¤؛° الجزء ارابع °؛¤
طلعوا كلهم بسيارة مبارك ..احمد قدام ويا اخوه.. ومريم وفطيم ورباب ورا.. مرايم مو متعودة تتغشى ولا خواتها بعد.. بس إذا ويا اخوها ما يرضى لازم يخليها تتغشى لأنه ما يحب احد يبصبص على خواته وما شاء الله كلهم فيهم الجمال الخليجي الأصيل

اول شي راحوا الملاهي ولعبوا لحد ما تعبوا .. بعدها وداهم مطعم وتعشوا .. وبعدها قالوا بيسيرون البحر.. ما طاع مبارك يوديهم لكنهم قدروا عليه وقنعوه.. مبارك واحمد راحوا يتمشون على البحر وفطيم ورباب تموا يلعبون في الرمل والبحر من قريب عشان ما يتلعوزن.. اما مرايم كانت تراقب البحر وشوي مبتعدة عنهم وعاقة الغشوى لأن في الليل وما في احد قريب منها .. وتراقب البحر بصمت وكأنها تكلمه ويكلمها.. لأن البحر يذكرها بأمها اللي فقدتها وهي عمرها سنة ما تفهم من الدنيا شي بس دايما يقولو لها انها كانت تحب البحر وتعتبره صديقها المخلص اللي ما يفشي بأسرارها.. والحين مرايم صارت شرات امها يوم تشوف البحر.. تختفي كل الكلمات.. ولأن من رحل وغاب.. لن يأتي بعد طول الفراق وتسقط دموعها بانهمار وتتلاشى صورة امها على صفحة الماء كالسراب ..

في الاثناء كان في جماعة شباب عالبحر بس بعيدين شوي ويلعبون كرة ويشوون.. الكرة راحت بعيد راح واحد من هالشباب عشان يجيب الكرة ولفتت نظره مرايم وهي قاعدة والدمعة نازلة من عينها.. ما حب يزعجها ولكنه ظل شوية يتأمل هالوجه الملائكي والدمعة نازلة على خدها.. وانتبه انها موب لوحدها ورجع لربعه
مبارك: مرااايم يالله نشي بنروح لا نحصل لنا تهزيب من الشيبة
مسحت مرايم دموعها و قامت : كاني يالله قمنا
ركبوا السيارة وانتبه مبارك على الشباب اللي على الشاطئ ونزل يسلم عليهم ونزل معاه أحمد
مبارك: ياهلا والله How are u man? فينك ما تبين؟ (وسلم على الشباب اللي معاه)
محمد: هلا والله Fine? أنت شحالك ؟
مبارك: بخير و عافية.. اسأل عنك يالقاطع ما يوصلك سلامي
محمد: تقصد من علي؟ أبد ولا يوصلّي شي عنلاته
مبارك: افااا .. اللي ما يستحي .. شوف هذي سيارتي اليديدة امس الوالد عطاني اياها هدية عيد ميلادي
طالع محمد السيارة واللي داخلها وعرف ان البنت اللي شافها هي نفسها اللي فيها
محمد: ما شااء الله مبروك تستاهل والله.. جان زين يفتكرون فيني أو يذكرون عيد ميلادي ويعطوني عسى لو قلم بدرهم والله قااابل هههههههههههههههه
مبارك: ههههههههههههههاااااي حلوووة.. (غمز له بعينه وقال له) انت اعرس والعروس كل يوم بتتيب لك هدية.. ترى البنات يموتون على هالسوالف
محمد: هههههههه وانت الصادق خبرك عيلتنا كلنا أولاد مو شراتك يا حظك بس
مبارك:ههههههه لا تعطيني عين .. بقول للعيوز تشببني
محمد: عنلاتك زادٍ الحين انا بحسدك ... رح بس رح
مبارك: اوكي انا رايح سلم لي على عليو و الأهل
محمد: يوصل وانت بعد سلم كثير السلام
وسلم أحمد ومبارك على الشباب و ركبو سيارتهم وراحوا البيت وطبعا حصلوا لهم شويه تهزيب على التأخير ولكنها عدت على خير و من التعب كلهم سارو ينامون

**محمد أخو علي واكبر منه بسنة وحدة وهو يدرس أدب انكليزي باقي له سنة ويكمل جامعة**



¤؛° الجزء الخامس °؛¤
الحين قربت امتحانات نهاية السنة والكل يذاكر وخصوصا مرايم لأنها آخر سنة وتريد تييب مجموع محترم يدخلها الجامعة بجدارة.. وعلى صفحات الكتاب تكتب بعض من الشخبطات لأنها تحب تكتب الشعر والخواطر وهالسوالف ومن بين اللي كتبته

سألت القدر مرة وماطاع يجاوبني ليه يالزمن تحقرني و تصــــــدني
أريد منك جواب شافي و يريـحـني تراني تعبت وتعــبت عيوني منـي
تبجي بجــى وتنوح نوح باكــــــي نوحٍ قطع وصــالي واحبابــــــي

على صفحة اخرى كتبت شي من نوع آخر.. هي لا تحب كتابة هذا النوع لأنها لا تحس به ولكن من حين لحين تكتب وتسلمي نفسها ببضع كلمات حين تفكر بها تضحك.. لماذا لا تدري! ربما لأنها لا تؤمن به

اهداني عطرا احبه ....
حين اشمه اتنفس الدنيا به ..
انتهى العطر .. ولا زال انفي يشمه و يتذكره ..
ترى لماذا .. هل لأني احبه
أم ان انفي احب عطره
طبعا احب العطر .. فهو ماركة عالمية هاهاهاهااااا

وضحكت مريم ضحكة كبيرة .. وبعدها سكت لأن اذا سمعوها بيقولون اكيد مينونة

مرّت الامتحانات ببطئ شديد وطلعت نتايجهم وكلهم الحمد لله امتياز وحتى رباب هالسنة اول سنة تتيب تقدير ممتاز دائما جيد جدا وكانت مبسوطة مرّة.. ما عدا مرايم للحين ما ظهرت نتيجتها وهي يالسة على نار ..

كان بو مبارك جالس بالصالة وحوله اعياله ومرته وامه وابوه يشربون جاهي ويسولفون .. قطع حديثهم صوت تلفون بو مبارك ..
بو مبارك: هلا والله بالغالي بشّر؟؟..
المتصل: هلا بيك .. ادري بك مستعيل
بومبارك: اكيد هذي الغالية
وسكتوا كلهم يسمعون يبون يعرفون يكلم من و خصوصا شما ..
بومبارك: والله؟؟ .. بشرّك الله بالخير بوخليل تسلم لي تستاهل البشارة.. اوكي مع السلامة
الجد سالم: ها بويه منهو متصل؟
بومبارك: واحد ربيعي يايب لي بشارة
الجدة حصة: خير يا ولدي فرحنا معاك
بومبارك: البشارة حق مرايم ...
مرايم: أنااا.. لا تقول ...
بومبارك: مبرررروك يا بنتي عالنجاح تستاهلين
مرايم: والله بوية.. وعاد شو تقديري و جم يبت؟؟؟؟؟؟؟؟
بومبارك وهو يحاول يخبي ابتسامته: ما يحتاي يا بنتي المهم انج نجحتي وافتكيتي من الثانوية
مرايم متيبسة مكانها مو عارفة شو تقول.. فتكلمت رباب كالعادة: يبه ارجوك حرقت اعصابها مسكينة شوفها شلون صار شكلها!.. صج يبه عفية شنو يابت؟؟
بومبارك: يعني بنت ناصر السالم تتحرينها شو بتييب اكيد بترفع راسه.. ممتاز ونسبتها 94 %
شقت مرايم حلجها تستوعب ابوها شو يقول.. وقامت تناقز من الفرحة هي وخواتها فرحانين وحبت ابوها على راسه و الكل بارك لها ...
مبارك: عفية يالدافورة مبرررروك تستاهلين
مرايم: ههههههههه اي طالعة على اخواني
أحمد: والنعم.. من قدج وانتي طالعة علي
رباب: اقول مريمو يعني ان شاء الله مو عاجبتش ناسية حتى انا تقديري ممتاز
فطيم: مسكينة جابتها بالغلط والحين بتفوشر .. (وكانت تقصد رباب بهالرمسة)
مرايم: حبيباتي انتو كلكم شطّار والله .. خلاص لا تتهاوشون خلوني مستانسة
شما: هذيلا إذا ما يتهاوشون معناتها مستوي شي مو طبيعي.. مبروك حبيبتي تستاهلين
الجد سالم: ها الريم الحين ناوية عالجامعة
الجدة حصة: هيه اكيد عقب هالدراسة لازم تروح الجامعة .. بنت جارتنا سويرة ماغيرها في الجامعة شلون ببنت ناصر عيل لازم تروح
مرايم: هيه ببدي اجهز اوراقي للتسجيل بالجامعة .. ونااااااااااااسة
مبارك: وشو حاطة في بالج تدرسين
مريم: يمكن اسجل ادب انكليزي
شما: خيبة.. علاماتج تدخلج طب وتبين تدرسين انكليزي
مريم: ما اعتقد ان الطب يصلح لي .. وانا احب الانكليزي واحس اني اقدر انجح فيه
بومبارك: عيني خير انتي بس جهزي اوراقج ومايصير خاطرج إلا طيب



¤؛° الجزء السادس °؛¤
مبارك ويا الشباب ربعه يتحوطون في الشوارع لين ما زهقوا وقرروا يدورون لهم مكان يقعدون فيه.. شافوا لهم قهوة راقيه توها يديدة واختاروها يكملون سهرتهم فيها.. الشباب هم.. مبارك جاسم وعلي واخوه محمد وربيعه اسامه.. وكانت قعدتهم كلها ضحك ووناسة
اسامة: اقول علي دريت اخوك وش مسوي
علي: لا ما دريت.. ليش شمسوي محمد من وراي اعترف ؟؟..
محمد: والله ما سويت شي .. قسم بالله..
مبارك: قالو للحرامي احلف .... هههههههههه
محمد: يالسبال انا تشبهني بالحرامي ..
مبارك: هههههههاااي.. ما قلت شي انا إلا مثل ينقال
علي: يالله ارمس يا رجال شو مستوي
اسامة: اخوك يوم اللي استلمنا النتيجة طلع ماخذ في مادة استاذنا المصري B+ واخوك محتج مو عايبته النتيجة.. وراح للأستاذ وقال له شلون جي حاط لي هالعلامة وانا متأكد ان مسوي زين .
ورد عليه: يابني دي علامة كويسة احمد ربك غيرك عمرهم ما شفوها في مادتي
ورد محمد: غيري هب انا.. شوف انا ابي تغيرها لي وتحط لي A ما اقبل بغيره
الاستاذ: انت جاي هنا تهددني.. مش مغير حاجة وإذا مش عاجبك بلها واشرب ميتها
محمد: شوف يا استاذ لا تخليني اغلط عليك وأنا ما جاي اهدد ولا شي ولو سمحت لا تصارخ تراني مب اصمخ واسمعك زين.. واسمع انت يا ابن الاى لازم تغير لي وتحط لي الحينه A
اسامة: انا كنت ميت من الضحك عليه وهو يكلمه ببرود والاستاذ يصارخ.. لحد ما جابو لنا الأمن وكانت بتصير مشكلة لولا ان في النهاية استسمح اخوك منه.. واحمد ربك انت بعد ان هذي آخر سنة هو بيدرس فيها وبعدها بيرجع بلده والله جان راحت عليك لو تطيح بيده مرة ثانية
محمد: لا اجل اسكت له.. يقول لي يا واد انته جاي تحاسبني انا احط لك اللي يعجبني.. انا تنقال لي هالرمسة شو حاسب الناس لعبة بيده .
مبارك: كفو والله زين ما سكت عنه.. لكن وانا خوك مو عدلة عليك تقول له يابن الاي ههههههه
محمد: شو اسوي بعد قهرني .. هو مو محترم نفسه شلون يبينا نحترمه
اسامة: هيه صحيح كلامه حتى كله يقول الفاظ سوقية وكله يصارخ حاسبنا يهال عنده ويلعب بعلاماتنا
علي: حصل خير.. وزين ما سحبوا منك بطاقة الجامعة ومنعوك تدخلها وانت باقي سنة وتخلص
محمد: اي الحمد لله كان رحت وطي
مبارك: ههههههههه .. اقول بسألك محمد تخصصكم دراسته صعبة ؟
محمد: هب صعبة وايد كله يعتمد على اللغة و المذاكرة يعني ما فيه شي من المخ
اسامة: شو الغالي ناوي تنقل من الكمبيوتر و تدرس انكليزي
مبارك: لا بس اختي كملت الثانوية و الحين ناوية تدرس ادب انكليزي
علي: والله.. مبروك .. ليش هي شو نسبتها
مبارك: قووولو ما شاء الله 94 %
حس محمد بشعور غريب وابتسم.. تذكر البنت يوم يشوفها عالبحر و قال اكيد هي نفسها
اسامة: ما شاء الله الدافورة وليه ما تدرس طب احسن لها ؟
مبارك: ما تريد تقول خاطرها تدرس انكليزي
محمد: الله يوفقها .. والتخصص هذا زين بعد وله مستقبل
وكملوا الشباب سوالفهم وبعدها كل واحد راح بيته

¤؛° الجزء السابع °؛¤
بدأت العطلة الصيفية.. وعيلة ناصرالسالم ما بتسير مكان تصيّف.. يعني بتم في الأمارات.. عشان كذا قرروا يحطون لهم برنامج للصيف شلون بيقضونه.. ومرايم انشغلت بالجامعة والتسجيل وطلعت نتايج القبول و انقبلت بالتخصص اللي تبيه ..

اليوم الجمعة وبومبارك وشما والشواب كلهم ناشين من الصبح وجالسين بالصالة يشربون شاي .. دق التلفون وشالته البشكارة وكانت مرتبكة ..

البشكارة: ماما شما تعالي بسرعة تلفون ..
شما: طيب جاية من يبيني وليه تصارخين اسمعج تراني
البشكارة: ماما مادري من ويبون من .. بس هذي واحدة يبجي ما افهم ايش تقول
ونشت شما بسرعة وشالت التلفون من عند مينا
شما: الوو من معي ؟
المتصلة وكان كلامها متقطع من الصياح : خالتي .. عمي وينه .. لحقوا علينا..
خافت شما ونادت على زوجها : ناصر اقرب شوف من عالتلفون ماادري شصاير
نش بومبارك بسرعة: الووو
المتصلة: عمي انا بدرية .. الحق علينا يا عمي
بومبارك بقلق: خير يابويه علامكم؟؟ شي صاير؟؟
بدرية: عمي ابويه وامي سوا حادث وهم الحينه بالمستشفى واحنا بروحنا هنا وما ندري شنسوي
بومبارك: الحين انا جاينكن الحين بمسك الخط ومسافة الطريق واصلكم ... (وسكر التلفون) ..
الجد سالم: خير بوية شصاير عسى ما شر؟؟
بومبارك: ابويه ما شي .. بس واحد من الربع حاشه حادث وهذي بنته تخبرني وانا رايح اشوف شصار عليه .. و عسى خير
الجد سالم: الله يسلمه لهله ان شاء الله
بومبارك: ان شاء الله..
وراح فوق و ووعى مبارك من النوم وشله وياه ومسكو خط بو ظبي

وصلوا بيت فهد.. وكانت هناك شمس وبدرية بروحهم وحالتهم حالة من الصياح.. وأول ما شافوا عمهم على طول ارتموا في حضنه لأنهم دوم يحبون عمهم بالرغم من قلّة شوفتهم له.. ومبارك كان ينطرهم في السيارة برا.. عشان يشلهم ويروحون المستشفى ..
شمس: عمي ابوي مادري شصار عليه.. اتصلنا بعمي راشد بس كان مو في البيت والبشكارة ردت علينا
بومبارك: ان شاء الله ما صار عليه شي ... شلون صار الحادث ؟
بدرية: هم كانوا طالعين الصبح بيتشرون اغراض عشان سفرهم للخارج لعلاج أمي.. وعقب ساعة من طلعتهم جانا تلفون من المستشفى يقولون انهم سووا حادث ولا ندري بشي غير
بومبارك: خير يا بنتي يالله خلونا نروح نشوفهم لا تمون بروحكم بالبيت.. خلونا نسير المستشفى الحينه
وسارو للمستشفى وعرفوا أنهم بالعناية ..كانت حالة امهم سيئة اكثر من ابوهم.. ابوهم أثّر عليه الحادث في العمود الفقري وهذا فيه خطر عليه لأن احتمال الشلل كبير.. لكن امهم وصلت وهي بين الحيا والموت ونص ساعة وانتقلت روحها للباري عز وجل ..

يتبع ...

__________________
[flash1=http://dc09.arabsh.com/i/01710/6kqc4vrlelow.swf]WIDTH=400 HEIGHT=350[/flash1]