بو بدر صحيح ان الله ما رزقه ببدر لكن عنده بناته بالدنيا كلها ... ويخاف عليهم حتى من نسمة الهوا..
فهد: حبيباتي وحشتوني مرّة
بدرية و تبوس ابوها: ربنا لا يحرمنا منك يالغالي و الحمد لله على رجعتك لنا بالسلامة
فهد: يسلمش ربي الغلا ... اقول بدور مو كأن حلويتي
بدرية: مو يوم يومي قمر اكيد طالعة على امي
فهد ابتسم ابتسامة حزينة لمحتها شمس: تسلمين شبيهة الغالية الله يرحمها
بدرية تلومت على نفسها و حتى طفرت الدمعة من عينها و لمها ابوها ومسح على راسها
فهد: بوي بدور عسى عيني ما تبجيج .. انا قلت لكم ما ابي اشوف الدموع في عينج إلا لما تكون دموع الفرح وانا ابوكم ..( و التفت لشمس اللي كانت منزلة راسها (
فهد: شموس حبيتي علامج ساكتة و منزلة راسج ؟؟
شمس: ولا شي يبه بس تذكرت الغالية ...
فهد : اطلب لها الرحمة يا بنتي و لا تنسوها من قراءة القرآن
شمس: هذا اكيد يا يبه.. (وخنقتها العبرة وقامت احضنت ابوها.. الدموع في عيونها وهي تكلم ابوها).. يبا لا تتركنا ما نقدر نعيش من دونك ... يبه وحشتنا مررّة ... يبه امي راحت وما بترجع.. يبه امي راحت انت لا تروح خليك معانا .. يبه حتى لو بتسافر خذنا معاك (وكملت بكاءها)
فهد: الله لا يخليني منكم ... بس عاد انا رجعت لكم الحين ما راح يفرقنا شي ان شاء الله .. يا يبوج توقعتج اقوى من جذي يا بنتي ...
شمس: يبه انا صج مع اهلي و بييت عمي و يعاملوني مثل بنتهم و اكثر .. لكن مهما كان عمر شما ما تقدر تملي غياب امي و لا عمي يعطيني حنانك ولا جدي يعوضني دلالك و لا يدتي تعوضني لمسة امي الحنونة ... ربي يشهد بحبهم لنا وحبي لهم لكن يبه انا ما حسيت اني غريبة بينهم .. لكني حسيت بالوحدة ..
قطع كلامهم دق على الباب .... وكــــان عمهم سـعـد ...... فتح له فهد الباب و دخل
سعد: هلا و الله ببنات اخوي شحالكم
شمس و بدرية: هلا عمي الحمد لله على السلامة
سعد: ربي يسلمكم.. (وقام يطالعهم).. اقول شموس ليش تبجين .. اييييي هذا انتو يالحريم كله تبجون و بس ...
فهد: هههههههههه عيزت و انا اسكتهم
سعد: بدور تعالي مني ..
بدرية : نعم عمي
وقعد يتمنظر فيها: انا خبري فيج لما كانت كشتج وش كبرها و قصييييييييرة ... متى صار شعرج حرريرر و صرتي هالطول يالطويلة
بدرية : هههههههههه بعد سبحان الله قعدت من النوم و صرت جذي
شمس: هههههههههههههههههه هذا اول ما كانت تمشط شعرها يا عمي لكن بعدين لما اوتعت على نفسها شوي قامت ما تخلي بلسم ولا كريم ما تستخدمه ..ههههههههههه.. اما على طول فكانت صغيرة و الحين كبرت ....
سعد: شنو شنو شنو ... لا تقولين لي عمي
شمس متفاجئة: هو ليش عمي فيه شي؟
سعد: ردت قالت عمي .. ليش شايفتني كبر ابوج انا.. بعد بدور ما عليه ياهل لكن انتي لا.. الفرق بيني و بينج جم سنة بس .... اممممم ما يصير بعد تقولين لي سعد بس ..قولي لي الدكتور سعد او عمي الدكتور .. شي جي
شمس : ان شاء الله عمي
سعد: hey u ? What's up... ردت قالت لي عمي حاف
شمس: Ok Doctor Last time ...
سعد: أي الحينه عدل ... بس مسموح لكم في الاعياد و المناسبات الرسمية تقول عمي ههااااااااااااي
فهد: عدااااااال عالبنت عاد يا سعد .
سعد: جيف انا شقايل الحينه ؟؟ اقول شموس تدرسين كمبيوتر لا؟
شمس: أيوه قسم برمجه ..
سعد: عفييييييييه ... اوووووه نسيتوني انا ليش ياي من الأصل ... طيب فهد الحينه شنو قررت
فهد: اعتقد ان الحين ما بقدر ارجع بوظبي خصوصا ان البنات في نص السنة ووراهم مدرسة والجامعة و صعب نقلهم الحينه في هالوقت ...
سعد: يعني راح تظل هني ؟ لأني راح اكون معاك وين ما تكون وانت تدري هني شما ام احمد وما اعتقد راح تاخذ راحتها واحنا موجودين
شمس: بالعكس خالتي شما انسانة طيبة مرّة و راح ترحب فيكم اكيد
فهد: السالفة مو جي يا بنتي .. بس بعد الحرمة تبي تاخذ راحتها في بيتها واحنا ما نبي نكون ثقل على عمج و اهل بيته ... و بعدين انا فكرت اني خلص راح استقر في العين ..
بدرية بفرحة : صج يبـــــه .. الله ونااااااسة جي بنكون قريبين منهم غير هناك بروحنا حتى خوالي ما نجوفهم وايد يزورونا في بوظبي على الاقل هني بيصير يم اهلنا و صراحة يبنا تعودنا عليهم ..
فهد: انا فكرت ابيع البيت في بوظبي و اخلي المزرعة و نشتري لنا بيت هني في العين .. شرايكم؟ شرايج شموس ليه ساكتة؟
شمس: سلامتك يبه الليي تشوفه سووه و احنا معاك وين ما تبي .. واحسن لدراستنا الحينه
سعد : زين عيل... بس عاد يا فهد تراني بدفع نص الجيمة للبيت
فهد: افا و انا خوك البيت بيتك بدون ما تدفع درهم واحد
سعد: تسلم الغالي بس انا ابي استقر خلص وما ابي اخذ لي بيت بروحي واحسن اني وحيد بين اهلي و في وطني.. باجر تصفي في البيت لحالك بعد ما يعرسن البنات و انا اصير لروحي
فهد: وش هالكلام يا سعد باجر يكون لك بيتك متروس من عيالك .. (ويناظر فهد اخوه بطرش عين ويقول له) .. و إلا شنو يا سعد مو ناوي تستقر في البلاد
سعد تلعثم شوي و قال بيغير الجو : انا ماااالي غير بلادي .. المهم الحين بنقول لناصر يساعدنا نشوف لنا بيت قريب منهم و عقب ما اااااااعرس يصير خير يا بو بدر .. يالله انا ماشي في امااااان الله بخاطركم شي؟
الكل .. سلامتك الغالي

*******************
في بيت بو عبدالرحمن (( بيت علي و محمد ربع مبارك)) كانت وسمية - أم عبدالرحمن- جالسة بالصالة مع بنتها الوحيدة سارة ( ام الهنوف) وكانو يسلون و دخل عليهم محمد وعبدالرحمن
سارة: سمع سمعتي عن بنت فؤادة سبجوه ...
ام عبدالرحمن: وش فيها .؟ مب هذي اللي تدرس بالكويت؟
سارة: ايوه يمه هذي هي
ام عبدالرحمن: وشفيها ؟ شصاير عليها ؟
سارة: يقولون تزوجت من اسبوع
ام عبدالرحمن: هو معقولة؟ غريبة ما عزمتني فؤادة وما سمعت الحريم يابو طاري انها انخطبت ولا شي..
سارة: أي يمه لأنهم ما سوو شي عائلية و على طول زواج ؟
ام عبدالرحمن: وي شدعوة ليش ما كملت دراستها على الاقل؟
سارة: مو يمه اهي حابته و عاشقته و هو كويتي اصلا يدرس معاها و ما يشتغل وابوه اللي يصرف عليه و ما قدروا عليها وخاوفو يصير شي و اهي هناك وهم ما يدرون وزوجوهم من بعض و سافرت معاه ..
ام عبدالرحمن: والله شباب هالزمن الله يجيرنا منه و يستر علينا بستره .. ربي يا عيالي يبلغني فيكم و ازوجكم كلكم واحد واحد و اختار لكم احسن البنات ..
ودخل عليهم هالوقت عبدالرحمن و محمد ... سلاااام عليكم .. وباسو امهم على راسها
ام عبدالرحمن: هلا و الله بعيالي عسى الله ما يخليني منكم
محمد: اااااامين يام محمد
عبدالرحمن: هي هي ام عبدالرحمن مب ام محمد
محمد: عدااااال لا تصدق عمرك و انا خوك تراها امي بعد لا تنسى
سارة: انتو للحين على هالسالفة ام عبدالرحمن و ام محمد ... (وبدلع تتقرب من امها).. تراها ام سارة بعد فديييييت هالشيبة
ام عبدالرحمن: شاب راسج يا سويرة ... ماحد مكبرني إلا انتي تزوجتي منوقت و سويتيني يدة
عبدالرحمن: ههههههه كلج شباب يا كيداهم
محمد: اقول الغلا مو كأني من جم يوم شفت شيب بشعرج ووووين الحين ما اشوف شي . ههههههه
ام عبدالرحمن: هذا هو شعري اسوووود مثل الليل ما تغير
ودخل عليهم ابوهم بوعبدالرحمن وراح جلس جنب ام عبدالرحمن وهو يتكلم: منو هذا اللي ملعوز عيوزي ؟؟؟؟؟؟
سارة: و الله ما قلت شي
محمد: ولا انا ما ادري بشي حتى توني جاي و توني بقوم
عبدالرحمن: اياالخام يعني الحينه انا اللي صرت بالويه ..
بوعبدالرحمن: عبووووود وش فيك على امك
عبدالرحمن: لا يبه انا إلا جي امزح معاها ...
سارة تقول لروحها : رحنا وطي وش يفكنا اليوم
بوعبدالرحمن: انا جم مرة قايل لكم الغااالية لا احد يزعلها .. انتو ما تيوزون لمتى بتعقلون .. اللي اصغر عنكم متزوجين وعندهم عيال طووووولهم ...
ام عبدالرحمن تسمع لكلام ريلها و مستانسة من الخاطر ... دومه بوعبدالرحمن يحب مرته مرّة وكله يطفر بعياله اذا يأذونها .....
عبدالرحمن: لا يبه انا كنت اقول لها تووووووني انا ما ابي اتزوج إلا وحدة بمواصفات امي ...الغالية .. يالله يمه اشتغلي عالموضوع
ام عبدالرحمن شاقة الحلج: صج صج صج صج يمـــه نويت ؟؟؟ لو جي بس تبي تطلع روحك من هالورطة؟؟
بوعبدالرحمن: افااااا يا وسمية الحنيه انا صرت ورطة
ام عبدالرحمن: فديتك هالورطة انا .. احلى ورطة بحياتي
سارة: احم احم .. انا انسحب ..انا بتصل لريلي ياخذني الحين اكيد الهنوف مأذيته ...
الكل : في امان الله .. سلمي علة بو الهنوف
سارة: يوصل
ام عبدالرحمن: ها يمه ما قلتي نويت صج؟
عبدالرحمن: أي يمه خلص نويت .. انا ريال ما ينقصني شي و لازم اكمل نص ديني .. يالله انتي عليج العروس الحين ...
محمد: يمه انا بعد دوريلي وحدة في طريجج
ام عبدالرحمن: انت للحين صغير عالزواج كمل دراستك هالسنة وبعدين يصير خير ...
بو عبدالرحمن: على البركة يا ولدي و الله يوفقك ببنت الحلال ان شاء الله و بنات الكرام ما في اكثر منهم واحنا اللي يهمنا الاخلاق وانا ابوك و الباقي كله ماله قيمه
ام عبدالرحمن: انت ما عليك انا ادور لك احلى واحسن بنات العين
عبدالرحمن: تسلمين الغلا ...
محمد: انا اترخض عنكم ... ساير انام لي شوية شي بخاطركم ..
الجميع : سلامتك تصبح على خير ... (وراح عنهم)
بو عبدالرحمن: يالله انت بعد قوم
عبدلرحمن: وين اروح
بوعبدالرحمن: أي مكان ما تشوفني انا وامك قاعدين .. استح على وجهك و قم
عبدالرحمن: شر طردة ... خلص اقوم بكرامتي احسن لي .. تصبحووووووون على خير الشباب
بوعبدالرحمن: الشباب ها .. اتطعبز على روحك يا مسود الراس ... قم بس قم
وقام عنهم عبدالرحمن و إلا بدخلة علي عليهم
علي: السلاااام عليكم
ام و ابو عبدالرحمن: وعليكم السلام و الرحمة
بو عبدالرحمن: انت بعد فارق بويهك و عطنا عررق مقفاك و روح ارقد
علي: بسم الله ... ليش شصاير ؟؟؟؟
بو عبدالرحمن :ما صاير شي بس قاعدين على جبودنا مو مخلينا ناخذ راحتنا ابد
ام عبدالرحمن احترق ويهها بس مو قادرة تتحمل .. لكن العيال متعودين على ابوهم .... ههههههه ....حتى لو ما عنده سالفة كله يطفر بهم ويدري ان ام عبدالرحمن تستحي وتتضايق لكنه ما يجوز ..
علي: على العموم انا ياي تعباااااان و بروح انام تصبحون على خير و احلام وردية
ام عبدالرحمن: ما يصير جذي عاد يا بو عبدالرحمن ... اعيالك كباااار و انا يحترق ويهي اذا تسوي جي قدامهم ..
بو عبدالرحمن: خليهم يتعلمون شلون يدللون حريمهم بعدين
ام عبدالرحمن: أي بس مو جذي ترى والله ان قمت تسوي لي جي مرة ثانية ما اقعد معاك في مكان واحد و اهم موجودين ...
بو عبدالرحمن: ههههههههه .. وانا ما اقدر على زعل الغالية ام عيالي ... اقول وسوم العيال اكبروا و بيكبرونا معاهم .. حليله ولدج يبي يعرس
ام عبدالرحمن: هيه و الله كبرنا و السنين تركض بسرعة ...
بو عبدالرحمن: انزين عندج وحدة في بالج لولدج ؟؟؟
ام عبدالرحمن :ايوه و انت تعرف ابوها بعد .. بنت اياويد و ما تنعاب .. ادب و اخلاق و جمال و دلال و بنت اصل كاملة و الكامل الله ...
بوعبدالرحمن: من بنته؟
ام عبدالرحمن : بنت بو مبارك السالم انا من شفت هالبنت دخلت قلبي و تمنيتها لحد من اعيالي ..
....
ترى ماذا ستكون ردة فعل مريم؟ محمد؟ مبارك؟عبدالرحمن؟ من هذه الخطبة


.
.
ترقبوا باقي الروايه
__________________
[flash1=http://dc09.arabsh.com/i/01710/6kqc4vrlelow.swf]WIDTH=400 HEIGHT=350[/flash1]
عاشقه من بعيد غير متواجد حالياً   رد مع اقتباس