عرض مشاركة واحدة
قديم 10-21-2008, 03:15 AM   #5
مشرفة
 
الصورة الرمزية عاشقه من بعيد
 
تاريخ التسجيل: Feb 2008
الدولة: المملكة العربيه السعودية
المشاركات: 4,705
معدل تقييم المستوى: 110
عاشقه من بعيد has much to be proud ofعاشقه من بعيد has much to be proud ofعاشقه من بعيد has much to be proud ofعاشقه من بعيد has much to be proud ofعاشقه من بعيد has much to be proud ofعاشقه من بعيد has much to be proud ofعاشقه من بعيد has much to be proud ofعاشقه من بعيد has much to be proud ofعاشقه من بعيد has much to be proud of
افتراضي

¤؛° الجزء الثامن °؛¤
صار العزا في العين.. في بيت ابو حمدة الله يرحمها.. ومرت الايام بطيئة وكئيبة.. فهد ظل فترة بالمستشفى ولكن اصابته صعبة شوي وعشان جي هو يحتاج السفر للخارج.. وقرروا ان يشفرونه المانيا لأن اخوهم سعد يدرس هناك وراح يهتم فيه ويعرف يتابعه.. بدرية وشمس راح يسكنون في بيت عمهم ناصر لحد ما يرد ابوهم من العلاج لأن امه وابوه ما رضوا يخلونهم في بيت جدهم ابو امهم وحدهم.. وتقرر سفر فهد وبيرافقه اخوه راشد بو سيف ويرجع بعد اسبوع لأنه بتركه لسعد يتكفل به هناك..

قبل ما يسيرون المطار فهد يوصي بناته .. و يودعهم
فهد: بنياتي شمس حياتي وبدر ليلي.. هالله هالله بدراستكم ..ولا تتعبون عمكم والشواب.. انتو حرمات وينشد فيكم الظهر وما يحتاي اوصيكم.. كلها شهرين ان شاء الله وراجع.. يالله لا اله إلا الله
شمس: تروح وترجع لنا بالسلامة سالم معافا.. محمد رسول الله
فهد: افا يعني اروح اغير اسمي من سالم لفهد وارجع
بوفهد: شو يا بنت فهد مو كافي اسمي سالم يعني .. تبينه هو يتسمى بأسمي بعد
شمس: هههههه تسلم لي يدوه .. الله يخليك لنا يا رب
بدرية ونزلت دموعها على خدها ومسحهم ابوها
فهد: أفا .. والله ما تنزل دموعج دام راسي يشم الهوا إلا كانت من فرح وانا فهد بن سالم الكعبي
بدرية: ابويه كل يوم دق علي.. الحينه اميه راحت وانت بتسافر بعد.. يبه رد لنا بسرعة
تأثر الكل من كلام بدرية.. بدرية وايد تتأثر وبسرعة تنزل دمعتها.. بعكس شمس الهادئة والعاقل الكبيرة لأنها كانت مع امها يد بيد وتساعدها بكل شي وتشوف آلامها .. كانت تحي بوجع امها وتشوفها تستحمل وتبتسم دائما وما تظهر للناس ألمها لحد ما تتعب وما تقدر تتحمل وترقد بالمستشفى.. تعلمت شمس الثبات من أمها وكانت دايما تعامل بدرية كأنها امها واختها و صديقتها .

وصلوا فهد المطار وسافر إلى ألمانيا ...

بما أن فطيم ما تحب حد يشاركها غرفتها.. شمس صارت مع مرايم في غرقتها وبدرية مع رباب اللي كانت فرحانة ببنات عمها ..

في غرفة مرايم كانت شمس و مريم يسولفون قبل لا ينامون
مريم: وانا اشوف اليوم غرفتي منورة .. ترى شمس الشموس فيها
شمس: هههه تسلمين .. الغرفة منورة بأهلها
مريم: يسلمك يا رب .. (ولاحظت مريم ان الابتسامة زالت من على وجه شمس)
مريم: وش فيج شمس ؟؟
نزلت دمعة شمس على خدها: تذكرت امي، بالرغم من تعبها كانت لازم تتطمن علينا قبل لا تنام..
وضمتها مرايم تواسيها واكيد اللي مرت وتمر فيه مب هيّن..
مرايم: انا حاسة فيج.. انا بعد فقدت امي ، بس يمكن الله رحمني وما كنت اتذكرها لأني كنت صغيرة لكن انتي عشتي معاها وعايشتي ألمها.. لكن هذا رحمة من الله عشان يريحها من العذاب اللي كانت فيه
شمس: صدقتي ، رحمة الله عليها
مرايم: الله يرحمها و يغمد روحها الجنة .. يالله ننام تأخر الوقت
شمس : برايج .. تصبحين على خير
مريم: وانتي من اهل الخير

اما رباب وبدرية ناموا من زمان بعد ما سولفوا شوي وعدلوا الغرفة ورتبوا اغراض بدرية ...

طبعا اول واحد نش من الصبح هو مبارك كالعادة.. والحين في الصيف صار يوميا يقعد من الصبح يروح يتمشى شوي ويرجع يفطر ويروح يحوط او يطلع مع ربعه.. والحين اجازة وما وراه شي.. لكنه صار يحاسب بدخلاته وطلعاته من البيت لأن بنات عمه فيه وعشان ما يسبب لهن احراج وياخذوا راحتهم..

وفي صباح يوم حلو بعد ردته من المشي داخل وميت من الحر والعرق تارس ويهه وجسمه.. دخل البيت بسرعة يبي يغسل ويسبح بدون ما ينتبه إذا كان احد فيه أو لا.. وتصادم مع حد.. وقف من الصدمة مستغرب وقافط.. وطلعت اللي تصادم معها هي ....................... شمس



¤؛° الجزء التاسع °؛¤
مبارك: السموحة .. أا ما انتبهت كنت مستعيل
شمس كانت منحرجة وايد وعدلت حجابها: حصل خير.. انا بعد كنت شاردة و ما كنت منتبهة
مبارك و عشان يزيل الاحراج قال يسولف معها شوي ويغير الموضوع
مبارك: احم .. شخبار عمي ؟؟..
شمس: الحمد لله بخير بس يقول ان غيابه بيطول شوية يمكن يتم بعد 6 شهور زود هناك
مبارك: اها .. الله يرده بالسلامة ان شاء الله
شمس:الله يسلمك.. (ونزلت شمس راسها وقالت) يعني قعدتنا عندكم بتطول وراح نثقل عليكم
مبارك رد مباشرة و بثقة : شالحجي يابنت العم .. إذا ما يشيلكم البيت تشيلكم عيونا
ابتسمت شمس من رده: تسلم وما تقصرون كلكم قوم عمي
مبارك: برايج بنت عمي انا ساير اسبح ريحتي فاحت هههههههه .. فخاطرج شي ؟؟
شمس: هههههههه .. مشكور سلامتك
مبارك: الله يسلمج...
وراح مبارك رأسا لحجرته عشان يتسبح ويغير ملابسه وطلع ويا ربعه

في غرفة مرايم دخلت شمس و لقت مريم محتاسة و ثيابها منثرة في كل مكان
شمس: يه يه .. شصاير ليش الغرفة جي ؟...
مريم: قاعدة اشوف هدومي - ملابسي – واللي يناسب واللي ما يناسب خبرج الجامعة يبي لها كشخة
شمس: هههههههه .. انزين انا كنت ابي اسير السوق اتشرا.. وابي حد يسير وياي لأني ما اروم اروح بروحي ويا الدريول تيين معاي؟ .. ............. (لأنهم يابو معاهم دريولهم و مرته اللي هي بشكارتهم) ..
مريم: هيييه اروح ونص بروحي كنت ابي اروح .. لكن قلتي لأبوي او حد اخاف ما يطيعون نروح ويا الدريول بريحاتنا ..
شمس: هيه انا قلت بقول لعمي او يدي اول.. انا وبدريه كنا نروح غالبا مع ابويه او الدريول والبشكارة لأن امي ما تقدر تيي ويانا
مريم: زين عيل عالغدى نقول لهم و بكرة الصبح نسير نتشرا ..
شمس: اوكي برايج ..
وسكتت كأنها تبي تقول شي بس مب عارفة شتقول
مريم: شفيج شموس علامج؟؟ في شي ...
شمس: أاا .. لأ ما في شي ههههههه ... بس من شوي صارلي موقف
مريم بفضول : والله؟ شو صادج؟ مع منوو الموقف وليييييييه تضحكين ..
شمس: مع اخوج مبارك..
مريم: هييه وبعديين شو السالفة؟؟..
شمس: ما شي سالفة .. بس هو كان يايي مستعيل من برا وتصطادمنا .. مسكين انحرج بس بعدين عادي
مريم: ههههههههههه فدييييته اخويه .. وبس؟
شمس: هي بس شو بعد .. رمسنا شويه عن ابويه و قال بيروح يتسبح لأن رحته فاحت هههههاا
مريم: هههههههه ... مهظووم طالع على اخته
شمس: هههه ... مريومة شكلج وايد تحبين اخوج ..
تنهدت مريم وقالت: هذا اخوي و صديقي وامي وكل هلي بالدنيا عسى الله لا يحرمني منه.. انتي تدرين ان امي ماتت وانا صغيرة حتى ما كملت سنة وما كان عندي إلا اخويه مبارك وهو اكبر مني ب 3 سنوات.. يهتم فيني كأني بنته.. يحبني كأني امه .. اسراري وهمومي كلها عنده ... مبارك قطعة مني ولا والله انه كليّ.. طيبته بلسم لقلبي و ووجوده طعم لحياتي ..
ابتسمت شمس لكلامها: عسى الله لا يحرمكم من بعض.. يا حظك يا ولدعمي باختك.. اما انا ما عندي غير بدرية و صغر سنها ما يسمح لي اني ارمي همومي عليها ... فأنا كنت امها الثانية من بعد امي الله يرحمها (وسكتت شمس قليلا وقالت مخاطبة مريم) مريم، شلون خالتي شما معاكم؟؟
مريم وفهمت لشمس : الحمد لله .. شما طيبه وبنت اصل ومعاملتها معانا زينة بس طبعا مستحيل تقدر تعوضنا عن امنا لكنها حرمة حبابة وعيالها هم اخواني.. شمس.. ما اعتقد عمي راح يتزوج من عقب المرحومة ..
نزلت دموع شمس على خدها من كلام مريم: اتمنى ان هالشي ما يصير .. احنا ماراح نقدر ننسى امنا .. لكنه ريال حاله حال غيره ويبي له حرمة تداريه ..
قالت مريم لمواساتها: لا يا شمس عمي يحب خالتي حمدة ومو بسهولة يقدر ينساها.. ابويه كان لازم يتزوج لأن نحن كنا صغار ونحتاج لرعاية وابويه ما يقدر يسوي هالشي بروحه لكن عمي غير ..
ارتاحت شمس من كلام مرايم لها و مسحت دموعها وابتسمت ابتسامة رضا

الظهر على الغدى كانت العايلة كلها متيمعة تتغدى بالساحة الخارجية للبيت.. وهذا مكان الشواب المفضل لأنهم ما يحبون يقعدون على الكراسي وياكلون.. فرشو لهم وقعدوا كلهم يتغدون مع بعض.. مبارك كان عندما تلتقي نظراته مع شمس يبتسم غصب عنه وينزل راسه باحراج.. اما شمس كانت تحس ان وييها بيتحرق ومب عارفة تاكل شي ...
مريم: ابويه .. يدي .. شمس تبي تروح السوق تتشرا للجامعة وانا ابي اروح معها
انتبه مبارك لرمستها وتابعها باهتمام
بومبارك: خير ان شاء الله .. و متى تبون تسيرون؟
شمس: بكرة من الصبح احسن شي عشان نلحق نشترا كل اللي نبيه ...
الجد سالم: منو بيوديكم ؟؟
بومبارك: انا بكرة ماقدر عندي موعد مهم وما اقدر أاجله
شمس: لا تعطل نفسك عمو عشاننا .. ممكن نروح مع الدريول واذا خالتي شما تبي تسير ايانا اوكي ..
شما: ما اقدر يا بنيتي نحن متعودين كل جمعة نسير بيت الجيران ونتم لأذان الظهر.
بومبارك: وماشي سيرة بروحكم مع الدريول
عقدت حياتها شمس .. و برطمت مرايم .. واخيرا نطق مبارك
مبارك: انا بكرة فاضي ممكن اوديكن ..
مرايم: فديييييييييته اخويه انا ...
شمس: اذا فيها كلافة عليك ولد العم ما يحتاي نقدر نصبر كم يوم ..
مبارك: لا كلافة ولا شي .. وانا ما احب روحة السوق وخصوصا ويا الحريم.. وبنفس الوقت ما احب روحه الحريم للسوق بروحهم.. وعشانكن كسرتو خاطري تكرمت عليكم وبسوي فيكن جميل وبيوديكن و لكن بشررط ....
اشتغربت شمس: شو شرطك ولد عمي! ..
مبارك: ابـيييييكم تشترون لي على ذوقكم اي شي....
الجدة حصة: طالع هذا يبي رشوه بعد
مبارك: هههههههههههه .. هذا شرطي و إلا ما اوديكم ... شو قلتوا؟؟
مرايم تطالعة وهي رافعة حاجب واحد: أيا العيار ... كل شي بثمن ها
شمس: تامر .. ما يغلى عليك الشيخ مبارك ..
مبارك: سمعي الرمسات العدلة .. مشكووووورة الشيخة ... يالله انا اترخص .. الحمد لله شبعت ... شي بخاطركم؟؟
الجميع : بس سلامتك

ويوم الجمعة الصبح طلعتهم من البيت
مبارك: شو هذا ...
مرايم: شو؟ شو شو هذا؟
مبارك: وين الغشوى ..
شمس: اي بس انا ما اتغشى!..
مبارك : ماشي سيرة عيل.. اول تتغشون وبعدين نروح ..
مريم: عّديها اليوم اخويه تكفى ..
غصب عنها ابتسمت شمس .. وعجبتها غيره مبارك عليهم.. واخذت الشيلة ولبستها كأنها غشوى
شمس: شرايك ولد عمي الحينه ؟؟
مبارك: اي هذي الحريم السنعة .. يالله انتي بعد ريمو ..
مريم: ريمو بعد؟ .. امرنا لله حاظرين اخويه
وراحوا السوق ووداهم مبارك.. وطولوا وايد لأن شمس ذوقها عالي ومو اي شي يعجبها.. وحتى مرايم نفس الشي.. ومبارك تملل لأنهم كل شوي يدخلون محل ويطلعون من محل وفي قلبه يقول.. وش لي انا قايل اوديهم لو مخلي ابوي يبتلش فيهم احسن لي اما صج الحريم ما ينراح معاهم السوق، احنا بالعكس ندخل محل محلين ناخذ اللي نبيه ونص ساعة مكملين اشغالنا كلها..

مرايم: انا اخذت كل شي ابيه ..وشو عنك انتي خلاص؟
شمس: هيه خلص .. بس باقي شي واحد بعد ..
مرايم : شو بعد؟
شمس: الهدية ما اخذنا شي لمبارك...
مريم: اي والله... طيب شو بناخذ له..
شمس: امممممم .. المحل اللي جنبنا للعطور ، شو رايك ناخذ له عطر ..
مريم: هي والله خوش اقتراح .. واخويه موته يتسبح بالعطور هههههههه
شمس: ههههههه .. اوكي يالله توكلنا
وراحوا المحل و خذوا له عطر فاخر و ريحة فنانة ورجعوا البيت.. مبارك وصلهم وراح لربعه.. ومريم وشمس راحوا غرفتهم يرتبون اشيائهم ... واخذت مريم غرشة العطر بتوديها غرفة مبارك وقالت لها شمس انها بتسير وياها عشانها خاطرها تشوف غرفته .... غرفه مبارك مجابلة غرفه مريم بس يفصلها غرفة فطيم عنها بالنص ...
دخلوا الغرفة وكانت ولادية بكل ما فيها .. لونها ازرق فاتح . فيها نافذة تطل عالخارج.. فيها الكمبيوتر على طرف .. و السرير لونه ازرق غامج ... ومعلق على الجدار صور لاعبين ومنظر طبيعي .. وصورة عائلية ..
شمس: غرفه اخوج حلوة ..
مريم: من ذوووووقج حبيبتي..
وحطت غرشة العطر على الكومودينو لأنه اول ما يجي بينام ويمكن ما يشوفه اذا حطته في مكان ثاني ..
شمس عينها تتجول في الغرفه : مرايم منو اللي في الصورة؟؟ ..
ابتسمت مريم ابتسامة حزينة: هذي الولد الصغير هو اخويه مبارك و اللي حاملها هذي انا .. وهذا ابوي و اللي ماسكة يده .. أمي ..
وبعدها طلعوا من الغرفه وراحو يرقدون شوي ...

¤؛° الجزء العاشر °؛¤
مبارك ما رجع البيت إلا آخر الليل.. ولما انسدح على الشبرية شاف زجاجة العطر ..قام يقلب فيها ويتساءل منو يابها.. بعدين تذكر ان يمكن هذي من عند اختته وبنت عمه .. فتحها وعجبته الريحة من الخاطر.. ترشرش منها و نااام..

هالمرة مبارك تأخر في رقاده وما نش إلا اساعة 10... صحت مريم قبله واستغربت لما سألت البشكارة وقالت ان مبارك للحين ما وعى من الرقاد... راحت تدق عليه باب حجرته وهو لا حياة لمن تنادي ..
مريم: مباااااارك .. ليه للحين نايم؟؟
استيقظ مبارك من النوم متثاقل عندما سمع صوت دق الباب وفتح الباب وشاف مريم قدامه
مبارك: خير شو صاير موعيتني من صباح الله شتبين ؟..
مريم: شوو تخربط ..الحينه اساعة صارت 10 لمتى بترقد بعد.. واليوم ما سرت تسوي رياضة ولا شي
مبارك: والله؟.. راحت عليه نومة .. لأني اصلا رجعت البيت متأخر ....... وبعدها تذكر ......
مبارك: او يمكن من العطر اظاهر حاطين لي فيه منّوم.. رشيت لي منه وتقولين شو اغمى عليّ!..
مريم: هههههههه اسم الله عليك .. هذا من حلاوته تخدرت ما قدرت على هالريحة الفنانة ..
مبارك: ههه كل شي يجوز .. طيب روحي خلي البشكارة تجهز لي الفطور على ما اغير ملابسي و اغسل وجهي إذا ما عليش امر ..
مريم: ان شااء الله .. راح اجهزه لك بنفسي تامرني أمر .. كم مبارك عندي انا
مبارك: تسلميييييين الغلا والله

قربت الاجازة تخلص وبيبدأ دوام الكل عقب مدة بسيطة .. اللي بيروح الجامعة واللي بيسير المدرسة .
كانت رباب و شمس نازلين يركضون على الدري..
رباب: امايه الاجازة خلصت ماشي باقي عليها.. نبي تطلعونا شويه نستانس قبل صكة المدارس
شما:وانا شو بيدي .. سيري لأبوج او مبارك قولي لهم ..
رباب: امي .. حتى بدرية وشمس كله في البيت ولا نطلعهم ولا شي .. مو عدلة بويهنا ترى
شما: يأم السانين .. الحينه يجي ابوج وخبريه باللي في خاطرج ..
شمس: اذا علينا احنا خالتي ترى عادي و احنا مرتاحين معاكم جذي ..
مريم: يا ربي .. شموسة نحن نبي حجة عشااان يطلعونا .. شرايكم نسير البر
فطيم: ايييي والله من زماااان ما رحنا ..
بدرية: انا عمري ما سرت البر .. يعني وناسة اذا رحنا؟؟..
مريم: هي حبيبتي بدور .. مرّة وناسة
شمس: شوقتونا على السيرة .. يالله رباب اشتغلي عالموضوع . هههههههههه
رباب: اووووووكي .. المهم تدعموني كلكم عشان ما انحط في وجه المدفع و بعدين تخونوني
الكل : سيري و نحن من ورائك هههههههههههههه
وبدأت رباب حملة الاقناع لأبوها والشواب.. والعيوز يدتهم حصة شجعتهم ووقفت وياهم .. و حددو السيرة الاسبوع الجاي.. وقالو لقوم عمهم راشد يي معاهم ومريم قالت لخالتها سعاد وبنتها و كلهم وافقوا على الروحه ..

يوم الخميس الكل نش من الصبح.. اكيد من الوناسة وراهم سيرة بر وما تتكرر كل يوم.. الكل اجتمع في بيت ناصر بومبارك.. وروحوا.. فطيم ورباب وبدريه واحمد مع مبارك في سيارة.. وشما وسعاد (خالة مبارك ومريم) مع بومبارك لأنه ما طاع يخليهم يسيرون مع الدريول.. العم راشد ما سار وياهم ولكن راح ولده سيف وودا معاه امه وسارة وزينة.. والجد سالم والجدة حصة راحوا معاهم شمس ومريم وبنت خالتها الجازي..

وصلوا و دوروا لهم مكان زين للقعدة و فرشوا لهم ..
الجدة حصة: يالله عيني شما خلونا نقوم نطبخ الغدى
شما: امرج عموه .. بس يبي لنا نخلي البنات يجمعون الحطب عشان النار
مريم: بنقوم الحين .. يالله بنات قومن
شمس كانت مستغربة لأنها اول مرة تسير البر: وين نقوم؟
الجازي: ههههه قومي معانا وانحن نعلمج
وقامن البنات كلهن يدورون الحطب الصغار عشان يشعلون فيه النار للطباخ.. وكانن فرحانين وحتى تسابقوا منهي فيهم تجمع اكبر كمية..

الشباب كانو متواعدين مع ربعهم ان يسيرون هم بعد .. وتلاقوا معاهم هناك وراحوا عندهم.. هم قاعدين بعيد شوي عن مكان العيلة عشان ياخذون راحتهم..

تغدو و كان الغدى فنان .. طبعا كل الحريم شاركوا في اعداده و طلع ولا احلى ...
الجازي: اما الطبخة اليوم روووعة تسلم يدينكم
مريم: هيه والله .. يبي لنا نتعلم خيبة ما نعرف نسوي شي ..
شمس: انا اعرف شويه خفايف .. يعني حلاوة و معجنات
الجدة حصة: خيبة .. هذا انتو بنات هالزمن وش تعرفون تسوون .. الله يرحم حريم اول يوم احنا كبركم فاتحين بيوت وعيالنا طولنا
سعاد: الدنيا تغيرت الحين يام ناصر .. وين حريم اول ببنات هالزمن
الجازي: شمس شنو راح تدرسين بالجامعة
شمس: كمبيوتر ان شاء الله
الجازي: والله؟ انا بعد يعني بتكونين وياي
شمس: هيه ..صدفة سعيدة طمنتيني على الأقل اعرف وحدة بتكون معاي
مريم: الله حلوووو.. بتكونون جميع .. وانا لحالي .. و برطمت
الجازي: بكرة تتعرفين على بنات معاج .. و بعدين بنكون مع بعض بالجامعة وبنشوف بعض في البريكات و الكافتيريا تجمعنا
الجازي: هههههههه هيه لأن مريم اكيد بتكون 24 ساعة بالكفتيريا
مريم: يا كرهج ... شايفتني امتن عنج
الجازي: ههههههه ما قلت شي انزين انا الحين ههههه
شمس: ههه.. خلاص بنااات اخذو بريك .. فاصل اعلاني و راجعين ههههههه
مريم: ههههههه

وانتبهوا للشباب وكانوا يسوون ريس ويتسابقون منهو يفوز فيهم.. سيف كان فنان كل مرة يفوز عليهم.. سريع و يسوي حركات و يخمس من الزززين.. البنات كانو يطالعونهم ويشجعون من بعيد..
مرة وحدة شافوا سيااارة تطير في الهوا.. وتنقلب.. الكل وقف قلبه وقاموا يصارخون.. السيارة مو عارفين منو اللي داخلها ....الشباب نزلوا من سياراتهم وراحو يشوفون شصار عليهم.. اللي كان في السيارة (أحمد اخو مبارك واللي يسوق علي رفيجه).. طلعوهم الشباب وهم يسبحون دم واتصلوا للاسعاف يشلهم...!

¤؛° الجزء الحادي عشر °؛¤
في مستشفى توام الكل كان هب في حالة.. وقاعدين على اعصابهم وحتى الحريم وياهم لأنهم ماطاعو يسيرون البيت وسارو معاهم المستشفى عشان يتطمنون على العيال.. أحمد كانت حالته خطيرة لأنه ماكان حاط حزام.. وعلي صادته ضربه قويه على الراس افتحت راسه وانكسرت يده وتعورت ريله.. شما كان تصيح من الخاطر وقلبها معورها على ولدها أحمد وقاعدة وتتفداه ومريم قاعدة جنبها وتواسيها.. ووصل بو عبدالرحمن (بوعلي) وحرمته وسمية (أم علي) من سمعت بالخبر طيران للمستشفى والكل قاعد على اعصابه.

طلعوا لهم الدكاترة اخيرا وهم دكتور مصري واثنين دكاترة مواطنين متتدربين ووقفوهم يسألونهم..
بوعبدالرحمن: ها دكتور طمنا على صحتهم
الدكتور المصري: الحمد لله عدت على خير وان شاء الله راح يقومو بالسلامة
بومبارك: طيب دكتور ما شي خطر عليهم .. خصوصا الصغير دكتور طمنا ؟؟
الدكتور المصري: الصغير اصابته اكتر من الكبير لكن احنا عملنا جهودنا وبأمر ربنا انقذناه.. اصل صاده ارتجاج بالمخ والحمد لله ان النزيف ما كنش داخلي.. بس وشه تطاير عليه زجاج العربيه وتشوه شويه ويمكن يحتاج عملية تجميل بسيطة وربنا يقومه لكم بالسلامة
مبارك:لا حول ولا قوةإلا بالله .. دكتور و الكبير طمنا عليه دخيلك
الدكتور : ولله الحمد حالته كويسه دلوقتي .. اللي ساعده انه كان حاط حزام الأمان وخفف من شدة الصدمة.. يعني فيه كسر في ايديه ورجل متعورة وجرح في الراس بس مش كبير اوي وربنا نجاه ..
الكل انصدم من كلام الدكتور ولكن الحمد لله على كل حال وانهم على قيد الحياة .. شما كانت من صدمتها بكلام الدكتور اغمى عليها شوية والتموا عليها الممرضات.. ونقلوها ترتاح في غرفه.
شما: يمه ولدي ودوني اشوفه .. ولدي احمد يمه وينك.. (وتمت تصيح)
مريم والبنات كانو يشوفون حاله شما و يبجون معاها وشمس كانت تحاول تهديهم شوي و مريم تحاول قد ما تقدر تمسك اعصابها عسب وحدة تكون منهم قوية شويه ..
مريم: اذكري الله يأم احمد .. ادعلي له و اقري قرآن واتركيه لربج يعافيه ان شاء الله
شما: هذا ولدي يا مريم .. هذا العزيز الغالي او اولادي .. متشوه و متكسر نظر عيني (وكملت بجي(
شمس: اذكري الله و احمديه يأم احمد و ان شاء الله ما عليه شر و ربج يحفظه
رباب تمت تصيح وراحت احظنت امها و تبعتها فطيم و عم الحزن و البكاء الغرفة

الرجاجيل كانوا برا في الممر
بومبارك: كنا نتمنى نتعرف في ظرف احسن من هالظرف يابوعبدالرحمن
بوعبدالرحمن: هيه والله .. الحمد لله على كل حال و الحمد لله على سلامتهم
مبارك: يبه الحينه بينقلونهم العناية المركزة ونقدر ندخل عليهم نشوفهم بس واحد واحد لأن مو مسموح و هم ما بيوتعون إلا باجر الظهر ..
بومبارك: برايك .. شل الحريم ونرجعهم البيت وباجر ان شاء الله نحن عندهم نطمن عليهم
بوعبدالرحمن: محمد اخذ امك وودها البيت انا بتريا شويه هني و بعدين بروح مشوار
محمد: ان شاء الله بويه

في هالوقت وسمية كانت تتطمن على ولدها من بعيد لأن مو مسموح الزيارة وهو في العناية المشددة .. و بعدها راحت تتطمن على شما و تسأل عنها ... شما طلعت من المستشفى ولكن الزمها الدكتور بالراحة لأن مو زين عشان الضغط يرتفع عندها ...

عقب اسبوع طلع علي من الستشفى و لكن احمد طول بعد كم يوم و كانو قوم علي يزورونهم ويتطمنون عليهم على طول ...



شما ومرايم كانو يتناوبون في روحة المستشفى لأحمد عشان ما يظل بروحه وتتزهب الفواله للي يزورونه.. ماحد كان يرقد مع احمد بالمستشفى لأنه ما يرضى و على قولته هو ريال هب ياهل .

وصلو قوم بومبارك المستشفى المغرب ..
شما اول ما دخلت لوت على ولدها : فدييييييته ولديه الغالي شحالك اليوم يمه ؟؟
أحمد : الحمد لله امييي.. بس عاد ذبحتيني جان ما مت من الحادث بموت من حظنج لي ههههههههه
شما: اسكت اسكت عن هالرمسة فال الله ولا فالك .. يسلمك ربي و يحفظك
احمد : هههههههه) ..وقال بدلال).. يمه بخريني من العين هذا اكيد حسدوني على جمالي وشوهو ويهي
شما: اسم الله عليك من العين يا نظر عيني
احمد: نظر عينيج عاد .. بروحج نظرج ضعيف و يبي لج نظارة هههههههههههههه
شما: هههههه خسك الله .. فديته انا اللي دمه خفيف
رباب: اظاهر اني لازم امرض جي حالي حالك عشان يدللوني هالدلال ... احمدو قوم بقعد مكانك
احمد: هههههههه اوكي يالله .. تبادلين ؟.. (وقام بيقوم من مكانه(
شما: شووووووو تسوي انته .. ايلس مكانك اهو .. وانتي قعدي مكانج وعن هالرمسة الماسخة
مرايم: هههههه عندها حق ربيّب حتى انا اغاااار... ما في حد ما يبي يتدلل جي ..
أحمد: مو قلت لج يمه يعطوني عين .. ولا حد غيركم قعدني هالقعدة
شما: وا بويه عليكم .. شو شايفيني مسويه للولد انا زود عنكم .. اسم الله عليكم كلكم من هالسيرة
ويدق باب الغرفة و تطل منه ام عبدالرحمن و تدخل
ام عبدالرحمن: مرحبا الساع شحالكم و شحال احمد ولديه ..؟ (وتوايهو)
شما: الحمد لله يأم عبدالرحمن بخير يسرج الحال .. شحال علي ان شاء الله طاب؟
ام عبدالرحمن: الحمد لله قريب بيفجون له الجبس عن ايده وشوي يعري من ريوله و لكنه احسن من قبل
شما: الحمد لله ان سلمهم من الشر
ام عبدالرحمن و تناظر البنات : شحاكلم بنات عساكم طيبين ؟
مرايم: بخير و نعمة انتي شحالج عموه وشحال عربانكم
ام عبدالرحمن: الحمد لله يابنتي ربي يسلمج ... منهم البنات اللي معكم
شما: هذيلا شمس الكبيرة و الصغيرة بدرية عيال فهد اخو بومبارك .. وهذيلا بناتي رباب وفطيم
ام عبدالرحمن: ربي يخليهم ان شاء الله .. وش حال ابوج يمه عساه طاب؟
شمس: الحمد لله خالتي صار احسن و ان شاء الله كم شهر ويرد سالم معافى
ام عبدالرحمن: الله يرده لكم بالسلامة .. اقول شما و لدي عبدالرحمن ومحمد معاي ويبون يسلمون على أحمد و يطمنون على صحته
شما: حياهم الله خليهم يتفضلون

مريم و شمس و البنات راحوا شوي و جلسوا بعيد عند الزاوية عن سرير اخوهم لأن الغرفه خاصة ووسيعة .. دخلوا الشباب و سلموا على شما و الموجودين وتحمدوا لها بالسلامة.. وتفاولوا و سولفو شوي مع احمد .. كان واضح ان بنات جالسين بعيد بس طبعا الشباب ما رفعوا روسهم يطالعونهم .. و لكن وهم طالعين من الغرفة لمح محمد مرايم وتبسم غصب عنه وهو منزل راسه .. مريم نفس الشي ما طالعته بس لمحته شوي وتذكرت ان هذا هو اللي شافته على البحر و سلم عليه مبارك اخوها و هو نفسه كان معاهم في البر.. استغربت مريم من نفسها .. طيب و إذا كان انا ليه جالسه اتذكره.. ولما لاحظت ابتسامته وهو منزل راسه حسّت بألم في بطنها !!..



__________________
[flash1=http://dc09.arabsh.com/i/01710/6kqc4vrlelow.swf]WIDTH=400 HEIGHT=350[/flash1]
عاشقه من بعيد غير متواجد حالياً   رد مع اقتباس