منتديات شبكة خورة العربية

[poem=font=",6,blue,normal,normal" bkcolor="black" bkimage="http://www.khorh.com/vb/mwaextraedit2/backgrounds/68.gif" border="inset,4," type=0 line=0 align=center use=ex num="0,black""]
مشكله لا جات حاجتك بيدين البخيل=ما يفكك لين تدفع كثر ما يدفعه

و مشكله لا صرت مطعون بكفوف الدخيل=في ظهرك أربع خناجر و بالصدر أربعه

و مشكله لا ضاق بالوقت رجال ثقيل=يطلب أحبابه و عيا زمانه ينفعه

ليت ربي ما يحاسب خليل من خليل=دام ما للحظ فزعه و للوجه أقنعه

و دام ما للعذل تالي و ما بالحيل حيل=الغلا سم نذوقه و مر نجرعه

نحتري فيك اللقا والحصيل هو الحصيل=مثل حلم ما تحقق وعييت أقطعه

كني اللي حط بشفاه جمر المليل=لا قدر يرميه للناس و أزرى يبلعه

و الظروف اللي حدتني لنيران و فتيل=عرضت دمع المحاجر لشي يجزعه

والمدامع بالغلا لا تحال ولا تحيل=و المشاكل كل ما جات جات مجمعه

اعذلوني عن هوى النفس وعيوني تخيل=في حبيب ما تركته و لازلت اتبعه

مغرم في حب مثله و لا أرضى له بديل=عيني تشوفه و قلبي يجوع و يشبعه

ذاك كل ما زان بالي وطالعت النخيل=ما ذكرت الا ثباته بوقت الزعزعه

ما هو الا قطعة من حشا قلب عليل=و ماني الا قطعة منه مخلوق معه

لا جميل شفت قبله ولا بعده جميل=والعذرى رهن رمشه و أنا رهن أصبعه

و الله انه لو طلبني طلوع المستحيل=لطلعه ( منيه ... مناك ) يعني لطلعه

ما علي من الملامه و لا هرج الهبيل=ما أشجع الرجال لا ثار غيره ، ما أشجعه

في عيون اللي عشقني و لا جاني هزيل=الله اللي حط عشقه بقلبي و أزرعه

لو سكت ينطق له الصم و الدنيا تسيل=و ان حكى كن أكثر المزن يوقف يسمعه

سلسبيل من شفاته يخالط سلسبيل=معمعه بسكات ، و أحلى سكات بمعمعه

ما هقيت ان أكثر الليل يمرح بالجديل=لين شفته شوف عيني بكفه يرفعه

و ان حييت مابقالي معه يا كود ليل=لا أسهره بأول غروبه و أموت بمطلعه

و الله ان العشق ( جمره وطاحت بالشليل )=و ان حصل ( ما طاعك الوقت بأحبابك طعه )

و منهو اللي علم اعداي نكران الجميل ؟=و منهو اللي خان خلي و حاول يقنعه

كل عاذل ردني عنك يا الطرف الكحيل=يا عسى الله .. يا عسى الله يقلعه

يا معرف الأحباب للدرب الطويل=( السعه لا بارك الله بالضيق ) السعه

و الله ان الوقت قاسي وأنا ماني ذليل=و أشهد ان الرجل مرات ظنه يخدعه

و أنتم تعذلون خفاق بعيون العديل=ما رحمتم نار جرحه و غيرة مدمعه

و السوالف ليلها ليل و الحايل يحيل=و المشاكل مشكله مشكله متجمعه

مشكله لا خانك الوقت بالحمل الثقيل=لو زرعت الزرع هوج العواصف يشعله

و مشكله لا صار عاذلك ما يبرد غليل=لا تره طيب كلمة ولا حد يمنعه

و مشكله لا صرت مطعون بكفوف الدخيل=في ظهرك أربع خناجر و بالصدر أربعه[/poem]

حامدزيد