منتديات شبكة خورة العربية - الداب أحذر تامنه الين بيدك تنحره

ماكل مايبرق ذهب واحذر يغرك مظهره

................................ترى التأني هو اساس الحكم واقوالي دليل

خلك حكيم بالآمور واللي اندفن لاتحفره

..............................ومن هان نفسه هانته حتى على الشي القليل

جربت انا بعض الامور الذنب والله ماكبره

.....................................والدين اثقل من طعام الضيف في بيت البخيل

الكذب حبله ينقطع والصدق ربك يظهره

.....................................والسر يبدا ينتشر لاصار به قالٍ وقيل

والذيب أحذر تامنه حتى لو انك تخبره

..............................لاتتركه وسط الغنم تحسب لعابة مايسيل !

والنذل اترك صحبته ودك لو الله يقهره

..............................مابه ترى غير الأذى لو يظهر انه لك يميل !

والقلب احذر تهمله ترى المعاصي تسحره

..............................وكم لذةٍ راحت وعاش القلب جراها ذليل !

والعهد احذر تنقضه ،، والعيب حاول تستره

..................................لاتفضحه مادام عيبه ساتره ربٍ جليل

والكبر احذر يوصلك تراه ذل ومحقره

..............................والفار لامنه ظهر يرعب ترى سبعين فيل !

والشين احذر تصحبه مافيه شي يخسره

............................والغدر ، لا ، لاتقربه لوك تموت من الغليل

والداب احذر تامنه لين بيمينك تنحره

...............................واعرف ترى بعض البشر شكاي ولسانه طويل

والسيف بالك تلمسه لو المصايب تنخره

..................................ترى عريب الساس لو طال الزمن يبقى صقيل !

وامك وابوك اخفض لهم جناح عطف ومغفره

................................واجعل رضاهم غايتك وفي حقهم احذر تعيل !

واحذر تهاون بالصلاه ، تراها اصل المفخره

.................................فيها الآجر والفوز مع خير ابد ماله مثيل!

وعندي وصيه تنفعك , ليلك ابد لاتسهره

..................................ولاتمدح اشكال الرطب مادامها فوق النخيل

ابنشدك عن بكرةٍ وضحا , ولدها تقبره !

.....................................وهي ماتشوفه غير مره والجسم منها نحيل !!

عند الممات تعانقه وعيونها ماتبصره !

..................................وماتنفعه رغم البياض اللي كسى وجةٍ جميل

لكن بها تكريم والإنسان ربك طهره !

................................تظهر جليه عندنا , ولغيرنا هي مستحيل !!

العقل نعمه والوعر ,, أعرف بداية معبره

...............................والماء اذا ماذقت طعمه لاتحسبة سلسبيل !