منتديات شبكة خورة العربية

قم يا رفيقي وابغث الهيـل مسمـار
واعدل مزاج اللـي بعيـدن مسيـره
ضوا علينا الليل والخرب مـا طـار
والا الدجاجـه بالخـلا مستـذيـره
دور لنا بطحا الـذرا نشعـل النـار
لين الضحى ياتي عسى فيـه خيـره
بنيت انـا ويـاه بالجلسـه وجـار
وادنيـت كاتـم مستلجـن صفيـره
والطيـر خلينـاه فـي لايـذ الغـار
نرجي عسى رب الخلايـق يجيـره
يمكن علينا باخـر الليـل الامطـار
شفنا مـع المنشـا بروقـن تنيـره
قضينا جلستنا على كيـف واشعـار
عقب العشا شاهي وتكيـه قصيـره
يوم اركدن بيض اللوامـع بالانظـار
والليل باقصـى الكـون ولا كثيـره
سمعنا صوت رعودها والهـوا ثـار
ودلا صبيب الغيث يرشـق غزيـره
ضفينـا عدتنـا والامـزان نـثـار
تكيت باقصى الغـار عينـي قريـره
انا تراكيـت بحصاتـن بهـا غبـار
وتساند الصاحب على وكـر طيـره
سهرنـا ليلتنـا رضينـا بـالاقـدار
والمـا سمعنـا بالرجايـب خريـره
لين استبان بواسع الكون الاسفـار
واذن صحيبي فـوق رجبـه كبيـره
ادينا فرض الدين مع قـول الاذكـار
والما نشوفه طافحـن فـي غديـره
واتسيح قطرات الندى فوق الازهـار
روس الشجر تنفض علينـا ذريـره
وافطرنا تمر خلاص مع قرص مجمار
ومشينا نقنص بين طعـس وزبيـره
انا على النيسان وافـلان فكـس آر
والكـل منـا مستطيـب السريـره
نريد وين الخـرب راقـد بالاقفـار
خبـري بـه مسيـان لاذ بفريـره
شفنا مواطيـه بغرينـه بهـا سـار
لين اختفى بين الشعـوف الصغيـره
واثري لقيته لابدن بيـن الاشجـار
ودليت انادي صاحبـي واستشيـره
جاوب ترا جيتك تقل فينـي الـزار
فرحان مدري وش دهانـي بحيـره
لما بقى له ياصـل الصيـده امتـار
والجيب بالبطنـاج توحـي صريـره
كوبر تعيس الحال بالعرفـج وطـار
شلـع وراه الطيـر مـا راح ديـره
عطا لـه القرنـاس كفيـه وانـدار
والمخلب الاول نشب فـي مصيـره
والمخلـب الثانـي توشـظ بمنخـار
والبوز من بيـن الثنـادي مزيـره
تباشر الصاحب وكبس لـي انـوار
باركت له نسـل الوجيـه السفيـره
رحنا على طعسن بـدا فيـه مبـذار
واشعلنا الارطا والهـوا مـا يثيـره
طبخنا صيدتنا بهـا الثـوم وابـزار
والكبسـه بشعـلان ماحـلا نثيـره
واقفى نهار اليـوم والخيـر مـدرار
من واحـدن مـا للمخاليـق غيـره

يوسف الخليفة ( أبو عبد الله )