تضيق الارض و تضيّق صدور الناس ،
انا طيرٍ فقد وسط السما سِـربه !
انا كن الفرح في دنيتي عسّاس !
يمر لحظات ، و يعوّد على دربه ..
و أنا اكثر بنت سرّاها لك الهوجاس ،
أجل و شلون لو راحت بها الغربه ؟
و تنشدني عن اخباري : ابد لا باس ،
احس القلب بـ ضلوعي وَنس ضربه
يلاعب خاطري صوتك مع النسناس ،
و ينعش روح شفقانه ، و تزهر به ..
انا شذنبي اذا قلبي معك حساس ؟
يبيك من السعه ، وشلون فـ الكُربه ؟
اذا اهديتك مقاطع اغنيه بـ احساس ،
ترى ماني بـ مرتاحه ، و منطربه ،
مع الجلّاس ما كني مع الجلاّس ،
جسد .. ما زان له زاده و لا شربه !
اخشْ الدمع بعيوني و اقول نْعاس ،
بعيدة عن وطن صدرك ، و مغتربه ..