منتديات شبكة خورة العربية - طرق لتبيض الاسنان

السلام عليكم ورحمة الله وبركاته

اخواني واخواتي الاعضاء حبيت اطرح عليكم هالموضوع البسيط بعد بحث اجريته على النت عن طرق تبيض الاسنان وأيضا بعد تجربه فعلية لبعض الحلول والنتائج الحمدلله كلها كانت طيبة.

انا بخبركم اسهل الطرق اللي تقدرون تستخدمونها لتبيض الاسنان

1.السواك

جربته انا شخصيا وفعلا النتيجة كانت طيبة وصحيح انه ينظف الاسنان ويشيل عنها الوصخ لكن يكون بياضها بياض عادي وفي اشخاص يرضون بهذا القدر من بياض و لكنه مفيد وايد
تقدرون تستخدمونه وانتوا اطالعون تلفزيون او تسوقون سياره وايضا قبل وبعد كل صلاة.

2. عصير الفراولة

مفيد جدا لتبيض الاسنان وأيضا يجعل اللثة حمرة من داخل وبتالي الاسنان بتبين بيضة اكثر

3.رماد الخبز + العسل

طريقة سهله.. تاخذون قطعة صغيرة من الخبز او الصمون او وتحرقونه تقريبا الين ما يستوي رماد وتخلطون مع نص ملعقة عسل ويفضل يكون طبيعي ومافي مشكله اذا مب طبيعي

المهم تاخذونه وتفركونه الاسنان به وانشاء الله النتيجة طيبه وانا بعدني ما كملت الا يومين وانشاء الله عقب اسبوع بخبركم النتايج

4.عيادة الاسنان

هذا ياخذ بس نص ساعة وصحيح انه النتيجة مضمونه ولكن قريت انه يمكن تصبح الاسنان بعد هذه العملية حساسه اكثر ..
وانا ما جربته

5.الليمون

تحطون شوية ليمون على قطعة او كلينكس وتفركون به الاسنان وينظف الاصفرار اللي على الاسنان ويرجع اللون الطبيعي للأسنان لكن احيانا ما ترجع بيضة بس مب بالشكل المطلوب.

انشاء الله قدرت افيدكم بشي من تجاربي

وصح اللي يحب يبيض اسنانه يقلل من الجقارة اذا كان مدخن و ايضا يقلل من القهوة والشاي

في امان الله
اخوكم ابو شهاب